1Ona faapotopotoina lea e Solomona o toeaina o Isaraelu, ma matai uma o itu aiga, o alii sili o le fanauga a Isaraelu, i le tupu o Solomona i Ierusalema, ina ia latou avae le atolaau o le feagaiga a Ieova mai le aai a Tavita, o Siona lea.
2Ua faapotopotoina mai foi i le tupu o Solomona o tagata uma o Isaraelu i le tausamiga i le masina o Etanima, o le masina e fitu lea.
3Na o mai toeaina uma o Isaraelu, ua avae foi e le au faitaulaga le atolaau.
4Ua avae e i latou le atolaau a Ieova, ma le fale fetafai o le faapotopotoga, ma mea paia uma lava na i ai i le fale fetafai; ua avae ia lava mea e le au faitaulaga ma sa Levī.
5O le tupu o Solomona, ma le faapotopotoga uma o Isaraelu ua faapotopotoina mai ia te ia, sa i ai i latou ma ia i luma o le atolaau, o loo fai taulaga i mamoe ma povi, e le masino e le mafaitaulia foi, auā ua tele lava.
6Ua ave foi e le au faitaulaga le atolaau o le feagaiga a Ieova i le mea e tuu ai, o le mea e fetalai mai ai o i le fale, o le mea e sili ona paia, i lalo o apaau o kerupi;
7auā ua faaloaloa e kerupi o la apaau e lua i luga o le mea e tuu ai le atolaau; ua faamalumalu foi kerupi i luga o le atolaau, ma luga o ona amo.
8Ua latou tosina mai amo, ua iloa foi pito amo i le mea paia i luma o le mea e fetalai mai ai; a e lei iloa i fafo; o loo i ai ua oo i ona po nei.
9Ua le i ai se mea i le atolaau, ua na o papamaa e lua na tuuina ai e Mose i Horepa, ina ua osia le feagaiga e Ieova ma le fanauga a Isaraelu, ina ua latou o mai mai le nuu o Aikupito.
10Ua ulufafo le au faitaulaga ai le mea paia, ona tumu lea o le fale o Ieova i le ao.
11Ua le mafai le au faitaulaga ona tutū e auauna ona o le ao; auā ua tumu le fale o Ieova i le pupula o Ieova.
12Ona faapea atu lea o Solomona, Na fetalai mai Ieova, e afio o ia i le pogisa.
13Ua ou faia lava le fale mo oe e te afio ai, o le afioaga e te afio ai e faavavau.
14Ona liliu atu lea o le tupu, ma faamanuia atu i le faapotopotoga uma o Isaraelu; ua tutū mai foi le faapotopotoga uma o Isaraelu;
15ua ia faapea atu, Ia faafetaia Ieova le Atua o Isaraelu, o le na tulei mai lona siufofoga i lo‘u tamā o Tavita, ma ua faataunuuina mai i lona aao, ua faapea mai,
16Talu lava le aso na ou au mai ai lo‘u nuu o Isaraelu mai Aikupito, ou te lei filifilia se aai i itu aiga uma o Isaraelu e fai ai se fale, ina ia i ai lo‘u igoa; a o Tavita ua ou filifilia o ia e pule i lo‘u nuu o Isaraelu.
17Sa loto foi lo‘u tamā o Tavita e fai se fale mo le suafa o Ieova le Atua o Isaraelu.
18Na fetalai mai Ieova i lo‘u tamā o Tavita, Auā ua e loto ina fai se fale i lo‘u igoa ua lelei ina ua i ai i lou loto.
19A e peitai oe, e te le faia le fale; a o lou atalii, o lau lava fanau, o ia na te faia le fale mo lo‘u igoa.
20Ua faataunuuina foi e Ieova o lana afioga na ia fetalaia mai, ua nofo atu foi a‘u e fai ma sui o lo‘u tamā o Tavita, ua ou tietie foi i le nofoālii o Isaraelu, e faapei ona fetalai mai ai Ieova, ua ou faia foi le fale mo le suafa o Ieova le Atua o Isaraelu.
