KENESE, 23 - Samoan Old Version Bible

O LE MATAUPU XXIII.O le oti o Sara.

1O tausaga o Sara e selau ma le luafulu ma tausaga e fitu; o tausaga ia o le ola o Sara.

2Ona oti lea o Sara i Kiriata-arapa; o Heperona lea i le nuu o Kanana; na alu atu ai foi Aperaamo e tagitu‘i ona o Sara, ma tagi ai.

3Ona tulai lea o Aperaamo ai luma o lana avā ua oti, ma tautala atu i le fanauga a Heti, ua faapea atu,

4O a‘u o le tagata ese, ma le āumau ia te outou; ina tuu mai ia mo a‘u se mea e fai ma tuugamau i lo outou nuu, ina ia ou tanu ai la‘u avā ua oti, ia ou le toe vaai i ai.

5Ona tali mai lea o le fanauga a Heti ia Aperaamo, ua faapea mai ia te ia,

6Le alii e, faafofoga mai ia ia te i matou; o le alii tele oe o ia te i matou; ia e tanu lou faletua ua maliu i so matou tuugamau e lelei; e leai so matou e vavao sona tuugamau, a e tuu atu ia te oe e tanu ai lou faletua ua maliu.

7Ona tu lea i luga o Aperaamo, ma ifo atu i tagata o lea nuu, o le fanauga a Heti.

8Ona fai atu lea o ia ia te i latou, ua faapea atu, Afai o lo outou finagalo ou te tanumia la‘u avā ua oti, ia ou le toe vaai i ai, ia outou faafofoga mai ia te au, ma ia outou fautua ai ia Eferona le atalii o Soaro mo a‘u,

9ina ia tuuina mai e ia ia te au le ana o Makapelu, o loo ia te ia, i le tuaoi o lona fanua; na te tuuina mai ia te au i lo outou nuu e fai ma tuugamau, a e ou taui atu i tupe la te tatau.

10Sa nofo mai foi Eferona faatasi ma le fanauga a Heti; ua fai mai foi Eferona o lo sa Hetī ia Aperaamo i luma o le fanauga a Heti, o i latou uma o e ulu mai i le faitotoa o lana aai, ua faapea mai, Le alii e, soia;

11se‘i e faafofoga mai ia te au; ou te foaiina atu ia te oe le fanua, atoa ma le ana o i ai, ou te foaiina atu ai ia te oe, ou te foaiinatua lava ia te oe i luma o lo‘u nei nuu; ina e teu ai ia lou faletua ua maliu.

12Ona ifo ai lea o Aperaamo i luma o tagata o le nuu.

13Ua ia fai atu foi ia Eferona i luma o tagata o le nuu, ua faapea atu, Afai o lea, ina se‘i e faafofoga mai ia te au; ou te avatu lava tupe e taui a‘i le fanua; ina e talia mai ia, ona ou tanu ai lea o la‘u avā ua oti.

14Ona tali mai lea o Eferona ia Aperaamo, ua faapea mai ia te ia,

15Le alii e, ia e faafofoga mai ia te au; e tusa le fanua ma sekeli ario e fa selau, o le a lea ia te i taua? Teu pea ia o lou faletua ua maliu.

16Ua faalogo atu Aperaamo ia Eferona; ona fuaina lea e Aperaamo o ario mā Eferona sa ta‘u mai ai e ia i luma o le fanauga a Heti, o sekeli ario e fa selau, o tupe e masani ai o e faatau.

17O le fanua o Eferona i Makapelu, i luma o Mamere, o le fanua ma le ana o i ai, ma laau uma i le fanua, i ona tuaoi uma e soo ai ua faato,

18e fai mo Aperaamo, i luma o le fanauga a Heti, i luma o i latou uma o e ulu mai i le faitotoa o lana aai.

19Ua mavae lea mea, ona tanumia lea e Aperaamo o Sara lona avā i le ana o i le fanua o Makapelu, i luma o Mamere; O Heperona lea i le nuu o Kanana.

20Ua faato lava e le fanauga a Heti le fanua ma le ana o i ai ia Aperaamo e fai ma tuugamau.