1Ua oo Tavita ma ona tagata i Sekeleka i le aso tolu, a ua uma le osofia le itu i toga ma Sekeleka e Amaleka; ua fasia foi Sekeleka, ma ua faamuina i le afi.
2Ua tāfea foi fafine sa i ai, o e iti atoa ma e matutua; e lei fasiotia se tasi, a ua avea i latou, ma ua latou o.
3Ua oo atu Tavita ma ona tagata i le aai, faauta, ua mu i le afi, a o a latou avā, ma o latou atalii, ma o latou afafine ua tāfea i latou.
4Ona fetagisi ai lea o Tavita ma le nuu sa ia te ia, ua leo tetele, ua oo ina le toe lavā ona tagi.
5Ua tāfea foi avā a Tavita e toalua, o Ainoama le Isereelu, ma Apikaila le avā a Napalu le Karamelu.
6Ua atuatuvale tele lava Tavita, auā na tautala le nuu e fetogi ia te ia i maa, ina ua tiga loto o le nuu uma taitasi i ona atalii ma ona afafine; a ua faamalosi Tavita lona loto ia Ieova lona Atua.
7Ua fai atu Tavita ia Aviata le faitaulaga, le atalii o Aimeleka, Ina au mai ia ia te au le efota; ona avatu ai lea e Aviata o le efota ia Tavita.
8Ona fesili lea o Tavita ia Ieova, ua faapea atu, Ou te tuliloa ea i lena ‘au? Ou te maua atu ea ia te i latou? Ona fetalai mai lea o ia ia te ia, Tuliloa ia, auā e te maua atu ai lava, ma e maua mai lava mea uma.
9Ua alu atu Tavita, o ia ma tagata e toaono galau sa ia te ia, ua oo i le alia o Pesora, ua nonofo ai e na nonofo.
10Ua tulituliloa e Tavita ma tagata e toafa galau, a ua nonofo le toalua selau na le lavā e o atu i le la itu o le alia o Pesora.
11Ona latou maua lea le tagata Aikupito i le vao, ua avatu o ia ia Tavita; ua latou avane ia te ia se areto ua ‘ai ai, ma latou faainu ia te ia i le vai.
12Ua latou avatu foi ia te ia se fasi potopotogāmati mamago ma fuifui vine mamago e lua, ua ‘ai o ia, ona toe foi mai lea o lona malosi ia te ia; auā e tolu ao e tolu foi po ua ia le ‘ai ni areto, ua le inu foi se vai.
13Ona fai atu lea o Tavita ia te ia, O ai ea oe? Mai fea foi oe? Ona fai mai lea o le taulealea, O a‘u le Aikupito, le auauna a le tagata Amaleka; na tuulafoai mai lo‘u alii ia te au, auā na maua a‘u i le ma‘i anapo luā.
14Na matou osofia le itu i toga o tagata Kereti, ma le laueleele o Iuta, ma le itu i toga o Kalepo; na matou faamu foi Sekeleka i le afi.
15Ona fai atu lea o Tavita ia te ia, E te ta‘ita‘i ifo ea ia te au i lena ‘au? Ona fai mai lea o ia, Ina tauto ia i le Atua ia te au, e te le fasioti ia te au, e te le tuuina atu foi a‘u i le lima o lo‘u alii, ona ou ta‘ita‘i ifo lea ia te oe i lena ‘au.
16Ua ia ta‘ita‘i ifo ia te ia, faauta, o loo salalau i latou i le fogāeleele uma, o loo ai, ma feinu, ma sisiva, ona o le vete e tele ua latou aumaia mai le nuu o Filisitia, ma le nuu o Iuta.
17Ona fāsia lea o i latou e Tavita e afua i le segisegi o le taeao ua oo i le afiafi o le tasi aso; ua le sao so latou e toatasi, na o taulelea e toafa galau se tietie i kamela, ma latou sosola.
18Ona maua lea e Tavita mea uma na ave e Amaleka, ma ana avā e toalua ua maua e Tavita.
19Ua leai sa latou mea ua le iloa, o se mea itiiti po o se mea tele, o atalii ma afafine, o vete ma mea uma na ave e i latou, ua toe au mai uma e Tavita.
20Ua ave e Tavita mamoe uma ma povi, ua latou tutuli atu i luma o le tasi lafu, ma ua latou fai ane, O vete nei a Tavita.
21Ua oo atu Tavita i tagata e lua selau se le lavā ona mulimuli atu ia Tavita, sa nonofo i le alia o Pesora; na o mai i latou e faafetaiai ia Tavita, e faafetaiai foi i le nuu sa ia te ia; ua faalatalata atu Tavita i le nuu, ona alofa atu lea o ia ia te i latou.
22Ona fai atu ai lea tagata agaleaga uma ma e ulavavale o le nuu na o ma Tavita, ua faapea, Ona ua le ō i latou ma i tatou, o le mea lea tatou te le avatu ai ia te i latou ni vete na matou fao mai, na ona taitasi ma ta‘ita‘i atu lana avā ma ana fanau, ma ia latou ō.
23A ua fai atu Tavita, O‘u uso e, aua le faapea ona fai i mea ua foai mai e Ieova ia te i tatou; ma na leoleo ia te i tatou, ma tuuina mai i o tatou lima le ‘au na o mai ia te i tatou.
24O ai foi se faalogo ia te outou i lenei mea? Auā e tusa le vaegāoa o le na alu ifo i le taua, ma le vaegāoa o lē na faamuli i oa, e faagatasi lava o latou vaegāoa.
25Na afua mai i lea aso, ua faatuina lenei mea e fai ma tulafono ma masani ia Isaraelu, ua oo i le aso nei.
26Ua oo atu Tavita i Sekeleka, ona avatu ai lea e ia o mea o le vete i toeaina o Iuta o ana uo, ua faapea atu, Faauta, o le mea alofa ia te outou ai le vete na maua i fili o Ieova;
27mo e i Peteli, mo e i Ramota i le itu i toga, mo e i Iatira,
28mo e i Aroeru, mo e i Sefemo, mo e i Esetemoa,
29mo e i Rakala, mo e i aai o sa Ieramaelū, mo e i aai o sa Kenī,
30mo e i Horema, mo e i Koroasa,
31mo e i Ataka, mo e i Heperona, ma mea uma sa fealuai ai Tavita, o ia ma ona tagata.
Who We AreWhat We EelieveWhat We Do
2025 by iamachristian.org,Inc All rights reserved.
