I. NOFOAIGA A TUPU, 21 - Samoan Old Version Bible

O LE MATAUPU XXI.O le faitauina o Isaraelu e Tavita, ma le malaia na oo mai ai.

1Ua tulai mai Satani ia Isaraelu, ua ia faaoso ia Tavita ia faitauina Isaraelu.

2Ona fai atu lea o Tavita ia Ioapo ma alii o le nuu, Ina o ia, ina faitau Isaraelu e afua i Peresepa e oo atu i Tanu, ma au mai ia te au le faitau aofai o i latou ia ou iloa.

3Ua fai mai Ioapo, Ia faaopoopoina e Ieova i lona nuu e tusa ma i latou ia taisāutuaselau; lo‘u alii e, le tupu, e le o auauna ea i latou uma a lo‘u alii? Se a le mea ua finagalo ai lo‘u alii i lenei mea? Se a le mea e avea ai o ia ma mea e nofo sala ai Isaraelu?

4A ua tuu faiaina Ioapo i le fetalaiga a le tupu; ona alu atu lea o Ioapo, ua fealuai solo i Isaraelu uma, ona toe foi mai ai lea i Ierusalema.

5Ua avatua e Ioapo le faitau aofai o tagata ia Tavita. O Isaraelu uma e afe o afe ma le selau o afe o tagata e fai pelu. O Iuta foi e fa selau o afe ma afe e fitu sefulu o tagata e fai pelu.

6A ua ia le faitauina faatasi ma i latou o Levi ma Peniamina, auā ua inosia e Ioapo le poloaiga a le tupu.

7Ua leaga lenei mea i le silafaga a le Atua; ona fasia ai lea e ia o Isaraelu.

8Ona fai atu lea o Tavita i le Atua, Ua ou agasala tele, ina ua ou faia lenei mea; a o lenei, ou te aioi atu ia te oe, ia faamagaloina le agasala a lau auauna, auā ua ou faavalea lava.

9Ua fetalai mai Ieova ia Kato le tagata vaai a Tavita, ua faapea mai,

10Ina alu ia ma fai atu ia Tavita, ia faapea atu, O loo faapea ona fetalai mai o Ieova, O mea e tolu ou te tuuina atu ai ia te oe, filifili ia oe i se mea e tasi o ia mea, ina ia ou faia ia te oe.

11Ona alu atu ai lea o Kato ia Tavita, ma ua faapea atu ia te ia, O loo faapea ona fetalai mai o Ieova,

12Filifili ia oe, po o se oge e tolu ona tausaga; po o masina e tolu e faaumatia ai oe i luma o e ita mai, ma oo atu ai ia te oe le pelu a ē o fai oe mo latou fili; po o aso e tolu o le pelu a Ieova, o le faamai i le nuu, ma le agelu a Ieova e faauma ai i nuu uma o Isaraelu. O lenei, se‘i e silafia se upu ou te foi ma a‘u i le na auina mai a‘u.

13Ona fai atu ai lea o Tavita ia Kato, Ua tele lava lo‘u fememeai; o lenei, ia paū atu a‘u i le aao oo Ieova, auā ua matuā tele lona alofa mutimuti vale, a e aua le paū a‘u i lima o tagata.

14Ona tuu mai lea e Ieova o le faamai ia Isaraelu, ua oti ai tagata o Isaraelu e fitu sefulu o afe.

15Ua auina mai foi e le Atua o le agelu i Ierusalema e faaumatia ai, ua silasila mai Ieova a o faaumatia e ia o tagata, ona ia salamo ai lea ona o le malaia, ma ua fetalai atu i le agelu o le faauma ai, Ina soia, taofi ia o lou lima. Ua tu ai le agelu a Ieova i le mea e soli ai saito a Aruna le sa Iepusē.

16Ua tepa ae Tavita ua iloa atu le agelu a Ieova o loo tu i le va o le lalolagi ma le lagi, ua i ai i lona lima lana pelu ua se‘i, ua faaloaloa i luga o Ierusalema. Ona faapau fao ai lea o Tavita ma toeaina, ua oofu i le ie talatala.

17Ona fai atu lea o Tavita, i le Atua, E le o a‘u ea na fai atu ia faitauina le nuu? O a‘u lava ua ou agasala, ma agaleaga lava a o nei mamoe, se a ea se mea ua latou faia? Ieova e, lo‘u Atua, ou te aioi atu ia te oe, ia oo lou aao ia te au, ma le aiga o lo‘u tamā; a e aua le oo i lou nuu e taia i latou.

18Ona fai atu lea o le agelu a Ieova ia Kato, e fai atu ia Tavita, ia alu ae Tavita e fai se fata faitaulaga ia Ieova i le mea e soli ai saito a Aruna le sa Iepusē.

19Ona alu ae ai lea o Tavita e tusa ma le upu a Kato, na ia fai mai ai i le suafa o Ieova.

20Ua fāliu i tua Aruna, ua na iloa le agelu; ona lalafi ai lea o ia ma ona atalii e toafa. Sa soli saito Aruna.

21Ua alu atu Tavita ia Aruna. Ua vaavaai atu Aruna ua iloa Tavita, ona sau ai lea o ia ai le mea e soli ai saito, ma ua ifo toele o ia ia Tavita.

22Ona fai atu lea o Tavita ia Aruna, Tuu mai ia ia te au le mea e soli ai saito, ina ia ou fai ai le fata faitaulaga ia Ieova; ia e tuu mai ia ia te au a e taui atu tupe la te tatau, ina ia taofia le faamai ai le nuu.

23Ona tali mai ai lea o Aruna ia Tavita, Ia ave ma oe, ma ia faia e lo‘u alii le tupu le mea ua ia finagalo i ai. Faauta, ou te foai ia te oe o povi e fai ma taulaga mu, ma mea e soli a‘i saito e fai ma fafie, ma le saito e fai ma taulaga i mea e ‘ai; ou te foai uma atu ai.

24Ona fai atu lea o le tupu o Tavita ia Aruna, Aua, a ou te faatau ai lava i tupe la te tatau; auā ou te le ave au mea ia Ieova, ou te le osi taulaga mu i mea e maua fua.

25Ona avatu ai lea e Tavita ia Aruna mo lea mea o sekeli auro e ono selau ua fuatia.

26Ona faia lea e Tavita i lea mea o le fata faitaulaga ia Ieova, ma ia osia taulaga mu, ma taulaga faafetai, ma valaau atu ia Ieova; ona tali ma ai lea o ia ia te ia i le afi mai le lagi i luga o le fata faitaulaga mu.

27Ona fetalai ane lea o Ieova i le agelu; ona ia sulu ai lea o lana pelu i lona faamoega.

28Ua iloa e Tavita i lea aso ua faafofoga mai Ieova ia te ia i le mea e soli ai saito a Aruna le sa Iepusē, ona faitaulaga ai lea o ia i lea mea.

29Auā o le malumalu o Ieova na faia e Mose i le vao, ma le fata faitaulaga o le taulaga mu, ua i ai i ia ona po i le mea maualuga i Kipeona.

30A ua le mafai Tavita ona alu atu i ai e fesili atu i le Atua; auā ua mata‘u o ia ona o le pelu a le agelu a Ieova.