1O oe foi, ia e sauni se pese e aualofa a‘i ona o alii sili o Isaraelu, ma ia faapea atu,
2Po o ai lou tinā? O le leona fafine; na ia taoto faatasi ma leona, na ia tausi ana tama faatasi ma leona taanoa.
3Na ia avatu le tasi o ana tama; ua avea ia ma leona taanoa, ua a‘oa‘o i saei manu, ua ‘ai tagata.
4Ua oo lona logo i nuu ese; na maua o ia i la latou lua, ona latou ave lea ia te ia ma le mama e ta‘i a‘i i le nuu o Aikupito.
5Ua iloa foi e ia ua ia faatalitali a ua faaumatia lona faatuatuaga, ona avea lea e ia o le tasi o ana tama, ua fai ai o ia ma leona taanoa.
6Ona fealualuai lea o ia faatasi ma leona, ua avea ma leona taanoa, ua a‘oa‘o i saei manu, ua ‘ai tagata.
7Na ia iloa o latou maota ua gaogao, na ia faatafunaina foi o latou aai, o le taalili foi o lona tagi na gaogao ai le nuu, ma mea ua tumu ai.
8Ona faasaga lea ia te ia o nuu mai itu malo i itu uma, ua folasia lo latou upega ia te ia; ua maua o ia i la latou lua.
9Ona latou tuu lea ia te ia i le fale puipui ma le mama i lona isu, ua latou ave foi ia te ia i le tupu o Papelonia; na latou ave ia te ia i ‘olo, ina ia le toe logona lava lona leo i mauga o Isaraelu.
10E tusa lou tinā ma le vine e pei o oe, sa totō e lata ane i vai, na fua ia, ua lauolaola ona la, auā o vai ina tele.
11Na ia te ia o laau malolosi e fai ma tootoo o faipule, na maualuga foi lona umi i totonu o la felefele; na tu mai foi o ia i lona maualuga i totonu o la tetele.
12A e peitai na liaiina ia i le ita tele, na lafotuina i le eleele, ua mago lona fua i le matagi mai sasaē, ua gauia ona laau malolosi, ua mamago, ua susunuina i le afi.
13A o ona po nei ua totōina ia i le vao, o le nuu naumati, ua leai se vai.
14Na alu atu foi le afi ai le laau i ona la, ua susunu ai ona fua; o le mea lea e le toe ai se laau malosi ia te ia e fai ma tootoo e pule; o le mea e tagi ai lea, e fai pea foi ma mea e tagi ai.
Who We AreWhat We EelieveWhat We Do
2025 by iamachristian.org,Inc All rights reserved.
