I. NOFOAIGA A TUPU, 11 - Samoan Old Version Bible

O LE MATAUPU XI.O le faauuina o Tavita, ma lona aea o Ierusalema. O ona tagata totoa.

1Ua faapotopoto mai Isaraelu uma ia Tavita i Heperona, ua faapea mai, Faauta, o i matou nei o ou ivi ma ou aano.

2O anamua foi, ina o fai Saulo ma tupu, o oe lava na e feta‘ita‘iina‘i ia Isaraelu. Na fetalai mai foi Ieova lou Atua ia te oe, O oe e te leoleo i lo‘u nuu o Isaraelu, e fai foi oe ma ta‘ita‘i i lo‘u nuu o Isaraelu.

3Ona o mai lea o toeaina uma o Isaraelu i le tupu i Heperona, ia latou osia le feagaiga ma Tavita i luma o Ieova i Heperona; ua latou faauuina foi Tavita e fai ma tupu ia Isaraelu, e tusa ma le afioga a Ieova ia Samuelu.

4Ona o atu lea o Tavita ma Isaraelu uma i Ierusalema, o Iepuse lea; sa i ai sa Iepusē o e o mau i le nuu.

5Ua fai mai e na mau i Iepuse ia Tavita, E te le sao mai iinei. A ua aea e Tavita le ‘olo o Siona, o le aai foi lea a Tavita.

6Ona faapea atu ai lea o Tavita, O se na te muai fasia sa Iepusē, e fai o ia ma alii sili ma ta‘ita‘i. Na muamua ona alu ae o Ioapo le tama a Seruia, ona fai lea o ia ma alii sili.

7Ua mau Tavita i le ‘olo; o le mea lea na faaigoaina ai e i latou, o le aai o Tavita.

8Ua ati e ia le aai e faataaliolio, e amata mai i Milo e soo ai. Ua faaolaina e Ioapo o e na totoe i le aai.

9Ua tupu pea lava le mamalu o Tavita; sa ia te ia foi Ieova o ‘au.

10O alii sili nei o toa sa ia Tavita, o e na faamalolosi faatasi ma ia i lona malo, atoa ma Isaraelu uma e fai o ia ma tupu, e tusa ma le afioga a Ieova ia Isaraelu.

11O le faitau lenei o toa sa ia Tavita; o Iasapama o le atalii o Hakamoni, o le alii sili ia o e avea ‘au; o ia lava na sii lona tao i tagata e toatolu selau na fasia e ia i le aso e tasi.

12E aupito ane ia te ia o Eleasaro o le atalii o Toto, o lo sa Aoki, o ia o so le au toa e toatolu.

13O ia sa ia Tavita i Fesetame, sa faapotopoto ai Filisitia e tau ai le taua; sa i ai le fāsi fanua ua lilo i karite; na sosola le nuu i luma o Filisitia.

14Ua faamau foi i latou i totonu o le fanua, ua faasaoina ai, ua fāsia foi Filisitia; ua faia foi e Ieova le faaolataga tele.

15Na o ifo le toatolu nai le toatolugafulu o e ua sili, ua oo ia Tavita i le papa i le ana o Atulama, ua to lauapi foi o ‘au a Filisitia i le vanu o sa Rafā.

16Sa i ai Tavita i le ‘olo i ia ona po; o le leoleoga foi o Filisitia sa i Peteleema i ia ona po.

17Ua manao Tavita, ua faapea ane, Ta fia inu vai ai le vaieli o Peteleema o i ai i le faitotoa!

18Ona sofaia lea o ‘au a Filisitia e ia tagata e toatolu, ma ua latou utu ai vai i le vaieli o Peteleema ua i le faitotoa, ua au mai ma ua avane ia Tavita; a ua le mafai Tavita ona inu ai, a ua liligi atu ia Ieova.

19Ua faapea o ia, Lo‘u Atua e, ia mamao ia te au ona faia o lenei mea; ou te inu ea le toto o nei tagata e na toai? Auā na o toai i latou e aumai ai; ua ia le mafai ona inu ai. O mea ia sa faia e ia toa e toatolu.

20O Apisai le uso o Ioapo o ia ua sili i le toatolu o ia foi na sii lona tao i tagata e tolu selau, ua fasi ia i latou, ua ta‘ua ai o ia faatasi ma le toatolu.

21O lo le toatolu, ua sili ona viia o ia i le toalua; sa fai o ia mo latou alii; a e lei aulia le toatolu muamua.

22O Penaia le atalii o Ioita, le atalii o le tagata fitafita mai Kapeseelu, o le na faia mea tetele; o ia na fāsia tagata Moapi e faamataleona e toalua; o ia foi na alu ifo ma fasi le leona i totonu o le lua i ona po o kiona.

23Na fasiotia foi e ia o le tagata Aikupito, o le tagata tinoese lava, e lima kupita lona maualuga. Sa i ai foi i le lima o le Aikupito o le tao e pei o le laau faalava o lē lalaga ie; na ia alu ifo ia te ia ma le tootoo, ua seia le tao nai le lima o le Aikupito, ma na fasioti ia te ia i lona lava tao.

24O mea ia na faia e Penaia le atalii o Ioiata, ua ta‘ua ai o ia faatasi ma toa e toatolu.

25Faauta, sa sili ona viia o ia i le toatolugafulu, a ua le aulia e ia le toatolu muamua. Ua tofia o ia e Tavita e pule i e na faafeao ia te ia.

26O e ua totoa foi i ‘au; o Asaelu le uso o Ioapo, o Eleana le atalii o Toto o le Peteleema,

27o Sama le Arari, o Helesa le Pelone,

28o Ira le atalii o Ikesa le Tikoa, o Apieseru le Anatota,

29o Sepekai o lo sa Usā, o Ilai o lo sa Aokī,

30o Maarai o lo sa Netopā, o Heleta le atalii o Paana o lo sa Netopā,

31o Itai le atalii o Ripai o le Kipea, o le aai a le fanauga a Peniamina, o Penaia le Piratonu,

32o Huri mai vaitafe o Kaasa, o Avielu o le Arepa,

33o Asemau le Paarumi, o Eliepa le Saalepo,

34o atalii o Asema le Kisoni, o Ionatana le atalii o Sage le Arari,

35o Aiamu le atalii o Sakaru le Arari, o Elefala le atalii o Uro,

36o Eferu le Mekira, o Akia le Pelone,

37o Heserai le Karamelu, o Narai le atalii o Esepai,

38o Ioelu le uso o Natano, o Mepekara le atalii o Akara,

39o Seleka o le Amoni, o Naarai le Perota o le soātau o Ioapo le tama a Seruai,

40o Ira le sa Ieterō, o Karepa le sa Ieterō,

41o Uria o lo sa Hetī, o sapata le atalii o Akelai,

42o Atina le atalii o Sesa o lo sa Reupenā, o le alii o sa Reupenā, sa ia te ia foi o tagata e toatolugafulu,

43o Hanana le atalii o Maaka, ma Iosafata le Metini,

44o Usia le Aserota, o Sama ma Ieielu o atalii o Hotama le Aroeru,

45o Ietiaelu le atalii o Semeri, ma Ioka lona uso, o le Tise,

46o Elielu le Makavi, ma Iaripa, ma Iosavia, o atalii o Elenaama, ma Itema o le Moapi,

47o Elielu ma Opeta, ma Iasielu le Mesopaia.