1O oe foi le atalii o le tagata, ia e vavalo atu i mauga o Isaraelu, ma e fai atu, Mauga o Isaraelu e, faalogologo mai ia i le afioga a Ieova.
2Ua faapea ona fetalai mai o le Alii o Ieova, Ua fai mai ia te outou le ua ita mai, Ue! ua fai mo i matou mea maualuga o le vavau;
3o le mea lea ia e vavalo atu ai, ma e fai atu, Ua faapea ona fetalai mai o le Alii o Ieova, Ua latou faatafunaina outou, ma naunau i le fia maua outou i itu uma, ina ia fai outou mo e o totoe o nuu ese, ma ua ta‘uta‘uina outou e tagata faitala, ma ua ta‘uleagaina e le nuu;
4o le mea lava lea, mauga o Isaraelu e, ia outou faalogologo mai ai i le afioga a le Alii o Ieova, Ua faapea ona fetalai mai o le Alii o Ieova i mauga, ma mauga iti, ma vaitafe, ma vanu, ma mea gaogao ua faatafunaina, ma aai ua tuufua, ua faoa, ma ua tauemua e i latou ua totoe o nuu ese i itu uma.
5O le mea lea ua faapea ona fetalai mai ai o le Alii o Ieova, O le afi lava o lo‘u fuā ua ou fai atu ai i e ua totoe o nuu ese, atoa ma Etoma uma, o e ua avea lo‘u laueleele e fai mo latou, ma le fiafia o le loto atoa, ma le ‘ino‘ino o loto, ina ia faoa e fai ma vete.
6O le mea lea ia e vavalo atu ai i le laueleele o Isaraelu, ma fai atu i mauga, ma mauga iti, ma vaitafe, ma vanu, O loo faapea ona fetalai mai o le Alii o Ieova, Faauta, o lo‘u fuā ma lo‘u ita tele ua ou tautala atu ai; auā ua oo ia te outou le faamasiasiga o nuu ese.
7O le mea lea ua faapea ona fetalai mai ai o le Alii o Ieova, Ua ou sii lo‘u lima, ua faapea, O nuu ese o vagavagai ia te outou, e masiasi lava i latou.
8A o outou mauga o Isaraelu e, e tutupu o outou la laau, e fua mai foi a outou fua mā lo‘u nuu o Isaraelu; auā ua latalata ona latou o mai.
9Auā faauta, ou te i ai ia te outou, ou te faasaga atu foi ia te outou, ona galueaiina lea outou ma faatoaina.
10Ou te faauluolaina foi tagata ia te outou, o le aiga uma o Isaraelu, o lona atoatoa lava; e āina foi aai, e atiina ae foi mea ua faatafunaina.
11Ou te faauluolaina o tagata atoa ma manu ia te outou; e uluola lava i latou ma fananau; o a‘u e āinaina ai outou e pei o ona tuga tuai ia te outou, ou te agalelei foi ia te outou e sili i lo outou uluai āina; ona outou iloa ai lea o a‘u lava o Ieova.
12Ou te faafeoaiina tagata i luga ia te outou, o lo‘u lava nuu o Isaraelu; e fai oe mo latou, e fai foi oe mo latou tofi, e te le toe faaumatia lava tagata ai ia te i latou.
13Ua faapea ona fetalai mai o le Alii o Ieova, Ua latou faapea atu ia te outou, O oe ua e ‘ai tagata, ma ua e faaumatia tagata o ou nuu;
14o le mea lea e te le toe ‘ai tagata ai lava, e te le toe faaumatia foi tagata ai ou nuu, o loo fetalai mai ai le Alii o Ieova.
15O a‘u foi e le toe lagona ai le faamasiasiga o nuu ese, e le toe oo atu lava ia te oe le faaluma mai o tagata, e le toe faatausuaiina foi ou nuu, o loo fetalai mai ai le Alii o Ieova.
16Ua oo mai foi le afioga a Ieova ia te au, ua faapea mai,
17Le atalii e o le tagata, sa mau le aiga o Isaraelu i lo latou lava laueleele, ona leaga ai lea ia te i latou i a latou amio ma a latou mea na fai; sa tusa a latou amio i o‘u luma ma le leaga o le fafine ua nofo ese.
18O le mea lea na ou sasaa ai lo‘u ita i luga ia te i latou, ona o le toto na latou faamaligiina i luga o le eleele, ona o a latou tupua foi na latou faaleagaina ai le nuu.
