1Ua muimui le nuu, ua leaga foi lea mea i fofoga o Ieova; auā ua faafofoga i ai Ieova ona tupu ai lea o lona toasa; ona mu ai lea o le afi mai ia Ieova ia te i latou, ua faaumatia ai pito toagālauapi.
2Ona tagi atu ai lea o le nuu ia Mose; ua tatalo foi Mose ia Ieova, ona pe ai lea o le afi.
3Ua faaigoa foi e ia lena mea o Tapara; auā na mu ai le afi mai ia Ieova ia te i latou.
4Ua tu‘inanau lava le vao tagata ese sa ia te i latou, ua toe tagi foi le fanauga a Isaraelu, ma latou fai ane, O ai ea e fafaga ia te i tatou i manu?
5Ua tatou manatu i i‘a na tatou sa‘oloto ona aai ai i Aikupito; o kukuma foi, ma meleni, ma liki, ma aniani, ma kalika;
6a o ona po nei ua oole o tatou tino; ua leai lava se mea e vaai i ai ua na o lenei manai.
7O le manai foi e pei o le fatu koriano ia, ma lona lanu e pei o le lanu o le petala.
8Na feoai le nuu ma faaputu ai, ona latou olo ai lea i maaolo, pe tu‘i i le tanoa, ona latou tunu ai lea i pani, ma fai a‘i potoi; o lona nanamu e pei o le nanamu o le potoi ua palua ma le uu.
9Ua totō ifo le sau i le toagālauapi i le po, ona totō lea i ai o le manai.
10Ua faalogo Mose i le fetagisi o le nuu i o latou aiga, e taitoatasi le tagata i faitotoa o latou fale ie; ona matuā tupu tele ai lea o le toasa o Ieova, ua leaga foi i le manatu o Mose.
11Ona fai atu ai lea o Mose ia Ieova, Se a le mea ua e agaleaga mai ai i lau auauna? Se a foi le mea ua le alofagia ai a‘u i ou luma, ina ua e faaee mai le avega o lenei nuu uma i luga ia te au?
12Na to ea a‘u i lenei nuu uma? Pe na ou fanauina i latou, ina ua e fetalai mai ai ia te au, Ia e ave ia te i latou i lou lava fatafata, e pei o le tausi tama ona ave i le tama meamea, se‘i ia latou oo i le laueleele na e tauto ai i o latou tamā?
13Ou te maua ea i fea manu ou te avatu ai i lenei nuu uma? Auā latou te fetagisi mai ia te au, ua faapea mai, Ina aumai ia ia te i matou o manu, matou te aai ai.
14Ou te le lavā lava e a‘u e toatasi ona ave i le avega o lenei nuu uma, auā e mafatia ai a‘u.
15Afai foi e te fai faapea ia te au, ou te aioi lava, afai ua alofagia a‘u e oe, ia e fasioti lava ia te au, a e aua ou te iloa lo‘u puapuaga.
16Ona fetalai mai ai lea o Ieova ia Mose Ina faapotopoto mai ia ia te au o tagata o toafitugafulu, o toeaina o Isaraelu, o e ua e iloa lava o toeaina i latou o le nuu ma o latou faipule; ia e au mai foi ia te i latou i le fale fetafai o le faapotopotoga, ina ia latou tutū ai faatasi ma oe.
17Ona ou alu ifo ai lea ta te tautala ma oe i lea mea; ou te avea foi nisi o le agaga e loo ia te oe, ma ou tuuina atu ia te i latou; ona latou tauave ai lea faatasi ma oe le avega o le nuu, ina ia e le avea toatasi.
18Ia e fai atu foi i le nuu, Ina faapaiaina outou e outou, auā e a taeao, ona outou aai ai lea o manu; auā ua outou fetagisi i fofoga o Ieova, o loo faapea mai, O ai se na te aumaia ia te i matou o manu matou te aai ai? Auā sa lelei i matou ina o i Aikupito; o lea, e avatu ai e Ieova o manu ia te outou, tou te aai ai.