21Ua ou saunia foi i ai se mea e tuu ai le atolaau, o loo i ai le feagaiga a Ieova na ia osia ma o tatou tamā ina ua aumaia i latou e ia mai le nuu o Aikupito.
22Ona tulai atu lea o Solomona i luma o le fata faitaulaga o Ieova, i luma o le faapotopotoga uma o Isaraelu, ua na faaloaloa ae foi ona lima i le lagi;
23ua faapea atu foi o ia, Ieova e, le Atua o Isaraelu, e leai se atua e tusa ma oe i le lagi i luga, po o le lalolagi i lalo nei, o loo e tausia le feagaiga ma le alofa i au auauna o e savavali i ou luma ma o latou loto atoa;
24o oe ua e tausia i lau auauna o Tavita lo‘u tamā o le mea na e fetalai mai ai ia te ia; na e fetalai mai i lou fofoga, o lou aao foi ua e faataunuuina ai, e faapei ona fai i le aso nei.
25O lenei, Ieova e, le Atua o Isaraelu, Ia e tausia i lau auauna o Tavita lo‘u tamā o le mea na e fetalai mai ai ia te ia, ua faapea mai, E le aunoa se tagata ia te oe i o‘u luma e tietie i le nofoālii o Isaraelu; tau lava ina tausia e au fanau o latou ala, ina ia latou savavali i o‘u luma, e pei ona ē savali i o‘u luma.
26O lenei, le Atua o Isaraelu e, se‘i faamaonia lau afioga na e fetalaia mai i lau auauna o Tavita lo‘u tamā.
27Pe moni ea, e afio le Atua i le lalolagi? Faauta, o le lagi ma le lagi o lagi, e le ofi ai oe, e le atili ai ea ona ē le ofi i lenei fale ua ou faia?
28A ia e liuliualo mai i le tatalo a lau auauna ma lana aioi, Ieova e, lo‘u Atua, ma faafofoga mai i le valaau ma le tatalo, o loo talotalo ai lau auauna i ou luma i le aso nei;
29ina ia silasila mai ou fofoga i lenei fale i le po atoa ma le ao, o le mea na e fetalai mai ai, E i ai lo‘u igoa: ina ia e faafofoga mai i le tatalo e tatalo atu ai lau auauna i lenei mea.
30Ia e faafofoga mai foi i le aioi a lau auauna, ma lou nuu o Isaraelu, pe a latou tatalo atu i lenei mea; ia e faafofoga mai foi mai le lagi, o le mea o loo e afio ai; ia e faafofoga mai, ma ia e faamagalo mai.
31Afai e agasala se tasi tagata i le tasi, ma ua fai atu o ia ia te ia na te faia se tautoga, ina ia tauto ai o ia, a oo mai foi le tautoga i luma o lou fata faitaulaga i lenei fale;
32ia e faafofoga mai i le lagi, ma ia e faia le faamasinoga i au auauna, e faasala i le ua amioleaga, ia tauia lana amio ia te ia lava; e ta‘u amiotonuina foi le ua amiotonu, ia foaiina atu ia te ia e tusa ma lana amiotonu.
33A fasia lou nuu o Isaraelu i luma o e ita mai, ina ua latou agasala atu ia te oe; a latou toe foi mai ia te oe, ma ta‘uta‘u atu lou suafa, ma tatalo, ma aioi atu ia te oe i lenei fale;
34ia e faafofoga mai i le lagi, ma e faamagalo mai le agasala a lou nuu o Isaraelu, ma e faafoisia mai i latou i le lalueleele na e foaiina mai i o latou tamā.
