1Ia outou tausisi i le alofa; ia naunau foi i mea faaleagaga, a e sili lea ina ia outou perofeta ane.
2Auā o lē tautala i le gagana ese, e le tautala ia i tagata, a o le Atua; auā e leai se lagona, a e tautala ia i le Agaga i mea lilo;
3a o lē perofeta ane, e tautala ia i tagata, ina ia faamafanafana ai, ma apoapoai ai, ma fetomai ai.
4O lē tautala i le gagana ese e faamafanafana e ia ia te ia; a o lē perofeta ane, e faamafanafana ia i le ekalesia.
5Ou te loto ina ia outou tautala uma i gagana eseese, a e sili lo‘u loto ina ia outou perofeta ane; auā e sili lē perofeta ane i lē tautala i gagana eseese, pe a le faamatalaina e ia, ina ia faamafanafanaina le ekalesia.
6A o lenei, le au uso e, afai ou te alu atu ia te outou ma tautala i gagana eseese, se a ea so‘u aoga ia te outou, pe afai ou te le tautala atu ia te outou i le faaaliga, po o le poto, po o le perofeta ane, po o le a‘oa‘o atu?
7O mea foi e le ola ua taalili mai leo, po o le fagufagu, po o le kitara, a le fefatifatiai leo, e iloa ea faapefea le mea ua ilia mai, po o le mea ua taia mai?
8Auā foi a faaletonu le leo o le pu, o ai ea se na te sauni e tau!
9E faapea foi outou, afai tou te le sauniuni atu i o outou laulaufaiva ni upu matala, e iloa ea faapefea le upu ua tautala a‘i? auā e tautala atu outou i le gaogao.
10Atonu e tele lava leo i le lalolagi, a e tofu ma lona uiga.
11O lenei, afai ou te iloa le uiga o le leo, ua avea a‘u ma tagata o le nuu ese i lē tautala mai; o lē tautala mai foi, o le tagata o le nuu ese o ia ia te au.
12Ia faapea foi outou, ina ua outou naunau i mea faaleagaga, sailiili ia ina ia sili outou i le faamafanafanaina o le ekalesia.
13O lenei, o lē tautala i le gagana ese, ina tatalo ia o ia, ina ia mafai ona faamatalaina e ia.
14Auā afai ou te tatalo i le gagana ese, ua tatalo ai lo‘u agaga, a ua le fua mai ni fua e lo‘u mafaufau.
15Ia, a faapefea? ou te tatalo i le agaga, ou te tatalo foi i le mafaufau; ou te pese i le agaga, ou te pese foi i le mafaufau.
16A le faapea, pe a ē faafetai i le agaga, pe faapefea ona amene mai i lau faamanū o lē nofo i le mea e nofo ai le tagata valea, ina ua le lagona e ia lau upu?
17auā ua mālie lava lau faamanū, a ua le faamafanafanaina le tasi.
18Ou te faafetai i lo‘u Atua, ina ua tele la‘u tautala i gagana eseese, a e itiiti a outou uma lava;
19a e peitai ou te loto ina ia ou tautala i le ekalesia i ni upu se lima ma lo‘u mafaufau, ina ia ou a‘oa‘o atu i nisi, a e ou tele loto i ni upu se mano i se gagana ese.
20Le au uso e, aua tou te faatamaiti i le mafaufau; peitai ane ia outou faatamameamea i le leaga, a ia outou tagata matutua i le mafaufau.
21Ua tusia i le tulafono, Ua fetalai mai le Alii, Ou te tautala atu i lenei nuu i gagana eseese ma laugutu ese; a e ui lava ina faapea, latou te le faalogo mai lava ia te au.
22O lenei, o gagana eseese, e le fai ma faailoga ia i e faatuatua, a o e le faatuatua; a o le perofeta ane, e le se faailoga lea mo e le faatuatua a o e faatuatua.
23Afai foi e faapotopoto le ekalesia uma i le mea e tasi, ma latou tautala uma i gagana eseese, a ulufale atu ni e valelea, po o e le faatuatua, e le ta‘uvaleleaina ea outou e i latou?
24A e afai e perofeta ane uma, a e ulufale atu se tasi, o se le faatuatua, po o se valea, ua aoaiina o ia e i latou uma, ua faamasinoina e i latou uma,
25ua aliali mai ai foi mea lilo o i lona loto, ona faapaū fao ai lea o ia, ma ifo atu i le Atua, ma talatala, e moni, o ia te outou le Atua.
26O lenei, le au uso e, pe faapefea? Pe a outou potopoto, ua tofu outou ma le pese, ua i ai le mataupu, ua i ai le gagana, ua i ai le faaaliga, ua i ai le faamatalaga; ia faia mea uma e iu ai i le faamafanafanaina.
27Afai e tautala se tasi i le gagana ese, ia tautala se toalua, po o se toatolu e gata ai, ma ia feauai; ma ia faamatala e se tasi.
28A e afai e leai se na te faamatalaina, aua le tautala o ia i le ekalesia; a ia tautala o ia ia te ia ma le Atua.
29Ia tautala perofeta e toalua, pe toatolu, ma ia faamasinoina e nisi.
30A e afai ua faaalia se mea i se tasi o loo nofo mai, ia faalologo le na muamua.
31Auā tou te mafaia ona perofeta uma taitoatasi, ina ia a‘oa‘oina uma, ma ia faamafanafanaina uma.
32E usiusitai foi agaga o perofeta i perofeta.
33Auā o le Atua, e le o le Atua ia o le faasoesa, a o le filemu; faapei o i ekalesia uma o le au paia.
34Aua le tautala o outou fafine i ekalesia; auā e le tuuina ia te i latou e tautala; a ia latou usiusitai, pei ona fai mai ai foi o le tulafono.
35Afai foi ua latou fia iloa se tasi mea, ia latou fesili atu ai i a latou lava tane i o latou fale; auā o le mea matagā ona tautala o le fafine i le ekalesia.
36Na alu atu ea le upu a le Atua nai ia te outou? po ua na o outou ea na oo atu i ai?
37Ai se tasi ua ta‘ua o le perofeta, po o le ua i ai le Agaga, ia iloa lelei e ia, o mea ou te tusi atu nei ia te outou, o poloaiga ia a le Alii.
38A e afai e le iloa e se tasi, ia le iloa pea e ia.
39O lenei, le au uso e, ia outou naunau ina ia perofeta; aua foi ne‘i vavao le tautala i gagana eseese.
40Ia faia mea uma lava ma le matagofie ma le sauni lelei.
Who We AreWhat We EelieveWhat We Do
2025 by iamachristian.org,Inc All rights reserved.
