FAAMASINO, 14 - Samoan Old Version Bible

O LE MATAUPU XIV.O tala ia Samasoni.

1Ua alu ifo Samasoni i Timenata, ona iloa ai lea o le fafine i Timenata, o le fafine o Filisitia.

2Ona alu ae lea o ia, ma ta‘u atu ai i lona tamā ma lona tinā, ua fai atu, Ua ou iloa le fafine i Timenata, o le fafine o Filisitia; o lenei, ia oulua au mai o ia e fai ma‘u avā.

3Ona fai mai lea o lona tamā ma lona tinā ia te ia, E leai ea se fafine i afafine o ou uso ma lo‘u nuu uma, ina ua e alu e fai avā i Filisitia e le peritomeina? Ua fai atu Samasoni i lona tamā, Ia au mai lea ma‘u, auā e lelei lava ia i lo‘u manatu.

4A ua le iloa e lona tamā ma lona tinā, ua mai ia Ieova lean mea; e saili ai e ia se mea e faalani ai se misa ma Filisitia. O ona po ia na malo ai Filisitia ia Isaraelu.

5Ona o ifo lea o Samasoni, ma lona tamā, ma lona tinā i Timenata; ua oo atu i tovine o Timenata, faauta, ua tu mai ia te ia le leona taanoa o tagi mai.

6Ona osofia lea o ia e le Agaga o Ieova, ua na saeia le leona, e pei ona saeia se tamai ‘oti, a e leai lava se mea i lona lima; ua ia le ta‘u atu i lona tamā ma lona tinā le mea ua na faia.

7Ona alu ifo lea, ma na tautala ma le fafine; ua lelei lava o ia i le manatu o Samasoni.

8Ua foi atu o ia ina ua mavae nisi aso ina ia aumaia o ia; ona afe ane lea o ia e matamata i le tino o le leona; faauta, o le vao lagomeli atoa ma le meli i le tino o le leona.

9Ua ia to mai ai i ona lima, ua ‘ai fano, ua oo atu i lona tamā ma lona tinā, ona avatu lea e ia ia te i laua, ua la aai ai; a e le ta‘u atu e ia ia te i laua, na ia to mai le meli ai le tino o le leona.

10Ua alu ifo lona tamā i le fafine, ona fai ai lea e Samasoni i lea mea o le tausamaaga, auā na faapea le tu i taulelea.

11Ua latou iloa o ia, ona latou tuu atu lea o ana aumea e toatolugafulu, latou te i ai ma ia.

12Ua fai atu Samasoni ia i latou, Se‘i ou fai atu ia te outou la‘u tupua, afai tou te matea mai lona uiga, i aso e fitu o le tausamaaga, ma outou maua, ona ou avatu lea ia te outou o ie e tolugafulu ma ofu e tolugafulu;

13a e afai tou te le mafai ona matea mai lona uiga, ona outou au mai lea ia te au o ie lino e tolugafulu ma ofu e tolugafulu. Ua latou fai mai ia te ia, Ina fai mai ia lau tupua, matou te faalogologo atu ai.

14Ona fai atu lea o ia ia te i latou, Na alu atu le mea e ‘ai nai lē ‘ai mea; na alu atu foi le mea suamalie nai lē malosi. Ua latou le mafai ona matea le tupua i aso e tolu.

15Ua oo i le aso fitu, ona latou fai ane lea i le avā a Samasoni, Ia e faaoleole i lau tane, ma faaali mai ia i matou le tupua, ne‘i matou susunuina oe ma le aiga o lou tamā i le afi; pe na outou aami ea ia i matou e faamativa ia te i matou? E le o lea ea?

16Ona tagi lea o le avā a Samasoni ia te ia, ua faapea atu, Ua na ona e ‘ino‘ino ia te au, a e te le alofa mai lava ia te au; ua e fai atu le tupua i tagata o lo‘u nuu, a e te lei faaali mai ai ia te au; ua fai mai o ia ia te ia, Faauta, ou te lei faaali atu i lo‘u tamā ma lo‘u tinā; ou te faaali atu ea ia te oe?

17Ua tagi lava o ia ia te ia i aso e fitu sa fai ai le tausamaaga; ona oo lea i le aso fitu ua ia faaali atu ai ia te ia, auā ua faatauanauina o ia e ia, ona faaali atu lea e ia o le tupua i tagata o lona nuu.

18Ona fai mai lea ia te ia o tagata o le nuu i le aso fitu, a o lei alu ifo le la, Se a se mea e sili ona suamalie i le meli? Se a foi se mea e sili ona malosi i le leona? Ona ia fai atu lea ia i latou, Ana le se anoa la‘u povi na outou suatia ai le eleele, po ua outou le matea la‘u tupua.

19Ona osofia lea o ia e le Agaga o Ieova; ona alu ifo lea o ia i Asekelona, ma na fasia o latou tagata e toatolugafulu, ona ave lea e ia o latou ofu, na ia avatu ai ofu i e na matea mai le tupua; ua matuā ita o ia, ona alu ae lea o ia i le fale o lona tamā.

20A ua ave le avā a Samasoni mā lana uo, le na fai ma uo ia te ia.