1O Iefata le Kiliata, o le toa malosi lava ia, o le tama a le fafine talitane, na fanaua Iefata e Kiliata.
2Na fanau mai le avā a Kiliata o tama tane ia te ia; ua matutua tama tane a le fafine, ona latou tulia lea o Iefata, ma latou fai atu ia te ia, E te le maua se tofi i le aiga o lo matou tamā, auā o oe le tama a le fafine ese.
3Ona sola ese ai lea o Iefata i ona uso, ua nofo i le nuu o Topa; ona faapotopoto atu ai lea ia Iefata o tagata faatauvaa, ua latou feoai ma ia.
4Ua oo i ona aso na tau ai le fanauga a Amoni ma Isaraelu.
5Ua oo ina a tau le fanauga a Amoni ma Isaraelu, ona o atu lea o toeaina o Kiliata e aami ia Iefata i le nuu o topa.
6Ua latou fai atu ia Iefata, Maliu mai ia, ina fai oe ma alii e avea ‘au ia i matou, ina ia tatou tau ma le fanauga a Amoni.
7A ua fai mai Iefata i toeaina o Kiliata, E le na outou ‘ino‘ino ea ia te au, ma tuli ia te au ai le fale o lo‘u tamā; o le ā foi le mea ua outou o mai ai nei ia te au ina o tigaina outou?
8Ona fai atu lea o toeaina o Kiliata ia Iefata, O le mea lava lea ua matou toe faasaga mai ai ia te oe, tatou te maliu ma i matou, ma e tau ma le fanauga a Amoni, ona e fai lea ma alii sili i e nonofo uma lava i Kiliata.
9Ona fai mai lea o Iefata i toeaina o Kiliata, Afai tatou te foi ma outou e tau ma le fanauga a Amoni, a foaiina mai foi i latou ia te au e Ieova, e faia ea a‘u ma alii sili ia te outou?
10Ua fai atu toeaina o Kiliata ia Iefata, E faafofoga mai Ieova ia i tatou, pe afai matou te le faia e tusa ma lau fetalaiga.
11Ona ō lea o Iefata ma toeaina o Kiliata; ona tofia lea o ia e le nuu e fai ma alii sili ma ave ‘au ia i latou. Ua fai ane e Iefata ana upu uma i luma o Ieova i Mesepa.
12Ona auina atu lea e Iefata o le sāvali i le tupu o le fanauga a Amoni, ua faapea, Se a se mea o i ai ia te i tāua ma a‘u, ina ua e sau ia te au e tau i lo‘u lava laueleele?
13Ua fai mai le tupu o le fanauga a Amoni i le sāvali a Iefata, Auā ua faoa e Isaraelu lo‘u laueleele i lona alu ae i Aikupito, e pau mai i Arinona e pau atu i Iapoka, a e oo atu i Ioritana; o lenei, ia toe tuu mai ai ma le filemu.
14Ona toe aauina atu ai lea e Iefata o le sāvali i le tupu o le fanauga a Amoni,
15ua fai atu ia te ia, O loo faapea mai Iefata, E lei faoa lava e Isaraelu le laueleele o Moapi, ma le laueleele o le fanauga a Amoni;
16auā na ae mai Isaraelu i Aikupito, ma ui ane i le vao, e oo i le sami Ulaula; ua oo atu i Katesa.
17Ona aauina atu lea e Isaraelu o le sāvali i le tupu o Etoma, o loo faapea, Se‘i ou ui ane i lou nuu. A e le faalogo mai le tupu o Etoma, na aauina atu foi nisi i le tupu o Moapi, a e le mafai o ia; ona nofo ai lea o Isaraelu i Katesa.
18Ona latou ui atu lea i le vao, ma latou faataamilo i le nuu o Etoma ma le nuu o Moapi; ua latou oo atu ai i le mea e alu ae ai le la i le nuu o Moapi, ma latou to lauapi i le la itu o Arinona, a e lei sopoia le tuaoi o Moapi; auā o Arinona o le tuaoi lea o Moapi.
19Ona aauina lea e Isaraelu o le sāvali ia Sekono le tupu o sa Amorī, le tupu a Hesepona, ua faapea atu ai Isaraelu ia te ia, Se‘i ou ui ane i lou laueleele e oo atu ai i lo‘u nuu.
20A e lei talia e Sekono le upu a Isaraelu ina ia latou ui ane i lona nuu; ua faapotopoto foi e Sekono i lona nuu uma lava, ua to lauapi i Iaesa; ona latou tau ai lea ma Isaraelu.
