1Ua latalata ona po e oti ai Tavita; ona fai ai lea o mavaega ma lona atalii o Solomona, ua faapea atu,
2O le a ou alu i le ala o le lalolagi uma; ia e faamalosi, ma ia e faatamatane;
3ia e tausia foi sauniga a Ieova lou Atua, ina ia e savali i ona ala, ia tausi i ana sauniga, ma ana poloaiga, ma ana faamasinoga, ma ana tulafono e pei ona tusia i le tulafono a Mose, ina ia manuia oe i mea uma e te faia, ma mea uma e te faasagasaga i ai;
4ina ia faatumauina e Ieova lana afioga na ia fetalai mai ai ia te au, ua faapea mai, Pe afai e tausia e au fanau lo latou ala, ia savavali i o‘u luma ma le faamaoni, ma o latou loto atoa, ma lo latou manatu atoa, ua faapea mai o ia, ona le motu lea o lou gafa i le nofoālii o Isaraelu.
5Ua e iloa foi le mea na faia e Ioapo le tama a Seruia ia te au, o le mea na ia faia ia i laua o e na pule i ‘au a Isaraelu o Apineru le atalii o Neru ma Amase le atalii o Ietero, na ia fasia, ua ia faamaligiina o la toto faatagataotaua ina o leai se taua; ua ia tuu foi le toto o e na fasi faatagataotaua i lona fusi sa i lona sulugatiti, ma ona see sa i ona vae.
6Ia e faia foi e tusa ma lou poto, a e aua ne‘i alu ifo lona ulu sinā ma le filemu i le tuugamau.
7A ia e agalelei i atalii o Pasili o le Kiliata, ia i ai latou faatasi ma e o aai i lau laoai; auā na faapea ona latou o mai ia te au, ina o sola ese a‘u ia Apisaloma lou uso.
8Faauta mai foi, o loo ia te oe Semi le atalii o Kira o lo sa Peniaminā, mai Pauri, o le na fetuu ia te au i le fetuu leaga lava i le aso na ou alu atu ai i Maanaima; a ua alu ifo o ia e faafetaiai ia te au i Ioritana, ona ou tauto lea ia te ia ia Ieova, ua faapea atu, Ou te le fasioti ia te oe i le pelu.
9O lenei, aua e te faasaoina o ia; auā o oe o le tagata poto, ua e iloa foi le mea e tatau ona e fai ia te ia; a ia e faaoo lona ulusinā ma le toto i le tuugamau.
10Ua taoto foi Tavita faatasi ma ona tamā; ona tanumia lea o ia i le aai a Tavita.
11O aso foi na fai ai Tavita ma tupu o Isaraelu e fagafulu o tausaga ia; e fitu tausaga na fai ai o ia ma tupu i Heperona; o tausaga e tolu sefulu ma le tolu na fai ai o ia ma tupu i Ierusalema.
12Ona tietie ai lea o Solomona i le nofoālii o lona tamā o Tavita; ua matuā faatumauina foi lona malo.
13Ua alu atu Atonia le tama tane a Akita ia Patesepa le tinā o Solomona; ona fai mai lea o ia ia te ia, Po ua e sau ea ma le filemu? Ona tali atu lea o ia, Ua filemu lava.
14Ua fai atu foi o ia, O la‘u feau ia te oe. Ona fai mai ai lea o ia, Ina fai mai ia.
15Ona faapea atu lea o ia, Ua e iloa sa ia te au le nofoaiga, na faasagasaga mai foi Isaraelu uma ia te au ia fai a‘u ma tupu; a ua liua le nofoaiga, ua avea ma lo‘u uso, auā ua fai ai mona mai ia Ieova.
16O lenei, ou te faatoga atu ia te oe i le mea e tasi, aua ne‘i ‘alo ou fofoga ia te au. Ona fai mai ai lea o ia ia te ia, Ina fai mai ia.
