1Ua mavae le sapati, ona faatau lea e Maria le Makatala, ma Maria le tinā o Iakopo, ma Salome, o mea manogi, ina ia latou o atu e faauu ai ie te ia.
2O le taeao lava, o le aso muamua o le vaisapati, ua latou o atu ai i le tuugamau i le alu ae o le la.
3Na fetautalatala‘i foi i latou, ua fapea ane, O ai ea se na te fulieseina le maa mo i tatou i le gutu o le tuugamau?
4Ua latou vaavaai atu, ona iloa lea, ua uma ona fulieseina o le maa; auā ua matuā tele ia.
5Ua ulu atu i latou i le tuugamau, ona latou iloa lea o le taulealea o nofo i le itu taumatau, ua ofu o ia i le ofu pa‘epa‘e tatapuvae; ona latou matatau ai lea.
6A ua fai atu ia ia te i latou, Aua tou te matatau; o loo outou saili ia Iesu le Nasareta o le na faasatauroina; ua tu o ia; e le o iinei; ina matamata ia i le mea na latou tuuina ai o ia.
7A ia outou o atu, ina ta‘u atu i ona soo atoa ma Peteru, e muamua atu o ia ia te i outou i Kalilaia; tou te iloa ai o ia i lea mea, faapei ona fetalai atu ai o ia ia te outou.
8Ona latou vave o atu ai lea i fafo, ma sosola ese i le tuugamau; ua maua foi i latou i le gatete, ma le ofo tele lava; ua latou le fai atu foi se upu i se tasi, auā ua matatau.
9Ua tu mai o ia i le taeao lava o le uluai aso o le vaisapati, ona lua‘i faaali lea o ia ia Maria le Makatala, o le na ia tuli ese ia te ia temoni e toafitu.
10Ua alu atu ia, ma na ta‘u atu ai ia te i latou o e sa ia te ia, o latou o faanoanoa ma fetagisi.
11O i latou foi, ua latou faalogo i le tala ua soifua o ia, ma ua iloa o ia e ia, e lei talitonu ai i latou.
12Ua mavae atu ia mea, ona faaali mai lea o ia, ua ese mai lona tino, i le isi toalua o i latou, o loo la savavali atu i le faoa aai.
13Ona o lea o i laua, ma ta‘u atu ia te i latou uma; a e lei talitonu i latou ia i laua.
14Mulimuli ane ua faaali mai o ia i le toatinoagafulu ma le toatasi o taooto i latou e aai; ona aoai atu lea o ia ia te i latou ina ua le talitonu i latou, ma ua loto maaa, auā ua latou le talitonu ia te i latou o e na iloa o ia ina ua toe tu mai.
15Ua fetalai atu foi o ia ia te i latou, O atu ia outou i le lalolagi uma, ina tala‘i atu ai le tala lenei i tagata uma lava.
16O lē faatuatua ma papatisoina, e faaolaina ia; a o le lē faatuatua, e faasalaina ia.
17E mulimuli atu foi nei faailoga i e faatuatua; e tutuli e i latou temoni i lo‘u igoa; e tautalatala i latou i gagana fou;
18e fetagofi i latou i gata; afai foi latou te inu i se mea e oti ai, latou te le afaina ai lava; e faaee atu foi o latou lima i luga o e mamai, ma faamaloloina i latou.
19Ua mavae foi ona fetalai atu o le Alii ia te i latou, ona aveina ae lea o ia i le lagi, ona nofo ai lea o ia i le itu taumatau o le Atua.
20Ona latou o atu lea, ma tala‘i atu i mea uma; ua galue faatasi le Alii ma i latou, ma ua faamaonia le upu i faailoga ua mulimuli ane ai. Amene.
Who We AreWhat We EelieveWhat We Do
2025 by iamachristian.org,Inc All rights reserved.