19E le na o le aso e tasi tou te aai ai, po o aso e lua, po o aso e lima, po o po e sefulu, po o le laufulu o po;
20a e seia atoa le masina, seia alu ifo ia i o outou isu, ma avea ma mea e inosia e outou; auā ua outou i‘no‘ino ia Ieova o loo ia te outou, ua outou fetagisi foi i ona luma, o loo faapea mai, Se a foi le mea na matou o mai ai nai Aikupito?
21Ona fai atu ai lea o Mose, O le nuu matou te faatasi ma i latou e ono selau o afe o tagata ia e o i taua, a ua e fetalai mai, Ou te foaiina atu ia te i latou o manu latou te aai ai e atoa le masina.
22E fasia ea mo i latou o lafu mamoe atoa foi ma lafu povi ina ia latou maoona ai? Pe faapotopotoina ea mo i latou o i‘a uma o le sami ina ia latou maoona ai?
23Ona fetalai mai ai lea o Ieova ia Mose, Ua faapuupuuina ea le lima o Ieova? O lenei, e te iloa lava pe taunuu ia te oe la‘u upu pe leai.
24Ona alu atu ai lea o Mose, ma fai atu i le nuu fetalaiga a Ieova; ua ia faapotopoto foi i toeaina o le nuu, o tagata e toafitugafulu, ua ia fai atu ia tutu i latou e faataaliolio i le fale fetafai.
25Ona afio ifo ai lea o Ieova i le ao, ma fetalai mai ia te ia, ua ia avea foi nisi o le agaga na ia te ia, ma na tuuina atu i toeaina e toafitugafulu; ua nofo le agaga i luga ia te i latou, ona latou perofeta ane ai lea, ua gata i lea aso.
26A ua nonofo tagata o latou e toalua i le toagālauapi, o le igoa o le tasi o Elitato, ma le igoa o le isi o Metato; ua nofo foi le agaga i luga ia te i laua, (o isi foi i laua o e na tusia, ona ua la le o atu i le fale fetafai,) ona la perofeta ane ai lea i le toagālauapi.
27Ona tamoe mai ai lea o le tasi taulealea, ma ta‘u mai ia Mose, ua faapea mai, O Elitato ma Metato o loo perofeta ane i laua i le toagālauapi.
28Ona fai mai ai lea o Iosua le atalii o Nuno, o le auauna a Mose o le tasi o ona taulelea, ua faapea mai, Le alii e, Mose, ia e vavao ia te i laua.
29Ona fai atu ai lea o Mose ia te ia, Ua e mataua ea ona o a‘u? Ou te manao lava ia fai ma perofeta le nuu uma o Ieova, ma ia foaiina atu e Ieova lona Agaga ia te i latou.
30Ona alu atu ai lea o Mose i le toagālauapi, o ia ma toeaina o Isaraelu.
31Ona agi mai ai lea o le matagi mai ia Ieova, ua au mai ai foi salu mai le sami, ua tuu ai i le toagālauapi, e tusa ma le savaliga o le aso e tasi i lea itu ma le savaliga o le aso e tasi i lea itu ua pau mai ia, ua siosioina ai lava le toagālauapi, e lua kupita foi i luga o le fogāeleele.
32Ona tutū ai lea o le nuu i lea aso uma, ma le po uma, i le ma lona aso lua uma, ua latou faapotopoto ai salu; o le na itiiti ana mea na faapotopoto e sefulu ana somera; ua latou folasia ai foi mo i latou, ua siosioina ai lava le toagālauapi.
33Sa u i latou i manu a e lei lamuina, ona tupu ai lea o le toasa o Ieova i le nuu, ua fasia foi e Ieova o le nuu i le fasiga e matuā tele lava.
34Na faaigoa foi e ia le igoa o lea mea o Kiperota-atava, auā o lea mea na latou tanumia ai le nuu na tu‘inanau.
35Ona ō malaga ai lea o le nuu ai Kiperota-atava i Haserota; ua latou nonofo foi i Haserota.
Who We AreWhat We EelieveWhat We Do
2025 by iamachristian.org,Inc All rights reserved.