35A punitia le lagi, ma ua leai se ua, ina ua latou agasala atu ia te oe; afai latou te tatalo i lenei mea, ma latou ta‘uta‘u atu lou suafa, ma liliu ese i a latou agasala, pe a e faatiga ia te i latou;
36ia e faafogafoga mai i le lagi, ma e faamagalo mai le agasala a au auauna, ma lou nuu o Isaraelu, ma ia e a‘oa‘o ia te i latou i le ala lelei latou te savavali ai; ia e foai mai foi le ua i luga o lou laueleele, na e foaiina mai i lou nuu e fai mo latou tofi.
37Afai e i ai i le nuu le oge, afai e i ai le faama‘i, po o le mamae, le polopologā, po o le sē akerise, afai foi e i ai le sē kasili; afai foi e siosiomia i latou i le nuu o i ai a latou aai e i latou o e ita mai; so se mala, po o se ma‘i e i ai;
38o talosaga uma ma aioi uma e faia e se tagata, po o lou nuu o Isaraelu uma; e taitasi uma o e iloa le tiga o latou loto, ma faaloaloa o latou lima i lenei fale;
39ia e faafofoga mai mai le lagi, o le mea o loo e afio ai, ma e faamagalo mai, ma e faia, ma foai mai i tagata taitoatasi e tusa ma ana amio uma, ua e silafia lona loto; auā na o oe lava ua e silafia loto o tagata uma lava;
40ina ia latou matatau ia te oe i aso uma latou te ola ai i le laueleele na e foaiina mai i o matou tamā.
41O le tagata ese foi, e le so lou nuu o Isaraelu, a ua sau o ia mai le nuu mamao ona o lou suafa;
42(auā e faalogo i latou i lou suafa mamalu, ma lou aao malosi, ma lou aao faaloaloa;) pe a sau o ia, ma tatalo i lenei fale;
43ia e faafofoga mai mai le lagi, o le mea o loo e afio ai, ma e faia e tusa ma mea uma e valaau atu ai le tagata ese ia te oe; ina ia iloa lou suafa e nuu uma lava i le lalolagi, ma ia latou matatau ia te oe, e faapei o lou nuu o Isaraelu, ia latou iloa foi ua igoa i lou suafa lenei fale ua ou faia.
44Afai e o atu lou nuu e tau le taua ma e ua ita mai ia te i latou, i se mea e te aauina atu ai i latou, ma latou talotalo atu ia Ieova o faasaga mai i le aai ua e filifilia, ma le fale ua ou faia mo lou suafa;
45ia e faafofoga mai i le lagi i a latou tatalo ma a latou aioi, ma ia e fai le faamasinoga mo i latou.
46Pe afai latou te agasala atu ia te oe, (auā e leai se tagata e le agasala,) ma e toasa mai ia te i latou, ma e tuuina i latou i e ita mai ia te i latou, ma latou ave ia te i latou faatagataotaua i le nuu o e ita mai, pe mamao pe latalata mai;
47afai e toe manatu o latou loto i le nuu e avea i ai i latou o faatagataotaua, ma latou liliu mai, ma aioi mai ia te oe i le nuu o e ave ia te i latou faatagataotaua, ma latou faapea atu, Ua matou agasala, ma faapiopio, ua amio leaga i matou:
48afai latou te liliu mai ia te oe ma o latou loto atoa, ma o latou agaga atoa i le nuu o e ita mai ia te i latou, o e ave ia te i latou faatagataotaua, ma latou talotalo ia te oe o faasaga mai i lo latou nuu na e foaiina mai i o latou tamā, o le aai na e filifilia, ma le fale ua ou faia mo lou suafa;
49ia e faafofoga mai mai le lagi, o le mea o loo e afio ai, i a latou tatalo ma a latou aioi, ma ia e fai le faamasinoga mo i latou,
50ma e faamagalo mai i lou nuu o e ua agasala atu ia te oe, i o latou solitulafono uma ua latou soli ai au tulafono, ma ia e pule ia alofaina i latou e i latou o e ave ia te i latou faatagataotaua, ia latou alolofa ia te i latou;
51auā o lou nuu ma lou tofi i latou, na e aumaia mai le nuu o Aikupito, mai totonu o le ogaumu e tunu ai uamea;
52ia silasila mai ou fofoga i le aioi a lau auauna, ma le aioi a lou nuu o Isaraelu, ia e faafofoga mai ia te i latou i mea uma latou te valaau atu ai ia te oe.
