1O le masina e sefulu ma le lua, o le masina lea o Atara, o lona aso e sefulu ma le tolu, a oo ina taunuu ai le poloaiga a le tupu ma lana tulafono, o le aso na faamoemoe ai o e na ita i sa Iutā latou te manumalo ai ia te i latou, (a ua liua, ma ua manumalo ai sa Iutā i e na ‘ino‘ino ia te i latou;)
2na potopoto ai sa Iutā i a latou aai i itu malo uma o le tupu o Asueru, e faaoo o latou lima i e na saili e agaleaga ia te i latou; a e lei tu mai se tasi i o latou luma; auā ua matatau tagata uma ia te i latou.
3Ua fesoasoani foi i sa Iutā o alii uma o itu malo, ma alii sili, ma e pule i nuu, ma e na faia feau a le tupu; auā ua matatau i latou ia Moretekai;
4auā ua sili Moretekai i le aiga o le tupu, ua oo foi lona logo i itu malo uma; auā ua alualu ona sili o lenei tagata o Moretekai.
5Ua fasia foi e sa Iutā o e na ita uma ia te i latou i le fasiga i le pelu, ma ua fasioti, ua fano; ua latou faia la latou faitalia i e na ‘ino‘ino ia te i latou.
6Ua fasiotia foi, ma faaumatia e sa Iutā i Susana le maota o tagata e lima selau,
7atoa foi ma Paresaneta, ma Tafono, ma Asefata,
8ma Porata, ma Ataleia, ma Aritatu, ma Paremaseta,
9ma Arisai, ma Arita, ma Vaisato.
10O atalii ia e toasefulu o Hamanu le atalii o Hametatu, o le na faasaua i sa Iutā na fasiotia i latou; a e lei vetea e i latou le oloa.
11O lena aso na avatua ai i le tupu le faitau aofai o e na fasiotia i Susana le maota.
12Ona fai atu lea o le tupu i le masiofo o Eseta, Ua fasiotia, ma faaumatia e sa Iutā i Susana le maota o tagata e lima selau, atoa ma atalii o Hamanu e toasefulu; se a se mea ua latou faia i isi itumalo uma o le tupu? O lenei, se a se mea e te toe ole mai ai? E avatua ia te oe; se a foi se mea e te toe faatoga mai i ai? E faia lava.
13Ona tali mai lea o Eseta, Afai a lelei i le tupu, ia tuuina foi taeao i sa Iutā o e i Susuna ona ia faia e pei o le tulafono i le asō, ma ia latou faatautauina i le laau atalii o Hamanu e toatinoagafulu.
14Ona fai atu lea o le tupu, Ia faia faapea. Ona tala‘iina lea o le tulafono i Susana. Ona faatautauina lea e i latou atalii o Hamanu e toatinoagafulu.
15Ua potopoto foi sa Iutā e na i Susana i le aso e sefulu ma le fa o le masina o Atara, ona latou fasiotia lea i Susana o tagata e tolu selau; a e lei vetea e i latou le oloa.
16O sa Iutā uma foi e na i ai i itu malo o le tupu, na potopoto i latou e tetee atu ia ola ai i latou, ona mapu ai lea o i latou i e na ita ia te i latou; na latou fasiotia foi e na ‘ino‘ino ia te i latou e fitu sefulu o afe ma afe e lima a e lei vetea e i latou le oloa,
17o le aso e sefulu ma le tolu o le masina o Atara na fasia ai; ona mapu ai lea o i latou i lona aso e sefulu ma le fa, ma fai ai lena ma aso e fai ai le tausamiga, ma olioli ai.
18O lona aso e sefulu ma le tolu, ma lona aso e sefulu ma le fa na potopoto ai sa Iutā e na i Susana; ona mapu ai lea o i latou i lona aso e sefulu ma le lima, ma ua fai lena ma aso e fai ai le tausamiga, ma olioli ai.
19O le mea lea na fai ai e sa Iutā sa i faoa aai, e na nonofo i aai e le nofo ‘olo, o le aso e sefulu ma le fa o le masina o Atara ma aso lelei e olioli ai, ma fai ai le tausamiga, ma feaveai ai tufaaga.
20Na tusia foi e Moretekai o ia mea, na ia avatua foi tusi i sa Iutā uma e na i ai i itu malo uma o le tupu o Asueru, o e na latalata mai atoa ma e mamao atu,
21e faamau ai ia te i latou, ona ia faia le aso e sefulu ma le fa o le masina o Atara, ma lona aso e sefulu ma le lima i tausaga uma,
22auā o aso ia na mapu ai sa Iutā i e na ita ia te i latou, o le masina foi na liliuina ai mo i latou o le faanoanoa i le olioli, ma le faavauvau i le aso lelei; ona ia faia ia aso ma aso e fai ai le tausamiga, ma olioli ai, ma feaveai ai tufaaga, ma mea alofa i e matitiva.
23Ona talia lea e sa Iutā e fai ma tu o mea na latou amata ona faia, ma mea na tusi atu ai e Moretekai ia te i latou;
24auā o Hamanu le atalii o Hametatu o lo sa Akakō, o le na faasaua i sa Iutā uma, na ia manatu i sa Iutā ona ia fano i latou. Na ia fai foi le Puro, o le vili lea, ina ia faaumatia i latou, ma ia fano i latou.
25A ua alu atu Eseta i le tupu, ona poloai atu ai lea e ia i lana tusi ia toe foi atu i lona lava ulu lana manatu leaga na ia manatu ai i sa Iutā, ma ia faatautauina o ia ma ona atalii i le laau.
26O le mea lea na ta‘ua ai o ia aso o Puro, i le igoa o le Puro. O mea uma foi o le tusi, ma mea na latou vaavaaia i lenei mea, ma mea na oo ia te i latou,
27na faamauina ai e sa Iutā, ma talia ai mo i latou ma a latou fanau, ma e ua faatasia ma i latou, ia le toe mavae ona faia o ia lava aso e lua e tusa ma a latou tusi, i ona lava po, i tausaga uma;
28ma ia manatua ma faia o ia lava aso i tupulaga uma, i lea aiga ma lea aiga, i lea itu malo ma lea itu malo, i lea aai ma lea aai; aua foi le toe mavae i sa Iutā o ia lava aso o Puro, ma ia le tuua le faamanatunatu i ai i la latou fanau.
29O le masiofo o Eseta, le afafine o Aviaila, ma Moretekai o lo sa Iutā, na la tusi atu ma le pule lava e faamauina ai lenei lua o tusi i Puro.
30Ua ia avatua foi tusi i sa Iutā uma i itu malo e tasi le selau e lua sefulu ma le fitu o le malo o Asueru, o upu alofa ma le faamaoni,
31ina ia faamauina o ia aso o Puro i ona lava po, e pei ona pule e Moretekai o lo sa Iutā ma le masiofo o Eseta ia te i latou, e pei ona latou faatuina foi mo i latou ma a latou fanau, o mea o anapogi ma lo latou alalaga.
32O le poloaiga a Eseta na faamauina ai o ia mea o Puro; na tusia ai foi i le tusi.
Who We AreWhat We EelieveWhat We Do
2025 by iamachristian.org,Inc All rights reserved.
