1Sa latou nonofo i tausaga e tolu ua leai se taua ia Suria ma Isaraelu.
2Ua oo i le tausaga e tolu, ona alu ifo lea o Iosefatu le tupu o Iuta, i le tupu o Isaraelu.
3Ua fai atu le tupu o Isaraelu i ana auauna, Tou te le iloa ea o Ramota-Kiliata o la tatou aai lea, a ua tatou nofonofo ua le faoa mai le lima o le tupu o Suria.
4Ua fai atu foi o ia ia Iosefatu, Ta te o atu ea ma a‘u i le taua i Ramota-Kiliata? Ona fai mai lea o Iosefatu i le tupu o Isaraelu, O a‘u nei e pei o oe lava, o lo‘u nuu e pei o lou nuu, o a‘u solofanua e pei o au lava solofanua.
5Ua fai mai foi Iosefatu i le tupu o Isaraelu, Se‘i e fesili i le aso nei i se afioga mai ia Ieova.
6Ona faapotopoto mai lea e le tupu o Isaraelu o le au perofeta, pe toafa selau o tagata, ma na fai atu ia te i latou, Ou te alu atu ea i Ramota-Kiliata e tau ai le taua, pe ou te nofo? Ona latou fai mai lea, Ia e maliu ae; auā e foaiina mai ai e le Alii i le aao o le tupu.
7Ona fai mai lea o Iosefatu, E le o iinei ea ma se perofeta a Ieova, ina ia tatou fesili atu ia te ia?
8Ona fai atu lea o le tupu o Isaraelu ia Iosefatu, O le tasi tagata foi o Mekaio, o le atalii o Imila, tatou te fesili atu ai ia Ieova; a ou te ‘ino‘ino ia te ia, auā na te le vavalo mai ia te au i mea lelei, a o mea leaga. Ona fai mai lea o Iosefatu, Aua le fetalai faapea mai le tupu.
9Ona valaau lea o le tupu o Isaraelu i le tasi auauna sili, ua faapea atu, Ia e faavave mai ia Mekaio le atalii o Imila.
10Ua taitasi ma nofo i lona nofoālii, o le tupu o Isaraelu, ma Iosefatu le tupu o Iuta; sa oofu foi i laua i o laua ofualii, i le mea e aunoa e lata ane i le faitotoa o Samaria; o loo vavalo foi perofeta uma i o la luma.
11Na faia foi e Setekaia, le atalii o Kenaana o nifo uamea mo ia, ma fai atu, O loo faapea ona fetalai mai o Ieova, O mea nei e te suatia ai Suria, seia e faaumatia i latou.
12Ua faapea foi ona vavalo o perofeta uma, ua faapea atu, Ina maliu ae ia i Ramota-Kiliata, ma ia manuia; auā e foaiina mai ai e Ieova i le aao o le tupu.
13O le auauna na alu e aami ia Mekaio, ua fai atu o ia ia te ia, ua faapea atu, Faauta mai ea i upu a le au perofeta i le tupu, ua tasi, ua lelei; se‘i faapea foi lau upu, ia pei o le upu a so latou, ia e fai atu se upu lelei.
14Ona fai mai lea o Mekaio, O loo soifua Ieova, o le mea e fai mai ai Ieova ia te au, o le mea lea ou te fai atu ai.
15Ua sau foi o ia i le tupu. Ona fai atu lea o le tupu ia te ia, Mekaio e, pe matou te o atu ea i Ramota-Kiliata i le taua, pe matou te nonofo? Ona fai mai lea o ia ia te ia, Ina maliu ae ia, ma ia manuia; auā e foaiina mai ai e Ieova i le aao o le tupu.
16Ona fai atu lea o le tupu ia te ia, Pe foi faafia ea ona ou fai atu ia tauto oe; aua ne‘i e fai mai ia te au se mea e tasi, tau lava o le upu moni i le suafa o Ieova?