19Na ou faataapeape foi ia te i latou i nuu ese, ma faasalalauina i latou i nuu eseese; na ou faasala foi ia te i latou e tusa ma o latou ala, e tusa foi ma a latou mea na fai.
20Ua latou oo atu i nuu ese, na latou o i ai, ona ta‘uvaleina ai lea o lo‘u igoa paia ona o i latou, ina ua faapea ane ia te i latou, O le nuu lea o Ieova, ua latou o mai nai lona laueleele.
21A e peitai na ou alofa ona o lo‘u igoa paia, o le na ta‘uvaleina e le aiga o Isaraelu i nuu ese na latou o i ai.
22O le mea lea ia e fai atu ai i le aiga o Isaraelu, Ua faapea ona fetalai mai o le Alii o Ieova, Ou te le faia lea mea ona o outou, le aiga o Isaraelu e, a o lo‘u igoa paia o le ua outou ta‘uvaleina i nuu ese ua outou o i ai.
23Ou te faapaiaina lo‘u igoa mamalu ua ta‘uvaleina i nuu ese, o le ua ta‘uvaleina lava e outou i totonu ia te i latou; e iloa ai foi e nuu ese o a‘u lava o Ieova, o loo fetalai mai ai le Alii o Ieova, pe a ta‘upaiaina o a‘u ia te outou i o outou luma.
24Auā ou te avea outou ai nuu ese, ma ou faapotopotoina outou mai nuu eseese uma, ma ou aumaia outou i lo outou laueleele.
25Ona ou sausauina lea o outou i le vai manino, ona mamā ai lea o outou; ou te faamamāina foi outou i lo outou leaga uma, ma a outou tupua uma.
26Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa ai o outou tino, ma ou avatu ia te outou le loto aano.
27Ou te tuuina atu lo‘u Agaga i totonu ia te outou, tou te savavali ai i a‘u tulafono, tou te anaana foi i a‘u faamasinoga, ma outou faia.
28Tou te nonofo foi i le nuu na ou foaiina atu i o outou tamā; e fai foi outou mo‘u nuu, e fai foi a‘u mo outou Atua.
29Ou te faaolaina foi outou ai lo outou leaga uma; ou te valaau foi i le saito, ma ou faatuputeleina, a e ou te le tuu atu se oge ia te outou.
30Ou te faatuputeleina foi fua o laau, ma mea e tutupu i le eleele, ina ia le toe oo ia te outou le faaluma mai o nuu ese ona o le oge.
31Ona outou manatunatu ai lea i o outou lava ala leaga ma mea sa outou faia e le o i ai se lelei, tou te ‘ino‘ino ai lava outou ia te outou ona o a outou amio leaga, atoa ma a outou mea e inosia.
32O loo fetalai mai le Alii o Ieova, Ia iloa e outou ou te le faia ia mea ona o outou; ia outou mamā ma ia outou masiasi ona o outou ala, le aiga o Isaraelu.
33Ua faapea ona fetalai mai o le Alii o Ieova, O le aso ou te faamamāina ai outou i a outou amio leaga uma, o a‘u e āina ai a outou aai, e atiina ae foi mea ua faatafunaina.
34E galueaiina foi le laueleele sa faaatafunaina, sa faatafunaina lava i luma o i latou uma e na ui ane ai.
35Ona latou fai ane lea, O lenei laueleele sa faatafunaina, ua avea e pei o le faatoaga o Etena; o aai foi sa gaogao, ma faatafunaina, ma lepetia, ua nofo ‘olo i latou ua āina.
36Ona iloa ai lea e nuu ese o e totoe i o outou itu uma, o a‘u o Ieova ua ou atiina ae mea sa lepetia, ma faatoaina le mea sa faatafunaina; o a‘u o Ieova ua ou fai atu ai, ou te faia lava.
37O loo faapea ona fetalai mai o le Alii o Ieova, E ui i lea, a e sailia mai pea o a‘u e le aiga o Isaraelu, ia faia ia mea mo i latou; ou te faatoateleina foi i latou e pei se lafu tagata.
38E pei o le lafu paia, e pei o le lafu o Ierusalema i ona tausamiga, e faapea ona faatutumuina o aai gaogao i lafu tagata; latou te iloa ai o a‘u lava o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
