1Sa tele le oa ma le mamalu ia Iosefatu; ua fetaiai foi o laua gafa ma Aapo.
2Ua mavae nai tausaga, ona alu ifo ai lea o ia ia Aapo i Samaria. Ona fasia lea e Aapo o mamoe ma povi e tele, e tali ai o ia, ma le nuu na ia te ia; ma ua faaoso ia te ia ia la o ae i Ramota-Kiliata.
3Ua fai mai foi Aapo le tupu o Isaraelu ia Iosefatu le tupu, Ta te o ea ma a‘u i Ramota-Kiliata? Ona ia tali atu ai lea ia te ia, O a‘u nei e pei o oe lava, o lo‘u nuu e pei o lou nuu; tatou te o atu ma oe i le taua.
4Ua fai atu foi Iosefatu i le tupu o Isaraelu. Se‘i e saili i le aso nei i se afioga mai ia Ieova.
5Ona faapotopoto mai ai lea e le tupu o Isaraelu o le au perofeta e toafa selau o tagata, ma ua fai atu ia te i latou, Pe matou te o ae ea i Ramota-Kiliata e tau ai le taua, pe aua? Ona latou fai mai lea, Maliu ae ia, auā e tuuina mai ai e le Atua i le aao o le tupu.
6Ona fai atu lea o Iosefatu, E le o iinei ea ma se perofeta a Ieova, ina ia tatou fesili atu ia te ia?
7Ona fai mai lea o le tupu o Isaraelu ia Iosefatu, Ua toe le tasi tagata o Mekaio le atalii lea o Imila, tatou te fesili atu ai ia Ieova; a ou te ‘ino‘ino ia te ia; auā na te le vavalo mai ia te au i mea lelei, a o mea leaga e le aunoa. Ona fai atu lea o Iosefatu, Aua le fetalai faapea mai le tupu.
8Ona valaau lea o le tupu o Isaraelu i le tai auauna sili, ua faapea atu, Ia faavave mai ia Mekaio le atalii o Imila.
9O le tupu o Isaraelu ma Iosefatu le tupu o Iuta ua la tietie taitasi i lona nofoālii, sa oofu foi i laua i o laua ofu alii, ma ua la nonofo ai i le mea e aunoa i le faitotoa o Samaria; o loo vavalo foi perofeta uma i o laua luma.
10Na faia foi e Setekaia le atalii o Kenaana o nifo uamea mo ia, ma fai atu, O loo o faapea ona fetalai mai o Ieova, O mea nei e te suatia ai Suria, seia e faaumatia i latou.
11Ua faapea ona vavalo o perofeta uma, ua faapea atu, Maliu ae ia i Ramota-Kiliata, ma ia manuia; auā e tuuina mai ai e Ieova i le aao o le tupu.
12O le na alu i le feau e aami atu ia Mekaio, ua fai atu ia te ia, ua faapea atu, Faauta mai ea i upu a le au perofeta i le tupu ua tasi, ua lelei; o lenei, se‘i faapea foi lau upu, ia pei o so latou, ia e fai atu se upu lelei.
13Ona fai mai lea o Mekaio, O loo o soifua Ieova, o le mea e fetalai mai ai lo‘u Atua, o le mea lea ou te fai atu ai.
14Ua sau foi o ia i le tupu; ona fai atu lea o le tupu ia te ia, Mekaio e, matou te o atu ea i Ramota-Kiliata i le taua, pe aua? Ona fai mai lea o ia, Ina maliu ae ia outou, ma ia manuia, e tuuina mai foi i latou i o outou lima.
15Ona fai atu lea o le tupu ia te ia, Pe foi faafia ea ona ou matuā fai atu ia te oe ia tauto mau, aua ne‘i e fai mai ia te au se mea e tasi, tau lava o le upu moni i le suafa o Ieova?
16Ona fai mai lea o ia, Na ou iloa atu ia Isaraelu uma ua faataapeapeina i mauga, e pei o mamoe a leai so latou leoleo. Ona fetalai mai lea o Ieova, O i latou na, ua leai so latou alii; ia latou taitasi ma toe foi atu i lona fale ma le filemu.
17Ona fai atu lea o le tupu o Isaraelu ia Iosefatu, Na ou le fai atu ea ia te oe, na te le vavalo mai ia te au se mea lelei, na o le mea leaga?
