FAATAOTO, 1 - Samoan Old Version Bible

O LE MATAUPU I.O le aoga o faataoto. Ia ‘alo ese i e fai mea leaga.

1O faataoto a Solomona le atalii o Tavita, le tupu o Isaraelu;

2ina ia iloa ai le poto ma ia a‘oa‘oina; ia lagona ai upu e atamai ai;

3ia maua ai le a‘oa‘oina i le poto, ma le amiotonu, ma le faamasinoga, ma le amio sa‘o;

4ia avatu ai le faautauta i e faigofie; o le poto ma le mafaufau i le taulealea.

5E faalogo mai le tagata poto, e tupu ai pea lona poto; o le ua mafaufau foi e maua e ia le poto e pule ai;

6e lagona ai le faataoto ma lona faamatalaga; o upu a e popoto ma a latou upu lilo.

7O le mata‘u ia Ieova, o le amataga lea o le poto; a e ‘ino‘ino tagata valelea i le poto ma le a‘oa‘oina.

8Lo‘u atalii e, faalogo mai ia i le a‘oa‘o atu a lou tamā; aua foi e te tuulafoaiina le upu a lou tinā;

9auā e fai ia mea ma pale matagofie i lou ulu, ma mea e asoa i lou ua.

10Lo‘u atalii e, afai e faaoleole ia te oe tagata agasala, aua ne‘i e usiusitai i ai;

11afai latou te fai mai, Tatou o; tatou te lamalama i le toto, ia tatou talialaina le ua fai fua lana amio lelei;

12tatou te foloolaina i latou, e pei o le tuugamau; ia atoatoa lava e pei o e o ifo i le lua.

13Tatou te maua ai oloa tāua uma lava; tatou te faatutumu o tatou fale i le vete;

14tatou te fai faatasi la tatou vili; ia tasi se taga tupe ia te i tatou uma.

15Lo‘u atalii e, aua tou te o i le ala faatasi ma i latou; taofi ia ou vae ne‘i ui i lo latou ala;

16Auā ua taufetuli o latou vae i le leaga, ma faataalise e sasaa ai le toto.

17Auā e vae fua le upega a ua iloa e le manu lele.

18A o i latou ua lamalama i latou i o latou lava toto; ua latou talialaina i latou ia i latou lava ia oti.

19E faapena ala o i latou uma o e matapeapea i le oloa; e aveeseina ai le ola o e ua i ai.

20O loo alaga le poto i fafo; ua leo tele i malae.

21Ua valaau o ia i le mea e sili ona taalili ai o tagata, o faitotoa o le aai; ua fai atu ana upu i le aai;

22o outou e faigofie, tou te loto i le amio faigofie seia afea? ma e tauemu, latou te fiafia i le tauemuga seia afea? ma e valelea, latou te ‘ino‘ino i le poto seia afea?

23Liliu mai ia i la‘u aoaiga; faauta, ou te liligi atu lo‘u Agaga ia te outou; ou te faailoa atu a‘u upu ia te outou.

24Na ou valaau, a e lei mafafai outou; na ou faaloaloa lo‘u lima, a e leai se na faalogo mai;

25na outou teena la‘u pule uma lava, ma outou le mafafai i la‘u aoaiga;

26o le mea lea, ou te ‘ata ai a‘u i lo outou malaia; ou te tauemu pe a oo mai lo outou fefe;

27pe a oo mai lo outou fefe pei se asiosio; pe a oo mai ia te outou le puapuaga ma le atuatuvale.

28Ona latou valaau mai ai lea ia te au, a o a‘u, ou te le tali atu ai; latou te sailiili mai ia te au, a e latou te le maua a‘u.

29Na latou ‘ino‘ino i le poto; ua latou le manao foi i le mata‘u ia Ieova;

30na latou le mafafai i la‘u pule; ua latou ‘ino‘ino i la‘u aoaiga uma lava;

31o le mea lava lea latou te aai ai i le fua o a latou amio; e maoona foi i latou i a latou togafiti.

32Auā o le liliu ese o e faigofie e fasiotia ai i latou; o le nofo faatalanoa o e valelea e fano ai i latou.

33A o lē faalogo mai ia te au, e nofo o ia ma le fifilemu; e filemu o ia, e le fefe i se mea leaga.