1Ona tŭlei mai lea o le afioga a Ieova ia Ieu le atalii o Hanani ia Paasa, ua faapea mai,
2Na ou faapeaina oe mai le eleele, ma ou tofia oe e fai ma ta‘ita‘i i lo‘u nuu o Isaraelu; a ua e savali i le ala o Ierepoamo, ma ua e faatupu ai le agasala i lo‘u nuu o Isaraelu, e faaonoono mai ai ia te au i a latou agasala.
3Faauta, o le mea lea ou te ave ese ai le gafa o Paasa, ma le gafa o lona aiga; ou te faia foi lou aiga ia pei o le aiga o Ierepoamo le atalii o Nepata.
4O so sa Paasā e oti i le aai e ‘aina lea e ulī; o sona tagata e oti i le vao e ‘aina lea e manu felelei.
5O toe o mea na faia e Paasa, ma mea na ia faia, ma lona fitafita, e lei tusia ea ia i le tusi o tala i nofoaiga a tupu o Isaraelu.
6Ona taoto ai lea o Paasa faatasi ma ona tamā, ua tanumia foi o ia i Tiresa; ona soloai ane lea o Ele lona atalii e fai ma tupu.
7O Ieu foi le perofeta, o le atalii o Hanani, na oo mai ai le afioga a Ieova ia Paasa ma lona aiga; ona o mea leaga uma na ia faia i luma o Ieova, i lona faaonoono atu ia te ia i galuega a ona lima, ina ua faapei o le aiga o Ierepoama o ia; ina ua na fasioti foi ia te ia.
8O le luafulu ma le ono o tausaga o Asa le tupu o Iuta na fai ai Ele le atalii o Paasa ma tupu i Isaraelu i Tiresa, i tausaga e lua.
9Na foua foi o ia e lana auauna o Semeri, o lē pule i le vaeluagalemu o ona kariota, a o Tiresa o ia o inu ia ia onā i le fale o Arasa o le na pule i lona aiga i Tiresa.
10Ua ulufale atu Semeri, ma na taia, ma fasioti ia te ia, i le luafulu ma le fitu o tausaga o Asa le tupu o Iuta; ona fai ai lea o ia ma tupu e sui a‘i o ia.
11Ua fai o ia ma tupu, ma ua tietie o ia i lona nofoalii, ona fasiotia lea e ia o le aiga uma o Paasa; ua ia le faatoeina ia te ia se tulai atu i se aupa, po o sona aiga, po o sana uo.
12Ua faaumatia lava e Semeri le aiga o Paasa, e tusa ma le afioga a Ieova ua ia fetalai mai ai ia Paasa na aumaia e Ieu le perofeta,
13ona o agasala uma a Paasa, ma agasala a Ele lona atalii na la agasala ai, ma faatupuina ai le agasala ia Isaraelu, i lo latou faaonoono ia Ieova le Atua o Isaraelu i a latou mea faatauvaa.
14O toe o mea na faia e Ele, ma mea uma na ia faia, e lei tusia ea ia i le tusi o tala i nofoaiga a tupu o Isaraelu?
15O le luafulu ma le fitu o tausaga o Asa le tupu o Iuta na fai ai Semeri ma tupu i aso e fitu i Tiresa. Ua sii le taua e le nuu i Kipetonu, o le aai o Filisitia lea.
16Ua faalogo foi le nuu i le toagālauapi i le tala, Ua fouvale Semeri, ua fasiotia foi e ia le tupu; ona tofia ai lea e Isaraelu uma o Omeri, o le pule i ‘au, e fai ma tupu o Isaraelu i lea aso i le toagālauapi.
17Ona o ae ai lea o Omeri ma Isaraelu uma faatasi ma ia ai Kipetonu, ma latou vagaia Tiresa.
18Ua iloa foi e Semeri ua maua le aai; ona alu lea o ia i le ‘olo i le fale o le tupu, ma na faamuina le fale o le tupu i le afi i ona luga,
19ua oti ai o ia, ona o ana agasala na ia agasala ai i lona fai mea leaga i luma o Ieova, ma lona savali i le ala o Ierepoamo, ma lana agasala na ia faia e faaagasala ia Isaraelu.
20O toe o mea na faia e Semeri, ma lona fouvale na ia fouvale ai, a lei tusia ea ia i le tusi o tala i nofoaiga a tupu o Isaraelu?
21Ona vaeluaina lea o le nuu o Isaraelu; ua mulimuli atu le tasi vaega o le nuu ia Tipeni le atalii o Kinati e fai o ia mo latou tupu; a e mulimuli atu le isi vaega ia Omeri.
22A ua manumalo le nuu na mulimuli atu ia Omeri, i le nuu na mulimuli atu ia Tipeni le atalii o Kinati; ona oti lea o Tipeni, a e fai Omeri ma tupu.
23O le tolu sefulu ma le tasi o tausaga o Asa le tupu o Iuta, na fai ai Omeri ma tupu o Isaraelu; e sefulu ma le lua tausaga o lana nofoaiga; e ono tausaga na fai ai o ia ma tupu i Tiresa.
24Na faatau e ia le mauga o Samaria mai ia Semeri i ario e lua taleni, ua faia foi e ia le aai i le mauga, na faaigoa foi e ia le aai ua ia faia i le igoa o Semeri, o le alii e ona le mauga, o Samaria.
25A ua amio leaga Omeri i luma o Ieova; ua sili ona leaga o ia ia te i latou uma na muamua ia te ia.
26Auā na ia savali i le ala uma o Ierepoamo le atalii o Nepata, ma lana agasala na ia faatupu ai le agasala ia Isaraelu i lo latou faaonoono atu ia Ieova le Atua o Isaraelu i a latou mea faatauvaa.
27O toe o mea na faia e Omeri, ma lona fitafita sa fai, e lei tusia ea ia i le tusi o tala i nofoaiga a tupu o Isaraelu?
28Ona taoto lea o Omeri faatasi ma ona tamā, ua tanumia foi o ia i Samaria; ona soloai ane lea o Aapo lona atalii e fai ma tupu.
29O le tolu o sefulu ma le valu o tausaga o Asa le tupu o Iuta na fai ai Aapo le atalii o Omeri ma tupu o Isaraelu; ua fai foi Aapo le atalii o Omeri ma tupu o Isaraelu i Samaria i tausaga e luafulu ma le lua.
30Ua sili ona amio leaga o Aapo le atalii o Omeri i luma o Ieova ia te i latou uma na muamua ia te ia.
31Ua se mea māmā ia te ia ona savali i agasala a Ierepoamo le atalii o Nepata, a ua ia fai avā ia Iesepela le afafine o Etepaala le tupu o sa Saitonū, ua alu foi o ia, ma auauna ia Paala, ma ifo i ai.
32Ua ia faatu foi le fata faitaulaga ia Paala i le fale o Paala na ia faia i Samaria.
33Ua faia foi e Aapo le tupua o Asaira; ua sili lava mea na faia e Aapo e faaonoono ai ia Ieova le Atua o Isaraelu i tupu uma o Isaraelu na muamua ia te ia.
34O lana nofoaiga na fai ai Ieriko e Ieli le Peteli; na faavaeina e ia ia Apiramo lana ulumatua, na faatuina foi e ia ona puipui ia Sekupo lana uii, e tusa ma le afioga a Ieova na ia fetalai mai ai na aumaia e Iosua le atalii o Nuno.
Who We AreWhat We EelieveWhat We Do
2025 by iamachristian.org,Inc All rights reserved.