1Faauta foi, ua sau le tagata o le Atua, i le afioga a Ieova, mai Iuta i Peteli; o loo tu mai foi Ierepoamo i tafatafa o le fata faitaulaga e faamu ai mea manogi.
2Ona alaga atu lea o ia i le fata faitaulaga i le afioga a Ieova, ua ia faapea atu, Le fata faitaulaga e, le fata faitaulaga e, o loo faapea ona fetalai mai o Ieova, Faauta o le a fanau mai le tama i le aiga o Tavita, e igoa ia Iosia, na te fai taulaga i luga ia te oe i le au faitaulaga o mea maualuluga, o e faamu mea manogi i luga ia te oe, e susunuina foi ivi o tagata i luga ia te oe.
3Ona avane lea e ia o le faailoga i lea lava aso, ua faapea atu, O le faailoga lenei ua fetalai mai ai Ieova; faauta, e māvae le fata faitaulaga, e masaa ai foi le lefulefu o loo i ona luga.
4Ua faalogo le tupu i le upu a le tagata o le Atua, ua ia alaga atu ai i le fata faitaulaga i Peteli, ona aapa atu lea e Ierepoamo o lona lima nai le fata faitaulaga, ua faapea atu, Ina pue ia ia te ia; ona gase lea o lona lima na ia aapa atu ia te ia, ua le toe mafai ona faafoi ai ia te ia.
5Ua māvae foi le fata faitaulaga, ua masaa foi le lefulefu na i le fata faitaulaga, e tusa ma le faailoga na avane e le tagata o le Atua i le afioga a Ieova.
6Ona fai atu lea o le tupu, ua faapea atu i le tagata o le Atua, Ia e aioi atu i luma o Ieova lou Atua, ma e tatalo atu mo a‘u, ina ia toe lelei lo‘u lima. Ona aioi atu ai lea o le tagata o le Atua i luma o Ieova, ona toe lelei lea o le lima o le tupu, ua pei o anamua.
7Ona fai atu lea o le tupu i le tagata o le Atua, Se‘i ta o ma a‘u i lo‘u fale, e te malolo ai, ou te avatu foi ia te oe se mea alofa.
8Ona fai mai lea o le tagata o le Atua i le tupu, Afai e te foai mai ia te au le vaeluagalemu o mea o i lou fale, ta te le o faatasi ma oe; ou te le ‘ai ni mea e ‘ai, ou te le inu vai foi i lenei mea.
9Auā na faapea ona fetalai mai ai ia te au o le afioga a Ieova, na faapea mai, Aua e te ‘ai i mea e ‘ai, aua ne‘i e inu foi i le vai, aua foi le toe foi mai i le ala e te alu atu ai.
10Ona alu atu lea o ia i le tasi ala, ua le foi atu o ia i le ala na ia alu atu ai i Peteli.
11Sa nofo i Peteli le tasi perofeta ua toeaina; na o atu ona atalii, ma talatala atu ia te ia i mea uma na faia e le tagata o le Atua i lena aso i Peteli; o upu foi na ia fai atu ai i le tupu ua latou talatala atu ai i lo latou tamā.
12Ona fai atu lea o lo latou tamā ia te i latou, O le fea ala na alu atu ai o ia? Auā na iloa e ona atalii le ala na alu atu ai le tagata o le Atua, o le na sau mai Iuta.
13Ua ia fai atu foi i ona atalii, Ina faanofoa ia le asini mo a‘u; ona latou faanofoa ai lea o le asini mo ia; ona tietie ai lea o ia.
14Ona mulimuli atu lea o ia i le tagata o le Atua, na ia maua atu ia te ia o nofo i lalo o le tapeneto; ona fai atu lea o ia ia te ia, O oe ea le tagata o le Atua na sau mai Iuta? Ona tali mai lea o ia, O a‘u lenei.
15Ona fai atu lea o ia ia te ia, Ta te o ma a‘u i lo‘u fale, se‘i e tausami sina mea.
16Ona fai mai lea o ia, Ou te le mafai ona ta toe foi atu ma oe, ma te ulufale atu ma oe, ou te le ‘ai i mea e ai, ou te le inu foi i le vai faatasi ma oe i lenei mea;
17auā na fetalai mai ia te au i le afioga a Ieova, Aua e te ‘ai i mea e ‘ai, pe inu vai i lea mea; aua foi e te liliu mai ma toe foi mai i le ala e te alu atu ai.