17Ona fai mai lea o ia, Na ou iloa atu ia Isaraelu uma ua faataapeapeina i mauga, e pei o mamoe ua leai so latou leoleo. Ona fetalai mai lea o Ieova, Ua leai so latou alii; ia latou taitasi ma toe foi atu i lona fale ma le filemu.
18Ona fai atu lea o le tupu o Isaraelu ia Iosefatu. Na ou le fai atu ea ia te oe, na te le vavalo mai ia te au se mea lelei, na o le mea leaga?
19Ona fai mai ai lea o Mekaio, O lenei, ia e faafogafoga mai i le afioga a Ieova. Na ou iloa atu ia Ieova o loo tietie i lona nofoālii; sa tutū foi ‘au uma a le lagi e latalata ia te ia, i lona itu taumatau ma lona itu tauagavale.
20Na fetalai atu foi Ieova, Po o ai ea na te faaoleole ia Aapo, ina ia alu ae o ia, ma oti i Ramota-Kiliata? Ona fai mai lea o le tasi e faapea, a e fai mai le isi e faapea.
21Ona alu ane lea o le tasi agaga, ma tu mai i luma o Ieova, ua fai mai, Ou te faaoleole ia te ia.
22Na fetalai atu foi Ieova ia te ia, I ni a ea? Ona fai mai lea o ia, Ou te alu, ma ou fai ma agaga pepelo i gutu o ana perofeta uma. Ona fetalai atu lea o Ieova, E te faaoleole ia te ia, e te malo foi; ina alu ia, ina e faia ia o lea.
23O lenei, faauta, na tuuina e Ieova le agaga pepelo i gutu o au perofeta nei uma; auā ua fetalai e Ieova ia oo le leaga ia te oe.
24Ona faalatalata mai lea o Setekaia le atalii o Kenaana, ma na tu‘i mai ia Mekaio i lona alafau, ma fai mai, Po o fea na ui ai le Agaga o Ieova nai ia te au e tautala atu ia te oe?
25Ona fai atu ai lea o Mekaio, Faauta, e te iloa i lea lava aso e te alu atu ai i le afeafe tuloto e te lafi ai.
26Ona fai ane lea o le tupu o Isaraelu, Ina ave ia ia Mekaio, ma toe ta‘ita‘i ia te ia ia Amone le alii o le aai, ma Ioasa le atalii o le tupu; ma e fai atu,
27O loo o faapea mai le tupu, Ina tuuina atu ia o lenei tamaloa i le falepuipui, ma fafaga ia te ia i le mea e ‘ai a e ua tigaina, ma le vai a e ua tigaina, seia ou sau ma le manuia.
28Ona fai mai lea o Mekaio, Afai lava e te toe maliu mai ma le manuia, ua ou le tautala i le afioga mai ia Ieova. Ua fai ane foi o ia, Ina faalogologo mai ia o outou le nuu uma.
29Ona o ae lea o le tupu o Isaraelu, ma Iosefatu le tupu o Iuta i Ramota-Kiliata.
30Ua fai atu le tupu o Isaraelu ia Iosefatu, Ou te ofu ese a‘u, ma alu i le taua; a ia e ofu oe i lou lava ofu. Ona ofu lea o le tupu o Isaraelu i ofu ese, ma alu i le taua.
31Ua fai atu le tupu o Suria i alii e toatolugafulu ma le toalua e pule i ona kariota, ua ia faapea atu, Aua ne‘i tou tau ma se tagata nuu po o se alii, tau lava o le tupu o Isaraelu.
32Ua iloa atu e alii e pule i kariota ia Iosefatu, ona latou faapea ane lea, Ai o le tupu o Isaraelu lena. Ona latou faasaga ane lea, latou te tau ma ia; ona alaga lea o Iosefatu.
33Ua iloa e alii e pule i kariota, e le o le tupu o Isaraelu lea ona latou foi atu lea, ua le toe tuliloa ia te ia.