18Ua toe fai mai Mekaio, O lenei, ina faafogafoga mai ia i le afioga a Ieova. Na ou iloa atu ia Ioeva o loo tietie i lona nofoālii, sa tutū foi ‘au uma a le lagi i lona itu taumatau ma lona itu tauagavale.
19Ua fetalai atu foi Ieova, Po o ai ea na te faaoleole ia Aapo le tupu o Isaraelu ina ia alu ae o ia, ma oti i Ramota-Kiliata? Ona fai mai lea o le tasi e faapea, a e fai mai le isi e faapea.
20Ona alu ane ai lea o le tasi agaga, ma tu mai i luma o Ieova, ua fai mai, Ou te faaoleole ia te ia. Ua fetalai atu, Ieova ia te ia, I ni a ea?
21Ona fai mai lea o ia, Ou te alu atu, ma ou fai ma agaga pepelo i gutu o ana perofeta uma. Ona fetalai atu lea o Ieova, E te faaoleole ia te ia, e te malo ai foi; ina alu ia, ma e faapea ona fai.
22O lenei, faauta, ua tuuina e Ieova le agaga pepelo i gutu o au perofeta nei, ma ua fetalai mai e Ieova ia oo le leaga ia te oe.
23Ona faalatalata mai lea o Setekaia le atalii o Kenaana, ma na tu‘i mai ia Mekaio i lona alafau, ma fai mai, Po o fea na ui ai le Agaga o Ieova nai ia te au, e tautala atu ia te oe?
24Ona fai atu ai lea o Mekaio, Faauta, e te iloa i lea lava aso e te alu atu ai i le afeafe tuloto e te lafi ai.
25Ona fai ane lea o le tupu o Isaraelu, Ina outou ave ia ia Mekaio, ma toe faafoi ia te ia ia Amone le alii o le aai, ma Ioasa le atalii o le tupu;
26ma fai atu, O loo o faapea ona fai mai o le tupu, Ina tuuina atu ia o lenei tamaloa i le fale puipui, ma fafaga ia te ia i le mea e ‘ai a e ua tigaina, ma le vai a e ua tigaina, seia ou toe foi mai ma le manuia.
27Ona fai mai lea o Mekaio, Afai lava e te toe maliu mai ma le manuia, ua ou le tautala i le afioga mai ia Ieova. Ua fai ane foi o ia, Ina faalogologo mai ia o outou le nuu uma.
28Ona o ae lea o le tupu o Isaraelu, ma Iosefatu le tupu o Iuta i Ramota-Kiliata.
29Ua fai atu le tupu o Isaraelu ia Iosefatu, Ou te ofu ese a‘u, ma alu i le taua; a ia e ofu oe i lou lava ofu. Ona ofu lea o le tupu o Isaraelu i ofu ese; ona latou o lea i le taua.
30Ua fai atu le tupu o Suria i alii o kariota sa ia te ia, ua ia faapea atu, Aua ne‘i tou tau ma se tagatānuu, po o se alii, tau lava o le tupu o Isaraelu.
31Ua iloa atu e alii e pule i kariota ia Iosefatu, ona latou faapea ane lea, O le tupu o Isaraelu lena. Ona latou sisio ai lea ia te ia e tau; a ua alaga Iosefatu, ona fesoasoani mai ai lea o Ieova ia te ia; ona faaliliueseina lea o i latou e le Atua ia te ia.
32Ua iloa e alii e pule i kariota e le o le tupu o Isaraelu lea, ona latou toe foi atu lea, ua le toe tuliloa ia te ia.
33Ua soona fana e le tasi tagata lana u, ua lavea ai le tupu o Isaraelu i le soo o le ofutau uamea. Ona fai atu lea o ia i le ta‘ita‘i o lona kariota, Ina liliu ane ia o lou lima, ina ia e ave ia te au i tua o ‘au; auā ua ou manua.
34Ua faatetele le taua i lea aso; ua i ai pea foi le tupu o Isaraelu i lona kariota e faafeagai ma Suria, ua oo i le afiafi. Ona oti lea o ia i le itu aso e goto ai le la.
Who We AreWhat We EelieveWhat We Do
2025 by iamachristian.org,Inc All rights reserved.
