1Ona sola ai lea o Tavita nai Naiota i Rama, ua alu ma fai atu i luma o Ionatana Se a le mea ua ou faia? O le a foi la‘u agasala, po o le a lo‘u sese i luma o lou tamā, ina ua ia saili e fasioti ia te au?
2Ona fai mai lea o ia te ia, Ia mamao lava lea; e te le oti lava; faauta, e le faia e lo‘u tamā se mea tele po o se mea itiiti, a e muai ta‘u mai i o‘u taliga; e nanā ea i se a e lo‘u tamā lenei mea ia te au? E le o faapea lava.
3A ua tauto lava Tavita, ua fai atu, Ua iloa lava e lou tamā ua alofagia a‘u e oe, ua faapea ane o ia, Aua ne‘i iloa le mea nei e Ionatana, ne‘i tiga ai o ia; o loo soifua Ieova, ua e soifua foi oe, e moni lava, ua peiseai o le laasaga e tasi i le va o a‘u ma le oti.
4Ona fai mai lea o Ionatana ia Tavita, O se mea e te manao i ai, ou te faia lava lea mo oe.
5Ua fai atu Tavita ia Ionatana, Faauta, a taeao o le masina faatoa vaaia, e tatau ai ona ma nonofo faatasi ma le tupu, ma te aai ma ia; tuu mai ia o a‘u, ou te lafi foi i le vao seia oo i le afiafi i e luā;
6afai e fesili lou tamā ia te au, e te fai atu, Na faanoi mai lava Tavita ia te au, ia momo‘e atu o ia i Peteleema lona nuu, auā e i ai le taulaga e fai i tausaga mo lona aiga uma.
7Afai e faapea mai o ia, Ua lelei; o le manuia lea o lau auauna; a e afai matuā toasa o ia, ona e iloa lea ua finagalo vale mai o ia.
8E te alofa foi i lau auauna, auā o le feagaiga a Ieova na e faia ma lau auauna; a e afai o i ai se agasala ia te au, ia e fasioti lava oe ia te au; se a le mea e te avatu ai a‘u i lou tamā?
9Ona fai mai lea o Ionatana, Ia mamao ia te oe; auā ana ou iloa lava ua iu le filifiliga a lo‘u tamā, o le a oo se leaga ia te oe, po ua ou ta‘u atu ia te oe.
10Ona fai atu lea o Tavita ia Ionatana, O ai ea e ta‘u mai ia te au pe afai e tali mai lou tamā ia te oe ma le ita?
11Ua fai mai Ionatana ia Tavita, Sau ia, ina ta o atu i le vao; ona o lea o i laua i le vao.
12Ona fai mai lea o Ionatana ia Tavita, Ieova le Atua o Isaraelu, ia sisila mai o ia, a uma ona ou tofotofo i lo‘u tamā e faapenei le aso taeao po o ē luā; faauta foi, afai e loto lelei o ia ia Tavita, afai ou te le auina atu se tasi ia te oe e ta‘u atu ai ia te oe,
13ia faapea ona faia e Ieova ia Ionatana, ma ia faaopoopo i ai; a e afai e loto lo‘u tamā e agaleaga ia te oe, ou te ta‘u atu lava ia te oe, ma tuuina atu ia te oe ia alu ma le filemu; ia ia te oe foi Ieova, e pei ona sa i ai i lo‘u tamā.
14Afai ou te ola pea a‘u, ia e faia le alofa o Ieova ia te au, ia a‘u le oti; a e afai ou te oti,
15aua le tuua foi lou alofa i lo‘u aiga e faavavau, pe a faaumatia e Ieova nai le fogāeleele taitasi uma o e ita a Tavita.
16Ua osi ai le feagaiga a Ionatana ma le aiga o Tavita, ua faapea, ia suea e Ieova ai lima o e ita ia Tavita.
17Ua fai atu Ionatana, ia toe tauto Tavita ina ua alofa o ia ia te ia; auā ua ia alofa ia te ia, pei o lona alofa ia te ia lava.
18Ua fai mai Ionatana ia te ia, O le masina faatoa vaaia taeao, e silia ai oe, auā e le nofoia lou nofoa.
19A tolu ni ou aso, ona e alu ifo loa lea, ma alu atu i le mea na e lafi ai i le aso na fai ai le mea, ma e nofo e latalata ane i le maa o Asela.
20O a‘u foi, ou te fana ni u e tolu i le tasi ona itu, e peiseai ou te fana atu ai i se manulauti.
21Faauta foi, ou te auina atu se tama e alu ma saili i u; afai ou te matuā fai atu i le tama, Faauta, o u o loo i ou tala mai, ia e tago i ai; ona e sau ai lea, auā o le a manuia oe, ua leai lava se mea; ua soifua Ieova.
