KALATIA, 5 - Samoan Old Version Bible

O LE MATAUPU V.O le uiga o amioga i la le Agaga.

1O lenei, ia outou tumau i le sa‘olotoga ua faasa‘oloto mai ai Keriso ia te i tatou; a e aua ne‘i toe taofia outou i le amo o le pologa.

2Faauta mai ea, o a‘u o Paulo, ou te fai atu ia te outou, afai e peritomeina outou, e le aoga lava Keriso ia te outou.

3Ou te toe molitino atu i tagata uma ua peritomeina, ua ia te i latou ona faia o mea uma lava o i le tulafono.

4O outou o loo ua ta‘uamiotonuina i le tulafono, ua tete‘a ese lava outou ma Keriso, ua pauu outou nai le alofa tunoa;

5auā o le Agaga matou te faatalitali atu ai i le faamoemoe i le amiotonu ua i le faatuatua;

6auā e leai se aoga o le peritome po o le le peritomeina i e o ia Keriso Iesu, tau lava o le faatuatua e matuā galue i le alofa.

7Sa outou taufetuli lelei po o ai ea ua faafelavei ia te outou, ia outou le anaana i le upu moni?

8E le mai le na valaauina outou lenei faaoleole.

9E faafefeteina le palugā falaoa uma lava i sina mea itiiti e faafefete a‘i.

10Ou te matuā faatuatua ia te outou i le Alii, tou te le loto i se tasi mea; a o le na te faaatuatuvaleina outou e oo ai lana sala, e le faailogaina se tasi.

11A o a‘u, le au uso e, afai ou te tala‘i pea i le peritome, se a ea le mea e faasauaina ai pea a‘u? afai o lea, ua faaumatia le mea e tausuai ai i le satauro.

12O lo‘u manao ia vavaeeseina i latou e i latou o e faagaeetia outou.

13Auā le au uso e, ua valaauina outou i le sa‘olotoga; tau lava ina ne‘i avea le sa‘olotoga ma togafiti a le tino; a ia outou auauna le tasi i le tasi i le alofa.

14Auā ua atoatoa le tulafono uma lava i le upu e tasi, o lenei, Ia e alofa atu i lē lua te tuaoi, ia pei o oe lava ia te oe.

15A e afai tou te feūtai ma fe‘ainai, ia outou ina ne‘i faaumatia outou ia te outou.

16Ou te fai atu, ia outou savavali i la le Agaga, ona le faia lea e outou o le tu‘inanau o le tino.

17Auā o le tino ua tu‘inanau lea e tetee atu i le Agaga, ua tu‘inanau foi le Agaga e tetee atu i le tino; ua feteenai foi ia mea, o le mea lea tou te le fai ai mea tou te loto i ai.

18A e afai e ta‘ita‘iina outou e le Agaga, ua le nonofo outou i le tulafono.

19Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu,

20o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga,

21o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

22A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni,

23o le agamalu, ma le le gaoiā; e le faatulafonoina mea faapena.

24A o e o ia Keriso, ua faasatauroina e i latou le tino, ma ona manao, ma ona tu‘inanau.

25Afai ua tatou ola i le Agaga, ia tatou savavali foi i le Agaga.

26Aua ne‘i avea i tatou ma ē mitamita vale, aua ne‘i feluiai, aua ne‘i felosiai.