17Ona fai atu lea o ia, Se‘i e fai atu i le tupu o Solomona, (auā na te le ‘alo ona fofoga ia te oe,) na te au mai ia te au o Apiseka o le Sunema e fai ma‘u avā.
18Ona fai mai lea o Patesepa, Ua lelei, ou te fai atu ai lava i le tupu ona o oe.
19Ona alu atu lea o Patesepa i le tupu o Solomona e tautala atu ia te ia ona o Atonia. Ona tulai mai lea o le tupu e faafetaiai ia te ia, ma ua ifo mai i ai; ona tietie lea o ia i lona nofoālii, ua fai ane foi o ia e au mai se nofoa mo le tinā o le tupu; ona tietie ai lea o ia i lona itu taumatau.
20Ona fai atu lea o ia ia te ia, Ou te faatoga atu ia te oe i le mea itiiti e tasi; aua ne‘i ‘alo ou fofoga ia te au. Ona fai mai lea o le tupu ia te ia, Sena e, fai mai ia, auā ou te le ‘alo lava ia te oe.
21Ona fai atu lea o ia, Se‘i avatua Apiseka le Sunema ia Atonia lou uso e fai mana avā.
22Ona tali mai lea o le tupu o Solomona, ua faapea mai i lona tinā, Se a ea le mea e te faatoga mai ai ia Apiseka le Sunema e fai ma Avā a Atonia? Ina e faatoga mai foi i le nofoaiga e fai mona, auā o ia o lo‘u uso e matua, ia ia te ia, atoa ma Aviata le faitaulaga, ma Ioapo le tama a Seruia.
23Ona tauto lea o le tupu o Solomona ia Ieova, ua faapea mai, Ia faapea lava ona faia e le Atua ia te au, ma ia faaopoopo i ai, pe afai ua le fai mai e Atonia lena upu e fai ma mea e oti ai o ia.
24O lenei, o loo soifua Ieova o le ua faatumauina a‘u, ma faanofoina a‘u i le nofoālii o lo‘u tamā o Tavita, o le ua faia foi se aiga mo‘u, e pei ona ia fetalaia mai, e fasiotia lava Atonia i le aso nei.
25Ona auina atu lea e Solomona le tupu ia Penaia le atalii o Ioiata, ua ia fasia o ia, ua oti ai.
26Ua fai atu foi le tupu ia Aviata le faitaulaga, Ina alu ia oe i Anatota i lou fanua; auā e tatau ona e oti; a ou te le fasiotia oe i nei ona po; auā na e ave le atolaau a le Alii o Ieova i luma o lo‘u tamā o Tavita; auā foi na e tiga i mea uma lava na tigaina ai lo‘u tamā.
27Ona tulia lea o Aviata e Solomona, aua ne‘i toe fai o ia ma faitaulaga a Ieova; ina ia taunuu ai le afioga a Ieova na ia fetalaia mai ai i le aiga o Eli i Sailo.
28Ua logo atu foi le tala ia Ioapo; ona sola ai lea o Ioapo i le fale fetafai o Ieova, ma na tago atu i nifo o le fata faitaulaga; auā e ui lava ina lei liliu o Ioapo e mulimuli atu ia Apisaloma na ia liliu ma mulimuli atu ia Atonia.
29Ua ta‘ua foi i le tupu o Solomona, ua sola Ioapo i le fale fetafai o Ieova; faauta foi, o loo i tafatafa o le fata faitaulaga. Ona auina atu lea e Solomona o Penaia le atalii o Ioiata, ua faapea atu, Alu ia oe, ina fasi ia te ia.
30Ona alu atu lea o Penaia i le fale fetafai o Ieova, ua ia fai atu foi ia te ia, O loo faapea ona fetalai mai o le tupu, Ina sau ia oe i fafo. Ona tali mai lea o ia, E leai, ou te oti lava iinei. Ona toe ta‘u atu lea e Penaia lena upu i le tupu, ua faapea atu, Ua faapea ona tautala mai o Ioapo, ua faapea foi ona tali mai o ia ia te au.
