1Ua alu atu Isaraelu e tau ma Filisitia; ua latou to lauapi i Epenesa, a o Filisitia ua to lauapi i latou i Afeka.
2Ua tofi le taua e Filisitia, ua faasaga mai ia Isaraelu; ua tau solo le taua, ona fasia lea o Isaraelu e Filisitia; ua latou fafasi ‘au o le taua i le tafā, pe atoa le fa o afe o tagata.
3Ua foi atu le nuu i le togālauapi, ona fai ane lea o toeaina o Isaraelu, O le a le mea ua fasia ai tatou e Ieova i le asō i luma o Filisitia? Ina tatou au mai ia le atolaau o le feagaiga a Ieova mai Sailo ia te i tatou, a oo mai ia te i tatou, ona faaolaina ai lea o i tatou ai lima o le itu tauā.
4Ua alu le feau a le nuu i Sailo e au mai ai le atolaau o le feagaiga a Ieova o ‘au o loo afio i le va o kerupi. Sa i ai foi ma le atolaau o le feagaiga a le Atua o atalii e toalua o Eli, o Hofeni ma Fineaso.
5Ua oo atu le atolaau o le feagaiga a Ieova i le togālauapi, ona alalaga ai lea o Isaraelu uma ma le alaga tele, ua u ai le eleele.
6Ua lagona e Filisitia le taalili o le alaga, ona fai ane lea, Se a lena alaga tele ua taalili mai i le togālauapi a Eperu? Ona latou iloa lea o le atolaau a Ieova ua au mai i le togālauapi.
7Ua fefefe foi Filisitia, auā ua faapea i latou, Ua oo ane le Atua i le togālauapi; ua latou fai ane foi, O i Talofa ia te i tatou, auā e lei faapea anamua.
8O i Talofa ia te i tatou, o ai se laveai ia te i tatou ai lima o ia atua mamana? O atua ia na latou fasia Aikupito i fasiga uma i le vao.
9Filisitia e, ina faamalolosi ia, ia outou faatamatane, ne‘i fai i tatou ma pologa ia Eperu, faapei ona fai i latou ma pologa ia te outou; ia outou faatamatane, ma ia outou tau ma i latou.
10Ua tau Filisitia ma i latou; ua fasia Isaraelu, ua taitasi ma sola i lona fale ie, sa tele lava le fasi; o Isaraelu na fasia e tolugafulu o afe o i latou o ‘au e savavali.
11Ua avea foi le atolaau a le Atua; o atalii e toalua o Eli, o Hofeni ma Fineaso, ua oti i laua.
12Ua momo‘e mai le tagata Peniamina nai le taua, ua oo i Sailo i lea lava aso; ua saeia ona ofu, ma le eleele ua i luga o lona ulu.
13Ua alu ane ia, faauta foi, ua tietie Eli i le nofoa i le itu ala, o loo faatalitali ai, auā ua gatete lona loto i le atolaau a le Atua; ua sau le tagata, ua ta‘u mai i le nuu, ona alalaga ai lea o le nuu uma.
14Ua faalogo Eli i le leo o le alaga, ona fai ane lea o ia, O le a lena taalili? Ona faataalise lea o le tagata, ua sau ma faailoa mai ai ia Eli.
15A o Eli ua ivagafulu ma le valu ona tausaga, ua tōmātūina ona mata, ua le mavaai.
16Ua fai mai le tagata ia Eli, O a‘u nei na ou sau mai le taua; na ou sola mai le taua i le aso nei. Ua fai atu ia, Sole se a ea lau tala?
17Ua tali mai le na au mai le tala, ua faapea mai, Ua sosola Isaraelu i luma o Filisitia, ma ua tele le fasi o le nuu; ua maliliu foi ou atalii e toalua, o Hofeni ma Fineaso; ua avea foi le atolaau a le Atua.
18Ua oo ina ta‘ua mai e ia o le atolaau a le Atua, ona paū ai lea o ia i tua nai luga o le nofoa i tafatafa o le faitotoa, ua gau lona ua, ua oti ai, auā o le toeaina, ua mamafa foi ia. Na ia faamasino ia Isaraelu i tausaga e fagafulu.
19O le avā a lona atalii o Fineaso, ua latalata ona fanau; ua faalogo o ia i le tala, ua avea le atolaau a le Atua, ua oti foi le tamā o lana tane atoa ma lana tane, ona tootuli ai lea o ia ua fanau, auā ua faafuasei ona faatiga o ia.
20Ua oo ina a oti ia, ua fai mai fafine e na tutu ai ia te ia, Aua le fefe, ua e fanau mai sau tama tane; a ua le tali atu o ia, ua le tuu i ai foi i lona loto.
21Ua ia faaigoa i le tama, o Ikapoti, o loo faapea ia, Ua avea le mamalu nai ia Isaraelu; ina ua Avea le atolaau e le Atua, ona o le tamā foi o lana tane, atoa ma lana tane.
22Ua fai ane ia, Ua avea le mamalu nai ia Isaraelu, auā ua avea le atolaau a le Atua.
Who We AreWhat We EelieveWhat We Do
2025 by iamachristian.org,Inc All rights reserved.
