1Ieova e, ia e faafofoga mai i le amiotonu, ia e liliu mai i la‘u alaga; ia e faafofoga mai i la‘u tatalo e le faia i laugutu ‘ole‘ole.
2Ia oo mai lo‘u faamasinoga mai ou luma; ia silasila mai ou fofoga i le amio sa‘o.
3Ua uma ona e tofotofoina lo‘u loto; ua e asiasia mai i le po; ua uma ona e suesue mai ia te au, a ua leai se mea na e maua; o lo‘u manatu e le agasala lo‘u gutu.
4A o mea e faia e tagata, o afioga mai lou fofoga na ou tausia ai a‘u ne‘i ui i ala o le ua saua.
5Ia e taofi ae lo‘u savali i ou ala, ina ne‘i le mau o‘u vae.
6Le Atua e, ou te valaau atu ia te oe; auā e te faafofoga mai ia te au; ia e liliu mai ou fofoga ia te au, ia e faafofoga mai i a‘u upu.
7Ia iloga mai lou alofa, o oe le faaola o e faatuatua ia te oe i e tautetee i lou aao taumatau.
8Ia e leoleo mai ia te au e pei o le tamatamai mata; ia e natia a‘u i le paolo o ou apaau,
9i luma o e amio leaga, o e faasaua mai ia te au, o e ita mai ia te au, o e siosio ia te au ia a‘u oti.
10Ua puputa lava o latou tino; o loo tautalatala faasausili o latou gutu.
11O lenei, ua latou siosiomia i matou o matou o savavali; ua vaai o latou mata ua punou ifo i le eleele.
12E tusa ma le leona ua naunau i le fia saei o manu, po ua faapei o le leona taanoa ua nofo i mea lilo.
13Ieova e, ia e tulai mai; ia e muamua atu ia te ia, ia e lafo ia te ia i lalo; ia e laveai mai ia te au i lau pelu ai tagata amio leaga;
14Ieova e ia e laveai mai ia te au i lou aao ai tagata o tagata o le lalolagi, ua i le ola nei lo latou tofi, ua e faamaoonaina i latou i au mea lelei; ua malilie i latou i fanau; o a latou mea foi o totoe ua tuu lava ia mā o latou tama iti.
15A o a‘u, ou te vaavaai i ou fofoga i le amiotonu; ou te mălie pe a a‘u ala ua foliga ia te oe.
Who We AreWhat We EelieveWhat We Do
2025 by iamachristian.org,Inc All rights reserved.
