1Ua toeaina Isaako, ua puaoa foi ona mata ua le mafai ai ona vaai, ona ia valaau ai lea ia Esau lona atalii e matua, ma fai atu ia te ia, Lo‘u atalii e; ona fai mai ai lea o ia, O a‘u lenei.
2Ona ia fai atu ai lea, Faauta ea, ua ou toeaina a‘u, ou te le iloa le aso ou te oti ai;
3o lenei, ina ave ia au auupega, o lau utu ma lau aufana, ma e alu i le vao e tuli se manu o le vao ma a‘u.
4Ia e fai ai sina mea e ‘ai e manogi ma a‘u, pei o le mea ou te mea ou te manao ai, ma au mai ia te au, ou te ‘ai ai, ina ia ou faamanuia atu ia te oe manū ou te lei oti.
5Ua faalogo foi Repeka i le upu a Isaako ia Esau lona atalii. Ua alu atu foi Esau i le vao e tuli se manu, e au mai ai.
6Ona fai atu lea o Repeka ia Iakopo lana tama, ua faapea atu, Faauta, na ou faalogo i le upu a lou tamā ia Esau lou uso, ua faapea,
7Au mai ia te au se manu mai le vao, ma fai ai sina mea e ‘ai e manogi ma a‘u, ou te ‘ai ai, ma ou faamanuia atu ia te oe i luma o Ieova, manū ou te lei oti.
8O lenei, la‘u tama e, ia e faalogo mai i la‘u upu i le mea ou te fai atu ai ia te oe.
9Ia e alu i le fagaga, ma au mai ai ia te au tamai ‘oti lelei se lua, ou te fai ai se mea e ‘ai e manogi ma lou tamā, pei o le mea e manao ai o ia;
10ona e avatu ai lea i lou tamā, e ‘ai ai o ia, ina ia faamanuia mai o ia ia te oe manū o lei oti o ia.
11Ona fai mai ai lea o Iakopo ia Repeka lona tinā, Faauta, o le tagata taufulufulu lo‘u uso o Esau, a o a‘u ou te se tagata lamolemole.
12Atonu e tagotago lo‘u tamā ia te au, ona avea ai lea o a‘u ia te ia ma tagata faa‘ole‘ole, ona oo mai ai lea ia te au se fetuu, a e le o se manuia.
13Ona fai atu ai lea o lona tinā ia te ia, La‘u tama e, ia ia te au lou fetuu, tau lava ina e faalogo mai i la‘u upu, ma e alu e au mai ai tamai ‘oti ia te au.
14Ona alu ai lea o ia, ma pupue mai, ua au mai i lona tinā, ona fai ai lea e lona tinā mea e ‘ai e manogi, pei ona manao ai lona tamā.
15Ua ave foi e Repeka ofu lelei o lana tama e matua o Esau, sa ia te ia i le fale, ua na faaofu ai ia Iakopo lana tama aupito itiiti;
16ua ia tuu ai foi pa‘u o tamai ‘oti i ona lima, atoa ma le lamolemole o lona ua;
17ua ia tuu atu le mea e ‘ai e manogi ma le areto na ia saunia i le lima o lana tama o Iakopo.
18Ona alu atu ai lea o ia i lona tamā, ua fai atu, Lo‘u tamā e; ona ai fai mai ai lea, O a‘u lenei, lo‘u atalii e, o ai ea oe?
19Ona fai atu ai lea o Iakopo i lona tamā, O a‘u o Esau o lau ulumatua, ua ou faia le mea na e fai mai ai ia te au; ina nofo ia i luga, ia nofo ma ‘ai i la‘u manu ina ia e faamanuia mai ia te au.
20Ona fai mai ai lea o Isaako i lona atalii, Lo‘u atalii e, pe faapefea ona e vave maua? Ua ia fai atu, Auā na aumaia i o‘u luma e Ieova lou Atua.
21Ona fai mai ai lea o Isaako ia Iakopo, Lo‘u atalii e, soso mai ia, ina ia ou tagotago ia te oe, po o oe lo‘u lava atalii o Esau pe leai.
22Ua soso atu Iakopo ia Isaako lona tamā; ona ia tagotago mai ai lea ia te ia, ua fai mai, O le leo o le leo lea o Iakopo, a o lima o lima ia o Esau.
23Ua ia le iloa o ia, auā ua taufulufulu ona lima, pei o lima o Esau lona uso; ona faamanuia ai lea e ia ia te ia.
24Ona fai mai ai lea o ia, O oe ea o lo‘u lava atalii o Esau? Ona fai atu ai lea o ia, O a‘u lava lenei.
25Ona fai mai ai lea o ia, Au mai ia ia te au, ou te ‘ai ai le manu a lo‘u atalii, ina ia ou faamanuia ia te oe. Ona ia avatu ai lea ia te ia, na ia ‘ai ai, ua na au mai foi ia te ia le uaina, ona ia inu ai lea.