31Ona fai mai lea o le tupu ia te ia, Ia e faia e faapei ona fai mai ai o ia, ia e fasi foi ia te ia, ma tanu ia te ia; ina ia e aveesea ia te au ma le aiga o lo‘u tamā, le toto na faamaligifuaina e Ioapo.
32E taui atu e Ieova lona toto i lona lava ulu, ina ua fasia e ia o tagata e toalua sa sili ona amiotonu ma amio lelei ia te ia, na fasiotia i laua e ia i le pelu, na le silafia foi e lo‘u tamā o Tavita; o Apineru le atalii o Neru o le na pule i ‘au a Isaraelu, ma Amase le atalii o Ietero, o le na pule i ‘au a Iuta.
33E tauia lava lo la toto i le ulu o Ioapo, ma ulu o ana fanau e faavavau; a o Tavita, ma lana fanau, ma lona aiga, ma lona nofoalii e i ai le manuia mai ia Ieova e faavavau.
34Ona alu ae lea o Penaia le atalii o Ioiata, ma fasi ia te ia, ua oti ai; ua tanumia foi o ia i lona fale i le vao.
35Ona tofia lea e le tupu o Penaia le atalii o Ioiata e fai mona sui e pule i ‘au; ua tofia foi e le tupu o Satoka le faitaulaga e sui a‘i Aviata.
36Ua aauina atu foi e le tupu nisi e aami ia Semi; ona fai atu lea o ia ia te ia, Ia e faia se fale mo oe i Ierusalema, ma e nofo ai, aua lava ne‘i e alu ese i se tasi mea;
37auā o le aso e te alu ese atu ai, ma sopoia atu le alia o Ketarono, ia e matuā iloa, e te oti ai lava; e i lou ulu lou lava toto.
38Ona fai mai lea o Semi i le tupu, Ua malie lau afioga; o pei ona fetalai mai o lo‘u alii le tupu, e faapea ona faia e lau auauna. Ua nofo foi Semi i Ierusalema ua tele aso.
39A ua oo ina atoa o tausaga e tolu, ona sosola ai lea o auauna e toalua a Semi ia Akisa le atalii o Maaka, o le tupu o Kata. Ua tala mai foi nisi ia Semi, ua faapea mai, Faauta o loo i Kata au auauna.
40Ona tulai atu lea o Semi, ma faanofoa lana asini, ma alu atu i Kata ia Akisa e sailiili ai ana auauna; ua alu atu Semi, ma aumaia ana auauna mai Kata.
41Ua ta‘uina mai foi ia Solomona, na alu Semi nai Ierusalema i Kata, ma ua toe foi mai o ia.
42Ona feau atu lea nisi e le tupu e aami ia Semi, ma na fai atu ia te ia, Na ou le fai atu ea ia te oe e te tauto ia Ieova, ma a‘u ta‘utino atu ia te oe, ua faapea atu, O le aso e te alu ese atu ai, ma e alu i se tasi mea, ia e matuā iloa e te oti ai lava? Na e fai mai foi ia te au, Ua malie le upu ua ou faalogo atu ai.
43Se a ea le mea na e le tausi ai le tautoga ia Ieova, ma le poloaiga na ou fai atu ai ia te oe?
44Ua fai atu foi le tupu ia Semi, Ua e iloa le leaga uma ua iloa ai lava i lou loto, na e fai i lo‘u tamā o Tavita. O lenei, e taui atu e Ieova lou leaga i lou ulu;
45a e manuia le tupu o Solomona, e faatumauina foi le nofoālii o Tavita i luma o Ieova e faavavau.
46Ona fai atu lea o le tupu ia Penaia le atalii o Ioiata; ona alu atu lea o ia i fafo, ma fasi ia te ia, ua oti ai o ia. Ua faatumauina lava le nofoaiga ia Solomona.
Who We AreWhat We EelieveWhat We Do
2025 by iamachristian.org,Inc All rights reserved.