22A e afai ou te fai atu faapea i le taulealea, Faauta o u o loo i ou tala atu; alu ia oe, auā ua auina atu oe e Ieova.
23A o le mea na ta tautala ai, o a‘u ma oe, faauta, o Ieova e va a‘i taua, o oe ma a‘u e faavavau.
24Ua lafi Tavita i le vao; ua oo foi i le masina faatoa vaaia, ona nofo ai lea o le tupu e fai le taumafataga.
25Ua nofo le tupu i lona nofoa, pei o isi aso, i le nofoa i tala ane o le pa o le fale; ua tulai Ionatana, a ua nofo Apineru i tafatafa o Saulo; ua le nofoia foi le nofoa o Tavita.
26A ua le fai mai e Saulo se upu i lea aso, auā ua ia faapea, Ua oo se mea ia te ia, ua le mamā o ia, ai lava e le mamā o ia.
27Ua oo i le taeao, (o le aso lua lea o le masina,) ua le nofoia foi le nofoa o Tavita; ona fai mai lea o Saulo ia Ionatana lona atalii, Po o le a le mea e le sau ai le atalii o Iese, auanafi atoa ma le asō e ‘ai ai?
28Ona tali atu ai lea o Ionatana ia Saulo, Na faanoi mai lava Tavita, ia alu o ia i Peteleema;
29ua fai mai, Ia e tuu mai a‘u, ou te alu; auā o le taulaga e fai i lo matou aiga i le aai; ua poloai mai foi lo‘u uso ia te au; o lenei, afai e te alofa mai ia te au, tuu mai ia o a‘u ia matou feiloai ma o‘u uso; o le mea lea ua le sau ai o i le laoai a le tupu.
30Ona ita ai lea o Saulo ia Ionatana, ua fai mai ia te ia, Le tama a le fafine amio piopio ma le finau vale! Ou te lei iloa ea ua e filifilia le atalii o Iese i lou faamaina, ma le faamaina o le le lavalavā o lou tina?
31Auā o aso uma e ola ai le atalii o Iese i le fogāeleele e le faatumauina oe ma lou malo; o lenei, ia e aami atu ia te ia, ma au mai ia te au, auā e oti lava ia.
32Ona tali atu lea o Ionatana ia Saulo lona tamā, ua faapea atu ia te ia, E oti i se a? Se a se mea ua faia e ia;
33Ona velo ai lea e Saulo le tao ia te ia e fasi ai ia te ia; ona iloa ai lea e Ionatana, ua tonu i lona tamā ia fasiotia lava Tavita.
34Ona tulai lea o Ionatana nei le laoai ma le ita tele, ua le ‘ai se mea i le aso e lua o le masina, auā ua tiga ona o Tavita, ina ua faaleagaina o ia e lona tamā.
35Ua oo i le taeao, ona o atu lea o Ionatana o i laua ma le tama itiiti, i le vao i le itu la na la tuuina ma Tavita.
36Ua ia fai atu i lana auauna, Momo‘e atu, ina saili u ou te fana atu. Ua momo‘e le tama, ona fana atu lea le u i ona tala atu.
37Ua oo atu le tama i le mea ua i ai le u na fana atu e Ionatana, ona valaau atu lea e Ionatana i le tama, ua faapea, E le ua i ou tala atu ea le u?
38Ona valaau atu lea e Ionatana i le tama, Ia tele vave lava, aua ne‘i tu. Ua ao u e le tama na ō ma Ionatana, ona au mai lea i lona alii.
39Ua le iloa e le tama le mea, na o Ionatana ma Tavita ua la iloa le mea.
40Ona tuu atu lea e Ionatana o ana auupega i le tama sa ia te ia, ua fai atu ia te ia, Alu ia, ina avatu nei mea i le aai.
41Ua alu le tama, ona tulai lea o Tavita nai le itu i toga, ua faapaū faō i le eleele, ua ifo faatolu, ua feasogi foi i laua, ma fetagisi i laua, ua oo ina faasili lo Tavita,
42Ona fai mai lea o Ionatana ia Tavita, Alu ia ma le manuia, auā ua tauto i taua ma a‘u i le suafa o Ieova, ua faapea, Ia i ai Ieova i le va o a‘u ma oe, i le va foi o la‘u fanau ma lau fanau e faavavau. Ona tulai lea o ia, ma alu ese, a e alu Ionatana i le aai.
Who We AreWhat We EelieveWhat We Do
2025 by iamachristian.org,Inc All rights reserved.