26Ona fai mai ai lea o Isaako lona tamā ia te ia, Lo‘u atalii e, soso mai ia, se‘i e sogi mai ia te au.
27Ona ia soso atu ai lea, ma sogi atu ia te ia; ua ia lagona le nanamu o ona ofu, ma faamanuia ia te ia, ua faapea mai, Faauta, o le manogi o lo‘u atalii, e pei o le manogi o le fanua ua faamanuia e Ieova;
28ia foai atu e le Atua ia te oe le sau mai le lagi, ma le lelei o le fanua, ma saito ma uaina e tele.
29Ia auauna nuu ia te oe, ia ifo foi tagata ia te oe, ia fai oe ma alii i ou uso, ia ifo foi tama a lou tinā ia te oe; ia fetuuina sē fetuu ia te oe, ia manuia foi sē faamanuia ia te oe.
30Ua uma ona faamanuia e Isaako ia Iakopo, na se‘i alu atu foi Iakopo ai luma o Isaako lona tamā, ona sau ai lea o Esau lona uso i lona tuligāmanu.
31Na faia foi e ia le mea e ‘ai e manogi, ma avatu i lona tamā, ua faapea atu i lona tamā, Lo‘u tamā e, ia e nofo i luga, ma ‘ai i le manu a lou atalii, ina ia e faamanuia mai ia te au.
32Ona fai mai ai lea o Isaako lona tamā ia te ia, O ai ea oe? Ona fai atu ai lea o ia, O a‘u o lou atalii, o lau ulumatua o Esau.
33Ona tetemu ai lea o Isaako, ua matuā tele lava lona tetemu, ua fai mai, O ai lava lea na tuli manu, ma au mai ia te au, ua uma ona ou ‘ai ai a e te lei sau oe, ua ou faamanuia foi ia te ia, e manuia lava ia?
34Ua faalogo Esau i upu a lona tamā, ona tagiaue ai lea o ia i le aue faalotulotu, ua faapea atu i lona tamā, Lo‘u tamā e, ia e faamanuia mai atoa foi ma a‘u nei.
35Ona fai mai ai lea o ia, Na sau faa‘ole‘ole lou uso, ua na ave lou manuia.
36Ona fai atu ai lea o ia, E le o lea ea ua igoa ai o ia o Iakopo? Auā ua atu lua lona sisio mai ia te au, na ia fao le tofi o a‘u le ulumatua, faauta foi, ua ia fao nei lo‘u manuia. Ua ia fai atu foi, E leai ea se manuia o totoe ia te oe mo a‘u?
37Ona tali mai ai lea o Isaako, ua faapea mai ia Esau, Faauta, ua ou tofia o ia e fai ma alii ia te oe, ua ou tuu atu foi ia te ia ona uso uma e fai ma auauna, ua ou faamalosia ia i le saito ma le uaina, se a foi se mea ou te toe fai ma oe, lo‘u atalii?
38Ona fai atu lea o Esau i lona tamā, E tasi ea le manuia ua ia te oe, lo‘u tamā e? Ia e faaamanuia ia te au, o a‘u lava, lo‘u tamā e. Ona tagi ai lea o Esau ma le leo tele.
39Ona tali mai ai lea o lona tamā o Isaako, ua fai mai ia te ia, Faauta, o le fanua lafulemu le mea e te nofo ai, e totō ifo foi le sau mai le lagi i luga.
40O lau pelu e te ola ai, e te auauna foi i lou uso; a oo foi ina faasaoloto o oe, ona e gausia ai lea o lana amo nai lou ua.
41Ua ita tele Esau ia Iakopo ona o le manuia na faamanuia atu ai e lona tamā ia te ia; ona faapea lea o Esau i lona loto, Ua latalata aso e faanoanoa ai ona o lo‘u tamā, ona ou fasioti ai lea lo‘u uso o Iakopo.
42Ua talaina atu ia Repeka upu a Esau lana tama e matua, ona ia feau atu ai lea e sau lana tama aupito itiiti o Iakopo, ua fai atu ia te ia, Faauta, o lou uso o Esau, o loo faamafanafana ia i lona loto ia te oe, o le a fasioti ia te oe.
43A o lenei, la‘u tama e, ia e faalogo mai i la‘u upu; ina tu ia i luga, ma e sola atu i lo‘u tuagane o Lapana, i Karana,
44ma e nofo ai nai aso, seia mavae atu le ita o lou uso;
45seia mavae atu le ita o lou uso ia te oe, seia galo foi ia te ia le mea ua e faia ia te ia; ona ou feau atu ai lea, e aami ia te oe i lea mea; e aveeseina i se a oulua ia te au i le aso e tasi?
46Ona fai atu ai lea o Repeka ia Isaako, Ou te fiu i lo‘u ola ona o fafine o sa Hetī, afai e fai avā Iakopo i se fafine o sa Hetī, pei o ia fafine o le nuu, pe se a le toe aoga o lo‘u ola ia te au?
Who We AreWhat We EelieveWhat We Do
2025 by iamachristian.org,Inc All rights reserved.
