ESEKIELU, 42 - Samoan Old Version Bible

O LE MATAUPU XLII.O potu o ositaulaga ma le fua o le lotoā aupito i tua.

1Ona ia aumaia lea o a‘u i le lotoā aupito i tua, i le ala e faasaga i le itu i matu; na ia au mai foi ia te au i le potu i luma o le mea vavaeina, na i luma o le fale i le itu i matu.

2O lona umi o le mea e oo atu i le faitotoa i le itu i matu e selau ona kupita, o le lautele foi e limagafulu ona kupita.

3E feagai ma kupita e lua sefulu sa i ai i le lotoā tuloto, e feagai foi ma le paepae sa i le lotoā aupito i tua, sa i ai fogāfale o feagai ma fogāfale e taitolu o pae fale.

4Na i ai i luma o potu le mea e fealuai ai e sefulu ona kupita lona lautele o faasaga i totonu, o le ala e tasi le kupita; o latou faitotoa foi ua faasaga i le itu i matu.

5A ua maulalo potu aupitoaluga; auā o fogāfale ua faaitiitiina ai i latou o e na aupitoalalo, ma e na i le ogaloto o le fale.

6Auā e tolu pae fale i latou, a e leai ni o latou pou e pei o pou o lotoā; o le mea lea na sili ai ona faavāiti i latou i e aupitoalalo, ma e na i le ogaloto e fua mai i lalo.

7O le pa foi na i tua e lata ane i potu, ua faasaga i le lotoā aupito i tua i luma o potu, e limagafulu o kupita, o lona umi lea.

8Auā o le umi o potu na i le lotoā aupito i tua e limagafulu ona kupita ia; faauta foi, e selau kupita i luma o le malumalu.

9Na i ai foi le ala i le itu i sasae i lalo o ia potu, i le mea e ui atu i ai pe a sau mai le lotoā aupito i tua.

10Na i ai potu i le mafiafia o le pa o le lotoā i le itu i sasae, i luma o le mea vavaeeseina, i luma foi o le fale.

11O le ala foi i o latou luma e pei ona tino mai o potu sa faasaga i le itu i matu, e tusa ma ia lona umi, e tusa ma ia foi lona lautele; o latou ala uma e ui atu ai e tusa ma o latou uiga, e tusa foi ma o latou faitotoa.

12E tusa foi ma faitotoa o potu sa faasaga i le itu i toga; na i ai le faitotoa i le mea e amata mai ai le ala, o le ala i luma tonu o le pa e faasaga i sasae, pe a ulu atu ai i latou.

13Ona fai mai lea o ia ia te au, O potu o i le itu i matu, ma potu i le itu i toga ua i luma o le mea ua vavaeeseina, o potu paia ia e aai ai i mea e sili ona paia e le au ositaulaga o e faalatalata ia Ieova; e tuu ai foi e i latou mea e sili ona paia, ma le taulaga i mea e ‘ai, ma le taulaga mo le agasala, ma le taulaga mo le sese; auā e paia lea mea.

14A ulufale atu ai ositaulaga, ona latou le o ese lea i le mea paia e o atu ai i le lotoā aupito i tua, a e latou te tuuina ai o latou ofu latou te auauna a‘i; auā na paia ia; latou te oofu foi i nisi ofu, ma latou faalatalata i mea e fai ma le nuu.

15Ua uma ona fuatia e ia o le fale tuloto, ona ia aumaia lea o a‘u i le ala i le puipui e faasaga i sasae; ua ia fuatia foi ona itu uma.

16Ua ia fuatia le itu i sasae i le u e fua a‘i, e lima selau o u i le u e fua a‘i, ua soo ai.

17Ua ia fuatia le itu i matu, e lima selau o u i le u e fua a‘i, ua soo ai.

18Ua ia fuatia le itu i toga, e lima selau o u i le u e fua a‘i.

19Ua ia liliu ane i le itu i sisifo, ua ia fuatia ai o u e lima selau i le u e fua a‘i.

20Ua ia fuatia ona itu e fa; na i ai le pa e soo ai e lima selau lona umi, e lima selau foi lona lautele, e va a‘i le mea e paia ma le mea e le paia.