1Ieova e, e amiotonu oe, pe a ou finau atu ia te oe; tau ina ou tautala atu ia te oe i au faamasinoga. Se a ea le mea ua manuia ai le ala o tagata amio leaga, ua saogalemu i latou uma o e matuā faa‘ole‘ole?
2Ua e totōina i latou, ua mau aa foi i latou; ua tutupu i latou, ma ua latou fua mai; ua latalata oe i o latou gutu, a e mamao i o latou manatu.
3A o oe, Ieova e, o loo e silafia a‘u, ua e sisila mai ia te au, ua e tofotofoina foi lo‘u loto ua ia te oe; ia e vavaeeseina i latou e pei o mamoe a fāsia, ia e faasaina i latou mo le aso e fafasi ai.
4Seia afea e faanoanoa ai le nuu, ma magumagu ai le vao iti o fanua uma ona o le amio leaga a e nonofo ai? Ua faaumatia manu vaefa ma manu felelei; auā ua latou fai ane, E le vaaia e ia lo latou iuga.
5Afai ua e taufetuli ma tagata e femoei i le eleele, ma ua e lailoa ia te i latou, pe faapefea ona e tausinio ma solofanua? Afai ua e nofo ma le le mata‘u i le nuu e filemu ai, se a se mea e te faia i le matagofie o Ioritana?
6Auā o ou uso lava ma le aiga o lou tamā, o i latou lava ua latou faa‘ole‘ole ia te oe; o i latou lava ua latou alalaga tele i ou tua; e ui ina latou tautala lelei ia te oe, aua ne‘i e faatuatua ia te i latou.
7Ua ou tuua lo‘u fale, ua ou lafoaiina lo‘u tofi; ua ou tuuina atu le pele a lo‘u loto i lima o e ita ia te ia.
8Ua avea lo‘u tofi ia te au pei se leona i le vao; ua leo tele mai o ia ia te au, o le mea lea ua ou ‘ino‘ino ai ia te ia.
9O lo‘u tofi ua ia te au pei o le manu feai, o le sapua; o manu feai o i ona itu uma ua ita ia te ia; o mai ia, ina faapotopoto mai ia o mea ola uma o le vao, ma aumaia i latou e aai ai.
10Ua faaumatia la‘u tovine e leoleo mamoe e toatele, ua solia e i latou lo‘u tofi, o lo‘u tofi matagofie ua latou faia ma mea tuufua ua faatafunaina.
11Ua faia ma mea faatafunaina, ua faanoanoa ia i o‘u luma ina ua faatafunaina; ua faatafunaina le nuu uma, a e leai se tagata ua mafaufau i ai.
12Ua o ae tagata faatafuna i mauga tula uma i le vao; ua ‘ai le pelu a Ieova e afua mai i le tasi pito nuu e oo i le tasi pito nuu; e leai se filemu i se tagata e toatasi.
13Ua latou luluina saito, a e latou te selesele mai ai laau tuitui; ua faatigaina i latou e i latou, a e le aoga ia te i latou; e mā foi i latou i mea e maua ia te outou, ona o le toasa tele o Ieova.
14O loo faapea ona fetalai mai o Ieova i tagata amio leaga uma ua tuaoi ma a‘u, o e pai atu i le tofi na a‘u tofia ai lo‘u nuu o Isaraelu, Faauta, ou te liaiina i latou ai lo latou laueleele, ou te liaiina foi le aiga o Iuta ai totonu ia te i latou.
15A mavae ona ou liaiina o i latou, ona ou toe alofa mutimutivale lea ia te i latou, ma ou faafoisia mai i latou, e taitoatasi i lona tofi, e taitoatasi foi i lona nuu.
16Afai e matuā a‘oa‘o lava i latou i ala o lo‘u nuu, ia tauto i latou i lo‘u igoa, e faapea, O loo soifua Ieova; e pei ona latou a‘oa‘o atu i lo‘u nuu ia tauto ia Paala; ona atiina ae lea o i latou i totonu o lo‘u nuu.
17A e afai latou te le faalogo mai, ona ou matuā liaiina lea o lea nuu, ma ou faaumatia, o loo fetalai mai ai Ieova.
Who We AreWhat We EelieveWhat We Do
2025 by iamachristian.org,Inc All rights reserved.