21Ona tuuina atu lea e Ieova le Atua o Isaraelu o Sekono ma lona nuu uma i le lima o Isaraelu, ua latou fafasi ia i latou; na maua foi e Isaraelu le nuu uma lava o sa Amorī o e sa nonofo i lea nuu.
22Na latou maua le laueleele uma lava o sa Amorī, e pau mai i Arinona, a e pau mai i Iapoka; e pau atu i le vao, e oo atu i Ioritana.
23O lenei, o Ieova le Atua o Isaraelu na ia tuli ese atu i sa Amorī ai luma o lona nuu o Isaraelu, a e fai ea mo oe.
24O le mea e avane ai e Kimosa lou atua ia te oe, e te le taofia ea mo oe? O mea uma foi e aumai ai e Ieova lo matou Atua mo i matou, matou te taofia lava mo i matou.
25O lenei pe sili ea oe ia Palako le atalii o Seporu, le tupu o Moapi? Pe na fai ea e ia se finauga ma Isaraelu? Pe na tau ea ia se taua ma i latou?
26A o nofo Isaraelu i Hesepona ma ona faoa aai, ma Aroeru ma ona faoa aai, ma aai uma e lata ane i Arinona, e tolu galau ona tausaga? Se a le mea na outou le fao ai i ona po ia?
27O a‘u foi, ou te lei agasala atu ia te oe; a o oe, ua e agaleaga mai ia te au, ina ua sii mai le taua ia te au; o Ieova le faamasino, ia faamasino e ia i lenei aso i le fanauga a Isaraelu ma le fanauga a Amoni.
28A ua le faalogo mai le tupu o le fanauga a Amoni i upu a Iefata na ia molia ia te ia.
29Ua oo ia Iefata le Agaga o Ieova, ona alu ane lea o ia i Kiliata ma Manase, ua ia alu ane foi i Mesepa i Kiliata; ona alu ane lea o ia nai Mesepa i Kiliata i le fanauga a Amoni.
30Ona faia lea e Iefata le tauto ia Ieova, o loo faapea, Afai e te tuuna mai lava le fanauga a Amoni i lo‘u lima;
31ona fai lea mo Ieova o se na te ulufafo i faitotoa o lou fale e faafetaiai ia te au i lo‘u foi atu ma le manuia nai le fanauga a Amoni; pe ou te fai ai le taulaga mu.
32Ona alu ane lea o Iefata i le fanauga a Amoni e tau ma i latou; ua tuuina atu foi i latou e Ieova i lona lima.
33Ua ia fasia i latou, e afua mai i Aroeru, e oo atu i Meniti, o aai e luafulu, e oo atu lava i Apelakarame, o le fasi e matuā tele lava; ua faatoilaloina ai le fanauga a Amoni i luma o le fanauga a Isaraelu.
34Ona alu atu lea o Iefata i Mesepa i lona fale; faauta foi, o lona afafine ua ulufafo mai e faafetaiai ia te ia ma topa ma siva; o lona afafine e toatasi o ia, ua leai sona atalii po o se afafine, ua na o ia lava.
35Ua iloa atu o ia, ona saei lea e ia ona ofu, ua fai atu, Aue! Lo‘u afafine e, ua e matuā faatigaina a‘u; o loo ua e faatasi ma e faaatuatuvale ia te au; o a‘u foi, ua ou tautala atu ia Ieova, ou te le mafai ona faafoi mai la‘u upu.
36Ona tali mai lea o ia ia te ia, Sena e, ua e tautala atu ea ia Ieova? Ia e faia ia te au e tusa ma lau na ua e fai atu ai; ina ua uma ona taui atu e Ieova ona o oe i e na ita mai ia te oe o le fanauga a Amoni.
37Ua ia fai mai foi i lona tama, Ia e faia lenei mea ia te au; tuu mai ia te au i masina e lua, ou te alu atu, ma ou ifoifo i luga o mauga, ma ou tagi ona o lo‘u taupou, o a‘u atoa ma a‘u uo.
38Ua ia fai atu, Ina alu ia oe; ona tuu atu lea o ia ia te ia i masina e lua; ua alu atu o ia ma ana uo, ua tagi ona o lona taupou i luga o mauga.
39Ua oo ina mavae o masina e lua, ona foi ai lea o ia i lona tamā; ua ia faia ia te ia lana tauto sa na tauto ai; o ia foi ua le iloa se tane.
40Ona fai lea ma tu ia Isaraelu, o lea tausaga ma lea tausaga ua o ai afafine o Isaraelu e vivii i le afafine o Iefata le Kiliata e taifa aso i tausaga.
Who We AreWhat We EelieveWhat We Do
2025 by iamachristian.org,Inc All rights reserved.
