1Ua fetalai mai foi Ieova ia Mose i le vao o Sinai, i le masina muamua o le tausaga e lua talu ona latou o mai mai le nuu o Aikupito, ua faapea mai,
2Ia faia e le fanauga a Isaraelu le paseka i ona po ua tuupoina ai.
3O le aso e sefulu ma le fa o lenei masina i le afiafi tou te fai ai i ona po ua tuupoina ai; tou te fai ai e tusa ma ana tulafono uma ma ana tu uma.
4Ona fai atu ai lea o Mose i le fanauga a Isaraelu ia latou faia le paseka.
5Ona latou faia lea o le paseka i le aso e sefulu ma le fa o le masina muamua i le afiafi i le vao o Sinai; e tusa ma mea uma na poloai mai ai Ieova ia Mose, e faapea lava ona faia e le fanauga a Isaraelu.
6Na i ai foi nisi tagata sa leaga i le tino o le tagata oti, ua latou le mafai ai ona fai o le paseka i lea aso; ona latou o mai ai lea i luma o Mose ma luma o Arona i lea aso;
7ona fai mai ai lea o ia tagata ia te ia, Ua leaga i matou i le tino o le tagata oti; se a le mea ua taofia ai i matou ia matou le faia le taulaga ia Ieova i ona po ua tuupoina ai faatasi ma le fanauga a Isaraelu?
8Ona fai atu ai lea o Mose ia te i latou, Ina faatali ia se‘i ou iloa le mea e fetalai mai ai Ieova ia te outou.
9Ona fetalai mai ai lea o Ieova ia Mose, ua faapea mai,
10Ia e fai atu i le fanauga a Isaraelu, ia faapea atu, Ai se tasi e ia te outou po o a outou tupulaga amuli e leaga i le tagata oti, po o se tagata e mamao i se malaga, e fai pea e ia le paseka ia Ieova.
11O le masina e lua i lona aso e tasi le sefulu ma le fa i le afiafi latou te fai ai, latou te aai ai ma areto e le faafefeteina ma laau oona.
12Aua ne‘i latou faatoe se mea e oo i le taeao, aua foi ne‘i latou gagau sona ivi; e tusa ma tulafono uma i le paseka ia latou faia.
13A o le tagata o loo mamā, ua le alu foi o ia i se malaga, a ua na le faia le paseka, e vavaeeseina lea tagata i lona nuu; auā e lei aumaia e ia le taulaga ia Ieova i ona po ua tuupoina ai; e nofo sala lea tagata.
14Afai foi e āumau ia te outou se tagata ese, a e fia fai e ia le paseka ia Ieova, e faia lava e ia e tusa ma le tulafono o le paseka, e tusa foi ma ona tu; e tasi lava le tulafono ia te outou, e oo i le tagata ese atoa ma le tagata lava o le nuu.
15O le aso na faatuina ai le malumalu na ufitia le malumalu e le ao, o le fale fetafai lea ua i ai le tulafono; o le afiafi foi sa i luga o le malumalu o le mea ua tino mai peiseai o le afi, ua oo i le taeao.
16Sa faapea lava pea; o le ao na ufitia ai ina o ao, ma le mea ua tino mai peiseai o le afi ina o po.
17A siitia foi le ao ai luga o le fale fetafai, e mulimuli ane ona ō lea o le malaga a le fanauga a Isaraelu; o le mea foi e nofo ai le ao o le mea lava lea e to lauapi ai le fanauga a Isaraelu.
18O le afioga lava a Ieova na o malaga ai le fanauga a Isaraelu, o le afioga foi a Ieova ua latou to lauapi ai; o aso uma ua nofo ai le ao i luga o le malumalu ua latou nonofo pea ai i lo latou toagālauapi.
19A tele aso o i ai pea le ao i luga o le malumalu, ona tausi ai lea e le fanauga a Isaraelu le sauniga a Ieova, ua latou le o malaga lava.
20Na faapea foi, a itiiti nai po ua i ai le ao i luga o le malumalu; o le afioga lava a Ieova ua latou to lauapi ai, o le afioga foi a Ieova ua latou o malaga ai.
21Na faapea foi, a o i ai le ao e afua mai i le afiafi e oo i le taeao, ma ua siitia le ao i le taeao, ona latou o malaga ai lea; po o le ao po o le po ua siitia ai le ao, ona o malaga ai lea o i latou.
22Afai foi o po e lua, po o se masina atoa, po o se tausaga o i ai pea le ao i luga o le malumalu, ma nofo ai i ona luga, ua nonofo ai pea i le toagālauapi le fanauga a Isaraelu, ua latou le o malaga lava; a e afai ua siitia ia, ona latou o malaga ai lea.
23O le afioga a Ieova ua latou to lauapi ai, o le afioga foi a Ieova ua latou o malaga ai; na latou tausia le sauniga a Ieova e tusa ma le afioga a Ieova ia Mose.
Who We AreWhat We EelieveWhat We Do
2025 by iamachristian.org,Inc All rights reserved.
