1O lo‘u manao ia outou onosai teisi ia te au i lo‘u valea; ia onosai mai lava ia te au.
2Auā ua ou maelega alofa ia te outou i le maelega e tatau i le Atua; aua ua uma ona ou fāufautane ia te outou i le tane e toatasi, ina ia ou momoli ia te outou o le taupou faamaoni ia Keriso.
3A e ou te fefe, ina ne‘i pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.
4Aua afai e tala‘iina atu e sē alu atu, se Iesu e ese i le na matou tala‘iina atu, pe talia e outou se agaga e ese i le ua outou talia, po o se tala lelei e ese i le ua outou talia, po ua lelei ina ia onosai i ai.
5Auā o lo‘u lea manatu, e leai se mea e tasi ou te itiiti ai i aposetolo silisili.
6Afai foi ou te valea i le upu, ou te le valea i le poto; peitai ua uma ona faailoaina i matou ia te outou i mea uma.
7Ua ou faia ea se agasala, ina ua faamaulaloina a‘i e a‘u, ina ia faamaualulugaina outou, auā na ou tala‘iina atu ia te outou le tala lelei a le Atua ma le le tauia mai?
8Na ou faoa mea a isi ekalesia i le faaoloaga na ou talia, ina ia auauna atu ai ia te outou.
9Na ou i ai ia te outou ma le mativa, sa le tigaina se tasi ia te au; auā o mea na mativa ai a‘u, na faalavaina mai ia e le au uso na o mai mai Maketonia; na ou faaeteete ina ne‘i tigaina outou ia te au i se mea e tasi, ou te faaeteete foi i ai.
10O loo ia te au le upu moni a Keriso, e le vaoia a‘u i lenei mitamita i nuu o Akaia.
11Ina ua a ea? ina ua ou le alofa atu ea ia te outou?
12Ua silafia le Atua. A o le mea ua ou faia, ou te faia pea lava lea, ina ia le maua ia te au se mea e ala ai se upu e i latou ua fia maua se mea e ala ai se upu, ina ia faailoaina i latou ua pei o i matou i le mea ua latou mitamita ai.
13Auā o i latou, o aposetolo pepelo i latou, o le au faigaluega ‘ole‘ole, ua lina i latou e i latou ma aposetolo a Keriso.
14E le se mea foi lea e ofo ai, auā o Satani lava, ua liua o ia e ia ma agelu o le malamalama.
15O lenei, e le se mea tele pe a liua ana auauna peiseai o auauna a le amiotonu i latou; o lo latou iuga e tusa ma a latou galuega.
16O lenei foi, ou te fai atu, aua ne‘i manatu mai se tasi ia te au, o le valea a‘u; a e afai o lea, ia talia mai a‘u e outou pei se vale, seia ou mitamita ane teisi.
17O la‘u e fai atu ai nei, ou te le fai atu i la le Alii, a e peiseai o faavalea i lenei faamalosi i le mitamita.
18Ona ua mitamita nisi e toatele i la le tino, ou te mitamita ai foi.
19Auā ua outou onosai ma le fiafia i e valelea, o loo popoto outou.
20Auā ua outou onosai pe a faapologa mai se tasi ia te outou, pe a ‘aina outou e se tasi, pe a ave e se tasi a o tou mea, pe a faamaualuga se tasi, pe a po atu se tasi i o outou mata.
21Ou te tautala atu i le faaleagaina, peiseai na matou vaivai; ai se mea e faamalosi ai se tasi, (ou te fai atu ma le valea,) ou te faamalosi ai foi.
22O Eperu ea i latou? o a‘u foi lea. O Isaraelu ea i latou? o a‘u foi lea. O fanau a Aperaamo ea i latou? o a‘u foi lea.
23O auauna ea i latou a Keriso? (ou te tauta‘a pei se vale, ua sili a‘u; ua sili i galuega, ua matuā tele i sasaina, ua tele ona tuuina i fale puipui, ua atu lasi i oti,
24ua atu lima ona sasaina o a‘u e Iutaia, e taifagafulu i le iva o‘u ta,
25ua atu tolu ona sasaina o a‘u i laau, ua tasi le fetogia o a‘u i maa, ua atu tolu ona malaia o folauga sa ou i ai, ua atoa le po ma le ao sa ou i le vasa;
26ua atu lasi a‘u malaga se manū a‘u leaga i vaitafe, se manū a‘u leaga i e fao mea, se manū a‘u leaga i tagata o lo‘u lava nuu, se manū a‘u leaga i tagata o nuu ese, se manū a‘u leaga i le aai, se manū a‘u leaga i le vao, se manū a‘u leaga i le vasa, se manū a‘u leaga i uso pepelo;
27na ou i le galuega mamafa ma le tiga, o le mataala soo, o le fia ‘ai ma le fia inu; o le anapogi soo, o le maalili ma le le lavalavā.
28Tuu ia o isi mea, a o le mea e mafatia ai a‘u i aso fai soo, o le popole lea ona o ekalesia uma.
29Po o ai le ua vaivai, ou te le vaivai ai? Po o ai le ua tausuai, ou te le tiga ai?
30Afai e tatau ina ia ou mitamita, ou te mitamita i mea ou te vaivai ai.
31O le Atua o le Tamā lava o lo tatou Alii o Iesu Keriso, o lē viia e faavavau lava, ua silafia e ia ou te le pepelo lava.
32O i Tamaseko, o le alii nofo faiaai mai Areta le tupu,
33na ia lamalama i le aai o Tamaseko ua fia pue ia te au; sa tuutuuina ifo a‘u i le ato i le faamalama i le pa, na ou sao ai i ona lima.
Who We AreWhat We EelieveWhat We Do
2025 by iamachristian.org,Inc All rights reserved.
