AUEGA, 4 - Samoan Old Version Bible

O LE MATAUPU IV.O le tagi a Siona ona o lona malaia.

1E! ua faalafulafu le auro, ua liua le auro lelei; ua sasaaina maa paia i tuluiga o ala uma.

2O tama pele a Siona, e tutusa ma le auro lelei, E! ua faatatauina i latou ma fagu omea ua faia e lima o lē fai ipu omea.

3O luko lava e tuu atu o latou susu, ua latou faasusu i a latou toloai; a o le tama fafine a lo‘u nuu ua saua pei o laena o i le vao.

4Ua pipii le laulaufaiva o le tama meamea i lona gutu i le fia inu; ua faatoga atu tama iti i le mea e ‘ai, a ua le tufatufa atu e se tasi mā latou.

5O e na aai i mea lelei ua fano i latou i le ala; o e na tausia i ie ulaula ua taooto i latou i faatăfuna.

6Ua tele foi le sala a le tama fafine a lo‘u nuu i le sala a Sotoma le na faaumatia e pei o le emo o le mata, na le oo i ai ni lima.

7Na mamā ona naseri e sili i le kiona, na sinasina i latou o sili i le suāsusu, sa matagofie o latou tino e sili i le penina, o le safaira o lo latou lalelei lea.

8Ua uliuli o latou tino e sili i mea uli, ua le iloa i latou pe a feoai; ua pipii o latou pa‘u i o latou ivi, ua popo, ua pei o se laau.

9E sili ona lelei o i latou ua fasiotia i le pelu i e ua oti i le oge; auā o i latou ia ua mole i latou ua otilaina ina ua leai ni mea e tutupu i le fanua.

10Ua tunu e lima o fafine alolofa o a latou lava fanau, sa fai ma mea e ‘ai mā latou i le malaia o le tama fafine a lo‘u nuu.

11Ua faauma mai e Ieova lona toatamai, ua sasaaina e ia le tele o lona toasa; ua tŭtŭ e ia le afi i Siona, ua susunuina ai ona faavae.

12O tupu o le lalolagi ma i latou uma o nonofo i le atu laulau, sa le manatu i latou e mafai ona sao mai i foitotoa o Ierusalema o e na fai o ia ma fili ma e na ita mai.

13Ona o agasala a ona perofeta ma amioletonu a ona faitaulaga e na faamaligi le toto o e amiotonu i totonu ia te ia;

14sa fesēsēai i latou i ala o tauaso i latou, sa leaga i latou i le toto, ua le mafai ai tagata ona papai atu i o latou ofu.

15Ina o ese ia outou o e le mamā, sa alalaga atu ai tagata ia te i latou, O ese ia, ina o, aua le papai mai; a o sosola i latou ua latou fesēsēai lava; na faapea ane tagata i nuu ese, Latou te le toe nonofo ai.

16O fofoga o Ieova ua taape ai i latou, e le toe silasila mai o ia ia te i latou; na le ava i latou i faitaulaga, na le alolofa i latou i toeaina.

17A o tumau i matou sa fole o matou mata i vaai i lo matou fesoasoani le aoga; sa vaavaai atu i matou i o matou fale matāmoe i le nuu e le mafai ona faaola mai.

18Sa latou tuli tatao i o matou tulagāvae, sa le mafeoai ai i matou i o matou ala; ua lata mai lo matou iuga, ua atoatoa o matou aso; auā ua oo lo matou iuga.

19Sa sili ona tele vavave o e na tuliloa mai ia te i matou i aeto o le lagi; sa latou saga tuliloa mai ia te i matou i atu mauga, sa latou lamalama mai ia te i matou i le vao.

20O le mānava o matou pogaiisu, o le na faauuina e Ieova, na maua o ia i a latou lua, o le na matou fai ane ai, E nonofo i matou i lona paolo i nuu ese.

21Ina olioli ia ma e fiafia oe le tama fafine a Etoma e, o loo nofo i le nuu o Usa; e oo atu ia te oe lava le ipu; e onā ai oe, ma e faalelavalavā ai.

22Le tama fafine a Siona e, ua faatuina lau sala, na te le toe faatāfeaina oe; le tama fafine a Etoma e, na te taui atu lau amioletonu, na te faaalia au agasala.