1O ona po ia na ma‘i ai Avia le atalii o Ierepoamo.
2Ona fai atu lea o Ierepoamo i lana ava, Se‘i e tulai ma e ofu i ofu ese, ina ne‘i latou iloa o oe o le avā a Ierepoamo, ma e alu i Sailo; faauta, o loo i ai Akia le perofeta, o le na fai mai ia te au ou te fai ma tupu i lenei nuu.
3Ia e ave foi i lou lima o areto e fuagafulu, ma faapāpā areto, ma le fagu meli, ma e alu atu ia te ia; na te faailoa mai ia te oe pe iu ina faapefea le tama.
4Ua faapea foi ona fai e le avā a Ierepoamo, ua ia tulai atu foi, ma alu i Sailo, na oo i le fale o Akia. A e le mafai ona iloa se mea e Akia, auā sa tōmātūina ona mata ina ua toeaina ia.
5Ona fetalai mai lea o Ieova ia Akia, Faauta, o loo sau le avā a Ierepoamo e fesili atu ia te oe i se mea i lana tama, auā ua ma‘i o ia; o lea, i le ma lea e te fai atu ai ia te ia; auā pe a oo mai o ia e faatagā fafine ese ia.
6Ua faalogo atu e Akia le paūū mai o ona vae ina ua ulufale mai o ia i le faitotoa, ona fai atu lea o ia, Ina maliu mai o oe le faletua o Ierepoamo; se a le mea ua e faatagā fafine ese ai? Ua auina foi a‘u i le feau mamafa ia te oe.
7Ina e alu ia, ina fai atu ia Ierepoamo, O loo faapea ona fetalai mai o Ieova le Atua o Isaraelu, Ua ou faaeaina oe ai le nuu, ma ou faia oe ma ta‘ita‘i i lo‘u nuu o Isaraelu,
8ma ou saeeseina le malo i le aiga o Tavita, ma foaiina atu ai ia te oe; a o oe, ua e le faapei o la‘u auauna o Tavita, o le ua tausi i a‘u poloaiga, ma mulimuli mai ia te au, ma lona loto atoa, e fai na o mea e tusa i o‘u luma;
9a ua sili lava ona e amio leaga i e na muamua uma ia te oe; auā ua e alu, ma e faia mo oe o atua ese, ma tupua uamea, e faaonoono ai ia te au, ua e lafoaiina foi a‘u i ou tua.
10O le mea lea, faauta, ou te faaoo atu ai le leaga i le aiga o Ierepoamo, ma ou faaumatia ia Ierepoamo, o ē tulai atu i se aupa, o pologa atoa ma e sa‘oloto i Isaraelu; ou te ave ese e ua totoe o le aiga o Ierepoamo, e pei o le tagata ona la‘u otaota seia uma lava.
11O so sa Ierepoamō e oti i le aai, e ‘aina lea e ulī; o lē oti i le vao, e ‘aina lea e manu felelei; auā ua fetalai mai ai Ieova.
12A o oe, ina tulai ia ina e alu i lou fale; pe a oo ou vae i le aai, ona oti lea o le tama.
13E taufaitagitu‘i Isaraelu uma ona o ia, ma latou tanu ia te ia; auā ua na o ia o le aiga o Ierepoamo e oo i le tuugamau; auā ua maua i totonu ia te ia se mea lelei ia Ieova le Atua o Isaraelu i le aiga o Ierepoamo.
14E faatuina foi e Ieova mo ia se tupu i Isaraelu, o le na te faaumatia le aiga o Ierepoamo i le aso. O le a foi? O ona poi nei lava.
15Auā e taia e Ieova o Isaraelu, e pei o le u ua luluina i le vai; na te liaiina foi Isaraelu ai lenei nuu lelei na ia foaiina i o latou tamā; na te faataapeape foi ia te i latou i tala atu o le vaitafe, auā ua latou faia o latou tupua o Asaira, ua faaonoono ai ia Ieova.
16Na te tuulafoai foi ia Isaraelu ona o agasala a Ierepoamo, o le ua agasala, o le ua faatupu foi le agasala ia Isaraelu.
17Ona tulai lea o le avā a Ierepoamo, ua alu; ua oo foi o ia i Tiresa; ua papai atu o ia i le faitotoa o le fale ona oti ai lea o le tama.
18Ua latou tanu ia te ia; ua taufaitagitu‘i foi Isaraelu uma ia te ia, e tusa ma le afioga a Ieova na ia fetalai mai ai na aumaia e lana auauna o Akia le perofeta.
19O toe o mea na faia e Ierepoamo, o taua na ia faia, ma le faiga o lona malo, faauta, ua tusia i le tusi o tala i nofoaiga a tupu o Isaraelu.
20O ona po foi na fai ai Ierepoamo ma tupu e lua sefulu ma le lua o tausaga ia; ona taoto ai lea o ia faatasi ma ona tamā; ona soloai ane lea o Natapu lona atalii e fai ma tupu.
21Ua fai Reopoamo le atalii o Solomona ma tupu i Iuta; sa fagafulu ma le tasi o tausaga o Reopoamo ina ua fai ai o ia ma tupu; e tasi le sefulu ma le fitu o tausaga na fai ai o ia ma tupu i Ierusalema, o le aai lea na filifilia e Ieova i itu aiga uma o Isaraelu e tuu ai lona suafa. O le igoa foi o lona tinā o Naama lea o le sa Amonī.
22Ua fai mea leaga e Iuta i luma o Ieova, ua faatupuina e i latou lona fuā i a latou agasala ua latou agasala ai ua sili i mea uma na faia e o latou tamā.
23Auā na latou faia mo i latou o mea maualuluga, ma tupua, ma tupua o Asaira, i luga o mauga maualuluga uma, ma lalo o laau tauluuluola uma.
24Sa i ai foi i le nuu o tagata faasotoma; ua latou faia e tusa ma mea e inosia uma a nuu ese na tulia e Ieova i luma o le fanauga a Isaraelu.
25O le lima o tausaga o le tupu o Reopoamo ua alu ae ai i Ierusalema o Sesaka le tupu o Aikupito.
26Ua ia avea foi le oloa sa i le fale o Ieova, ma le oloa i le fale o le tupu; ua ia avea mea uma lava; ua avea foi e ia o talita auro uma lava na faia e Solomona.
27Ona faia lea e le tupu o Reopoamo o talita ‘apa memea e sui a‘i, ma ia tuuina atu ai i lima o le alii sili o le ‘au e faafeao, o e na leoleo i le faitotoa o le fale o le tupu.
28Ua ave foi e le ‘au e faafeao o ia talita ina o alu atu le tupu i le fale o Ieova, ma latou toe au mai ai i le potu o le ‘au e faafeao.
29O toe o mea na faia e Reopoamo, ma mea uma na ia faia, ua le tusia ea i le tusi o tala i nofoaiga a tupu o Iuta?
30Sa utu tau lava o Reopoamo ma Ierepoamo i aso uma.
31Ua taoto Reopoamo faatasi ma ona tamā ua tanumia foi o ia faatasi ma ona tamā i le aai a tavita. O le igoa foi o lona tinā o Naama o le sa Amonī. Na soloai ane lona atalii o Aviama e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