18Ona fai atu lea o ia ia te ia, O a‘u foi o le perofeta e pei o oe; ua fai mai foi le agelu ia te au i le afioga a Ieova, ua faapea mai, Ina e toe faafoi mai ia ia te ia faatasi ma oe i lou fale, ina ia ‘ai o ia i mea e ‘ai, ma inu i le vai. A ua tala pepelo o ia ia te ia.
19Ona la toe foi atu lea ma ia, ua ia ‘ai foi i mea e ‘ai i lona fale, ma inu vai.
20Ua oo mai le afioga a Ieova i le perofeta na toe faafoi atu ia te ia, a o la nonofo i le laulau.
21Ona alaga atu lea o ia i le tagata o le Atua na sau mai Iuta, ua faapea atu, O loo faapea ona fetalai mai o Ieova, Ua e fouvale i le afioga a Ieova, ua e le tausi foi i le poloaiga na fetalai mai ai Ieova lou Atua ia te oe,
22A ua e too foi mai, ma e ‘ai i mea e ‘ai, ma e inu vai i le mea na fetalai mai ai Ieova ia te oe, aua e te ‘ai ai i mea e ‘ai, pe inu vai, o le mea lea e le oo ai lou tino i le tuugamau o ou tamā.
23Ua uma ona ia ‘ai i mea e ‘ai ua uma foi ona ia inu, ona faanofoa lea e ia o le asini mo ia, mo le perofeta o le na ia toe faafoi mai.
24Ua alu ia, ona maua lea o ia e le leona i le ala, ua oti o ia ia te ia; ua lafo ifo foi lona tino i le ala, ua tu le asini e latalata i ai, ua tu foi le leona e latalata i le tino.
25Faauta foi i tagata ua o ane, ua latou iloa le tino ua lafo ifo i le ala, ma le leona ua tu mai e latalata i le tino; ona latou o ai lea, ma talatala atu ai i le aai sa nofo ai le perofeta toeaina.
26Ua faalogo i ai le perofeta o le na toe faafoi atu ia te ia i le ala, ona faapea ane lea o ia, O le tagata o le Atua lea, o le na fouvale i le afioga a Ieova; o le mea lea ua tuuina atu ai o ia e Ieova i le leona, ua saei ia te ia, ua oti ai o ia, e tusa ma le afioga a Ieova na ia fetalai mai ai ia te ia.
27Ona fai atu lea o ia i ona atalii, ua faapea atu, Ina faanofoa ia le asini mo a‘u. Ona latou faanofoaina lea.
28Ua alu o ia, ona maua lea e ia o lona tino ua lafo ifo i le ala, ma le asini ma le leona o loo tutū e latalata ane i le tino; ua le ‘aina e le leona o le tino, ua le saeia foi e ia le asini.
29Ona avae lea e le perofeta o le tino o le tagata o le Atua, ma faaee ai i luga o le asini, ma toe avatu ai; ona alu atu lea o le perofeta toeaina i le aai e tagitu‘i ma tanu ia te ia.
30Ua ia tuuina lona tino i lona lava tuugamau; ona latou taufaitagitu‘i lea ia te ia, ua faapea, Aue lo‘u uso e!
31Ua uma ona tanu ia te ia, ona fai atu lea o ia i ona atalii, ua faapea atu, Pe a ou oti, ia outou tanu ia te au i le tuugamau ua tanumia ai le tagata o le Atua, ia tuu o‘u ivi i tafatafa o ona ivi;
32auā e taunuu lava le upu na ia valaau atu ai i le afioga a Ieova i le fata faitaulaga o loo i Peteli, ma fale uma o mea maualuluga o loo i ai i aai o Samaria.
33Ua mavae lenei mea, ua le liliu ese Ierepoamo i lona ala leaga, a ua toe faia e ia o tagata mai le nuu uma ma faitaulaga o mea maualuluga; ai se manao i ai ua ia tofia o ia, ona avea lea o ia ma faitaulaga o mea maualuluga.
34Na avea lenei mea ma agasala i le aiga o Ierepoamo, ia vavaeeseina ma faaumatia i le fogāeleele.
Who We AreWhat We EelieveWhat We Do
2025 by iamachristian.org,Inc All rights reserved.