34Ua soona fana e le tasi tagata lana u, ua lavea ai le tupu o Isaraelu i le soo o lona ofutau uamea. Ona fai atu lea o ia i le ta‘ita‘i o lona kariota, Ina liliu ane ia o lou lima, ma ave ia te au i tua o ‘au, auā ua ou manua.
35Na faatetele le taua i lea aso; ua lagolagoina foi le tupu i lona kariota e faafeagai ma Suria; ona oti lea o ia i le afiafi; ua sisina ifo le toto o le manua i totonu o le kariota.
36Ua alu le manu i le goto o le la i ‘au, ua faapea, Ia taitasi ma alu i lana aai ma lona nuu.
37Ua oti foi le tupu, ua au mai i Samaria; ua latou tanu foi le tupu i Samaria.
38Ua fufulu e se tasi le kariota i le vailepa i Samaria, ua latou fufulu foi lana auupega; na etoeto foi e ulī lona toto, e tusa ma le afioga a Ieova na ia fetalaia mai.
39O toe o mea na faia e Aapo, ma mea uma na ia faia, ma le fale nifo o elefane na ia faia, ma aai uma na ia faia, ua le tusia ea i le tusi o tala i nofoaiga a tupu o Isaraelu?
40Ua taoto Aapo faatasi ma ona tamā, ona soloai ane lea o Aasaia lona atalii e fai ma tupu.
41O le fa o tausaga o Aapo le tupu o Isaraelu na fai ai Iosefatu le atalii o Asa ma tupu o Iuta.
42E tolu sefulu ma le lima o tausaga o Iosefatu ina o fai o ia ma tupu; na fai foi o ia ma tupu i Ierusalema i tausaga e lua sefulu ma le lima; o Asopa le igoa o lona tinā, o le afafine o Seleki.
43Na savali o ia i ala uma o Asa lona tamā, ua le alu ese ai o ia, na faia e ia o mea tonu i luma o Ieova; a ua le aveeseina o mea maualuluga; ua fai taulaga pea le nuu, ma faamuina mea manogi i mea maualuluga.
44Na lelei Iosefatu ma le tupu o Isaraelu.
45O toe o mea na faia e Iosefatu, ma lona fitafita sa fai, ma ona taua, ua le tusia ea ia i le tusi o tala i nofoaiga a tupu o Iuta?
46O tagata faasotoma na totoe, o e na totoe i ona po o Asa lona tamā, na aveesea e ia ai le nuu.
47Sa leai se tupu i Etoma; na fai ma tupu le na tofia e pule.
48Na fai vaa Tasesa e Iosefatu e ō i Ofeira e maua ai auro; a ua le oo, ina ua tu‘ia o vaa i Esiokape.
49Ona fai atu lea o Aasaia le atalii o Aapo ia Iosefatu, Ia o faatasi a‘u auauna ma au auauna i vaa; a ua le mafai Iosefatu.
50Ua taoto Iosefatu faatasi ma ona tamā, ua tanumia foi o ia faatasi ma ona tamā i le aai a lona tamā o Tavita; ona soloai ane lea o Iorama lona atalii e fai ma tupu.
51O le sefulu ma le fitu o tausaga o Iosefatu le tupu o Iuta na fai ai Aasaia le atalii o Aapo ma tupu o Isaraelu i Samaria; e lua tausaga na fai ai o ia ma tupu o Isaraelu.
52Ua amio leaga foi o ia i luma o Ieova, ua ia savali i le ala o lona tamā, ma le ala o lona tinā, ma le ala o Ierepoamo le atalii o Nepata, o le na faatupuina le agasala ia Isaraelu.
53Auā na ia auauna ia Paala, ma ifo atu ia te ia, ma na faaonoono ia Ieova le Atua o Isaraelu, e tusa ma mea uma na faia e ona tamā.
Who We AreWhat We EelieveWhat We Do
2025 by iamachristian.org,Inc All rights reserved.
