1Ua asiasi Ieova ia Sara e pei ona ia fetalaia mai, ua faia foi e Ieova ia Sara e pei ona ia fetalai mai.
2Ua to foi Sara, ua fanau e ia se atalii mo Aperaamo, ina o toeaina o ia, i ona lava po sa fetalai mai ai le Atua ia te ia.
3Ua faaigoa foi e Aperaamo lona atalii na fanau mai ia te ia, o le na fanau mai e Sara ia te ia, o Isaako.
4Ua peritomeina foi e Aperaamo lona atalii o Isaako i lona aso valu, e pei ona poloai mai o le Atua ia te ia.
5O le selau o tausaga o Aperaamo na fanau ai lona atalii o Isaako.
6Ua fai ane foi Sara, Ua faa‘ata‘ataina a‘u e le Atua, o i latou uma o e faalogo mai latou te taufaiata faatasi ma a‘u.
7Ua faapea foi o ia, Na fai e fai atu ea se tasi ia Aperaamo, O le a faasusu se tama e Sara auā ua ou fanauina lona atalii ina ua toeaina o ia.
8Ua tupu le tama, ua te‘a foi ma le susu; ua faia foi e Aperaamo le tausamiga tele i le aso na te‘a ai Isaako ma le susu.
9Ua vaai foi Sara i le tama a Akara le Aikupito ua fanauina e ia ia Aperaamo, o loo tauemu ia.
10Ona fai atu lea o ia ia Aperaamo, Ina tuli ese ia o lena fafine pologa ma lana tama; auā e le tofia faatasi le tama a lena fafine pologa ma la‘u tama o Isaako.
11Ua tiga lava Aperaamo i lenei mea ona o lona atalii.
12A ua fetalai mai le Atua ia Aperaamo, Aua e te tiga ona o le tama, atoa ma lou fafine pologa; o mea uma ua fai atu ai Sara ia te oe ia e usiusitai i ai i lana upu, auā e valaauina lau fanau ia Isaako.
13O le tama foi a le fafine pologa ou te fai o ia ma tupuga o se nuu, auā o lau fanau ia.
14Ona ala tulai lea o Aperaamo i le taeao, ua tago i mea e ‘ai ma le fagu pa‘u vai, ma avatu ia Akara, ma faaee i ai i lona fuatāua, ua tuu atu foi le tama, ua aueseina o ia; ona alu lea o ia, ma feseai i le vao o Peresepa.
15Ua uma foi le vai sa i le fagu pa‘u, ona tuu atu lea e ia le tama i lalo ifo o le tasi laau itiiti.
16A ua alu atu o ia, ua nofo mamao mai, e pei o le mea e paū atu i ai le u pe a fana atu; auā ua faapea ane o ia, E aua ne‘i ou vaai i le oti o le tama. Ua ia nofo mai foi, ma tagi leo tele lava.
17Ua faafofogaina foi e le Atua le leo o le tama; ona valaau mai lea o le agelu a le Atua ia Akara mai le lagi, ua faapea mai ia te ia, Akara e, ua faapefea ea oe? Aua e te fefe, auā ua faafofogaina e le Atua le leo o le tama i le mea o i ai o ia.
18Ina tulai ia, ina tago i le tama, ma talitali ae ia te ia i ou lima, auā ou te fai o ia ma tupuga o le nuu tele.
19Ua faapupulaina‘e le Atua ona mata, ona iloa ai lea e ia o le vaieli; ona alu lea o ia, ua utu ai le fagu pa‘u i le vai, ma faainu ai le tama.
20Sa i ai le Atua i le tama; ua tupu foi e ia, ua ia mau foi i le vao, ma ua avea ma tagata fanafana u.
21Sa mau foi o ia i le vao o Parana; ua au mai foi e lona tinā se avā ma ia mai le nuu o Aikupito.
22O ona po ia na fai mai ai Apimeleko ma Fikolu o le alii e pule i ana ‘au, ia Aperaamo, ua faapea mai, Ua ia te oe le Atua i mea uma e te faia;
23o lenei, ia e tauto mai iinei ia te au i le Atua, e te le pepelo mai ia te au, po o lo‘u atalii, po o le atalii o lo‘u atalii; a ia pei o lo‘u alofa atu ia te oe, ia e faapea mai foi ia te au, atoa ma le nuu ua e āumau ai.
24Ona tali atu lea o Aperaamo, Ou te tauto lava.
25Ua aoai atu foi Aperaamo ia Apimeleko ona o le vaieli, na fao e auauna a Apimeleko.
26Ona faapea mai lea o Apimeleko, Ou te le iloa po o ai ua na faia lena mea; na e le ta‘u mai foi ia te au, o a‘u nei foi, ou te faatoa faalogo i ai i le asō.
27Ona ave lea e Aperaamo o mamoe ma povi, ma foai atu ma Apimeleko; ona la osia lea o la la feagaiga.
28Ua vavae ese e Aperaamo o tamai mamoe fafine e fitu.
29Ona fai mai lea o Apimeleko ia Aperaamo, E faapefea na tamai mamoe fafine e fitu ua e vavae ese?
30Ona tali atu lea o Aperaamo, Ia e ave ma oe o na tamai mamoe fafine e fitu, e fai ma faailoga ia te au, na a‘u elia lenei vai.
31O le mea lea na faaigoa ai e ia o lea mea o Peresepa, auā na la tauto ai.
32Ua la osia foi la la feagaiga i Peresepa; ona tulai lea o Apimeleko ma Fikolu le pule i ana ‘au, ma la toe foi atu i le nuu o Filisitia.
33Ua totō foi e Aperaamo le ulu laau i Peresepa, ma ua valaau atu i lea mea i le suafa o Ieova, o le Atua e faavavau.
34E tele foi aso sa āumau ai Aperaamo i le nuu o Filisitia.
Who We AreWhat We EelieveWhat We Do
2025 by iamachristian.org,Inc All rights reserved.
