1Aau e te faameo ona o e amio leaga; aua foi e te losilosi ona o e fai mea leaga.
2Auā e le pine ona seleeseina i latou e pei o le mutia; e mamae i latou e pei o le vao mu‘a lauolaola.
3Ia e faatuatua ia Ieova, ma e faia amio lelei; ia e nofo i le nuu, ma tausisi i le faamaoni.
4Ia e fiafia lava oe ia Ieova, ona foaiina lea e ia ia te oe o mea e manao i ai lou loto.
5Ia e tuuina atu lou ala ia Ieova, ma faatuatua ia te ia, ona faia lava lea e ia.
6E faaalia e ia lau amiotonu e pei o le malamalama, ma lou faamasinoga e pei o le aoauli.
7Ia e faalologo i luma o Ieova, ma faamoemoe ia te ia; aua e te faameo ona o le ua manuia lona ala, o le tagata ua faia togafiti leaga.
8Ina soia e te ita, ma ia tuu lou tiga; aua e te faameo, ne‘i e faia se mea leaga.
9Auā e faaumatia o e fai amio leaga; a o e faatalitali ia Ieova, o i latou lava ia e fai mo latou le nuu.
10E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava.
11A o e agamalu, e fai mo latou le nuu; e faafiafia foi i latou ia te i latou ona o le manuia e tele.
12Ua manatunatu le tagata amio leaga i se mea e leaga ai le tagata amiotonu; ua lilivau foi ona nifo ia te ia.
13E soisoi le Alii ia te ia; auā ua na silafia o le a sau lona aso.
14Ua fese‘i ae e tagata amio leaga a latou pelu, ua lolou a latou aufana, ia oti ai e ua puapuagaina ma e matitiva, ina ia fasioti i e ua sa‘o a latou amio.
15E oo a latou pelu i o latou lava fatu, e gauia foi a latou aufana.
16O le mea itiiti ua i le tagata amiotonu, e sili ona lelei lea i oloa e tele o e amio leaga e toatele.
17Auā e gauia lima o e amio leaga; a e taofiina ae e Ieova o e amiotonu.
18O loo silafia e Ieova aso o e ua sao a latou amio; e faavavau lava lo latou tofi.
19E le mamā i latou i le aso vale; e maoona foi i latou i ona po e i ai le oge.
20Auā e fano lava o e amio leaga; o e ita foi ia Ieova, e pei o le mea sili o i tamai mamoe i latou; e mavae atu i latou, e mavae atu e pei o le asu.
21Ua no mea le tagata amio leaga, a e le toe taui atu ai; a o le tagata amiotonu, ua amio alofa ia, ma foai fua ana mea.
22Auā o e ua faamanuia e ia, e fai mo latou le nuu; a o e ua faafanoina e ia, e faaumatia i latou.
23E mau ia Ieova le savali o le tagata; e fiafia foi o ia i lona ala.
24Afai e paū ia, e le taatia pea ia i lalo; auā e taofia lona lima e Ieova.
25Ua ou toeaina a‘u nei, sa a‘u taulealea; a ou te lei iloa se tagata amiotonu na lafoaiina, po o ana fanau ua ‘aiisi i latou.
26Ua amio alofa ia i aso uma lava; ua avatu e ia ana mea i e nono mai; ua manuia foi ana fanau.
27Ia e ‘alo ese i mea leaga, ma e faia mea lelei; e te mau ai e faavavau.
28Auā e fiafia Ieova i le faamasinoga, na te le tuua foi ona tagata amio Atua; e leoleoina i latou e faavavau; a e faaumatia fanau a e amio leaga.
29E fai lava le nuu mo tagata amiotonu, e nonofo ai pea i latou.
30O le gutu o le tagata amiotonu e tautala lea i le poto, e tautala foi lona laulaufaiva i le faamasinoga.
31O loo i lona loto le tulafono a lona Atua, e le mapeva foi ona vae.
32Ua lamalama le tagata amio leaga i le tagata amiotonu, ua ia sailiili foi e fasioti ia te ia.
33E le tuuna o ia e Ieova i lona lima; na te le faasala foi ia te ia pe a faamasinoina o ia.
34Ia e faatalitali ia Ieova, ma e tausi i lona ala; ona faaeaina lea o oe e ia ina ia fai mou le nuu; e te iloa atu le fanoga o e amio leaga.
35Na ou iloa atu le tagata amio leaga ua faasaua, ua faateleina foi o ia e pei o le laau ua tupu i lona lava eleele, ma tauluulu ola.
36A ua mavae ese o ia, faauta foi, ua leai; na ou sailiili foi ia te ia, a ua le iloa lava.
37Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia lava lea.
38A e fano faatasi o e solitulafono; o le iuga o e amio leaga o le malaia lava lea.
39O loo mai ia Ieova le faaolataga o e amiotonu; o ia lava lo latou malosi i ona po o le puapuaga.
40E fesoasoani foi Ieova ia te i latou, ma laveai ia te i latou; e laveaiina lava i latou e ia ai tagata amio leaga, na te faaolaina foi i latou, auā ua latou faatuatua ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