53Auā le Alii e, Ieova, na e vavae mai ia te i latou ai nuu uma i le lalolagi e fai mou tofi, e faapei o lau afioga na aumaia e lau auauna o Mose, ina ua e au mai i o matou tamā mai Aikupito.
54Ua faaumaina e Solomona ona tatalo ia Ieova i lenei tatalo ma lenei aioi uma, ona tulai lea o ia mai luma o le fata faitaulaga o Ieova, sa tootuli ai ona tulivae, ma faaloaloa ae ona lima i le lagi.
55Ona tu lea o ia, ma faamanuia atu i le faapotopotoga uma o Isaraelu ua leo tele, ua faapea atu,
56Ia faafetaia Ieova o le ua foaiina mai le malologa i lona nuu o Isaraelu, e tusa ma mea uma na ia fetalaia mai ai, e leai se upu e tasi ua le taunuu o ana upu lelei uma na ia folafolaina mai na faaoo mai e lana auauna o Mose.
57Ia ia te i tatou Ieova lo tatou Atua, e pei ona i ai o ia i o tatou tamā; aua ne‘i tuua i tatou e ia; aua foi ne‘i lafoaiina i tatou e ia;
58ina ia faaliliuina e ia o tatou loto ia te ia, ia tatou savavali i ona ala uma, ma tatou tausi i ana poloaiga, ma ana tulafono, ma ana faamasinoga, na ia poloai mai ai i o tatou tamā.
59O a‘u upu nei foi ua ou aioi atu ai i luma o Ieova, ia latalata ia ia Ieova lo tatou Atua i le ao atoa ma le po, ia faia e ia le faamasinoga mo lana auauna, ma le faamasinoga mo lona nuu o Isaraelu, o le aso ma lana mea;
60ina ia iloa e nuu uma i le lalolagi, o Ieova o le Atua ia, e leai se tasi.
61O lenei, ia atoatoa o outou loto ia Ieova lo tatou Atua, e savavali i ana tulafono, ma tausi i ana poloaiga, e faapei ona fai i le aso nei.
62Ua fai taulaga le tupu, ma le nuu uma o Isaraelu faatasi ma ia i luma o Ieova.
63Ua faia foi e Solomona o le taulaga faafetai, na ia faia ia Ieova, o povi e lua sefulu o afe ma afe e lua, ma mamoe e selau afe ma afe e luafulu. Ua faapea ona faaulufaleina o le fale o Ieova e le tupu ma le fanauga a Isaraelu uma.
64O lea lava aso na faapaiaina ai e le tupu o le lotoā i totonu i luma o le fale o Ieova; auā na faia e ia i lea mea o taulaga mu, ma taulaga i mea e ‘ai, ma le ga‘o o taulaga faafetai; auā sa itiiti le fata faitaulaga ‘apa memea i luma o Ieova, na le ofi ai taulaga mu, ma taulaga i mea e ‘ai, ma le ga‘o o taulaga faafetai.
65O ona po ia na fai ai e Solomona ma Isaraelu uma faatasi ma ia, o le tausamiga i luma o Ieova lo tatou Atua, o le faapotopotoga tele, e afua mai i le mea e ui atu ai i Amato, e gata mai i le alia o Aikupito, o po e fitu ma po e fitu, ua aloa ai po e sefulu ma le fa.
66O lona po valu ua tuuina atu ai e ia o le nuu; ua latou faamanuia atu foi i le tupu, ma latou o i o latou fale ie ma le olioli ma le loto fiafia, ona o mea lelei uma na faia e Ieova mo lana auauna o Tavita, ma lona nuu o Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
