I. TIMOTEO, 1 - Samoan Old Version Bible

O LE MATAUPU I.O le amio e tatau i le faiva o faifeau.

1 O a‘u o Paulo, o le aposetolo a Iesu Keriso, e tusa ma le poloaiga a le Atua lo tatou Faaola, ma le Alii o Iesu Keriso lo tatou faamoemoe;

2o la‘u tusi lenei ia Timoteo lo‘u lava atalii i le faatuatua; ia ia te oe le alofa tunoa, ma le alofa, ma le manuia mai le Atua lo tatou Tamā, atoa ma Keriso Iesu lo tatou Alii.

3Faapei ona ou aioi atu ia te oe, i lo‘u alu atu i Maketonia, e te nofo i Efeso, ia faapea ona e faia, ina ia e vavao atu i nisi, aua foi ne‘i latou a‘oa‘o i upu ese;

4aua ne‘i manatu i latou i tala o le vavau ma tala i gafa e leai ni ona gataaga, o mea ia e tupu ai finauga, a e le o le faamafanafanaga mai le Atua o loo i le faatuatua.

5A o le iuga o le poloaiga, o le alofa lea ai le loto mamā, ma le loto fuatia ifo ua lelei, ma le faatuatua faamaoni;

6ua sese ai nisi i ia mea, ua latou liliu ane i upu le aoga;

7ua mananao i latou e fai ma a‘oa‘o i le tulafono, a ua latou le iloa mea latou te tautalatala i ai, ma mea latou te finau faamalosi i ai.

8Ua tatou iloa lava o le mea lelei le tulafono, pe afai e faia e se tasi o mea e tatau i ai;

9o loo iloa lenei mea, ua le faatuina mai le tulafono mo le ua amiotonu, a o e faaletaupulea ma e soli i tulafono, o e faalematau ma e agasala, o e amio leaga ma e ulavavale, o e fasi tamā ma e fasi tinā, o e fasioti tagata, o e faitaaga, o e faasotoma,

10o e gaoi tagata, o e tala pepelo, o e tauto pepelo; afai foi o i ai se toe mea e faatu‘iese ai i le mataupu e ola ai,

11e tusa ma le tala lelei silisili a le Atua manuia, ua tuuina mai ia te au.

12Ou te faafetai atu foi ia Keriso Iesu lo tatou Alii, o le na faamalosia a‘u, na ia manatu ua faamaoni a‘u, i lona tofia a‘u i lenei faiva;

13o a‘u sa muai taufaifai, ma faasaua, ma faatāutala; a ua alofagia a‘u, auā na ou faia faapea i lo‘u le iloa ma le le talitonu.

14Ua silisili foi ona tele o le alofa tunoa o lo tatou Alii, ua tupu mai ai lo‘u faatuatua atoa ma le alofa o loo ia Keriso Iesu.

15O le upu moni lenei, e tatau lava ona matuā talia, na maliu mai Keriso Iesu i le lalolagi, na te faaolaina o e agasala; ua sili musa a‘u nei ia i latou.

16A o lenei lava le mea na alofaina ai a‘u, ina ia muamua ona faaalia mai ia te au e Iesu Keriso le onosai tele lava, ia avea a‘u ma faata‘ita‘i o e a faatuauta ia te ia amuli, e maua ai le ola e faavavau.

17O lenei, ia i ai i le Tupu o le vavau, o le o soifua pea lava, o le le o vaaia, o le Atua poto e toatasi, ia ia te ia le mamalu atoa ma le viiga e faavavau faavavau lava. Amene.

18Lo‘u atalii e, Timoteo, ou te tuuina atu lenei poloaiga ia te oe, pei o muai valoaga ia te oe, ina ia e tau ai le taua lelei;

19o loo ia te oe le faatuatua ma le loto fuatia ifo e lelei, ua lafoaiina e nisi, o e ua faavaatu‘ia i latou i la le faatuatua;

20e i ai Umenaio ma Alesana, o e ua ou tuuina atu ia Satani, ina ia a‘oa‘oina i laua, aua ne‘i upu leaga.