1Le Alii e, ua fai oe ma mea matou te nonofo ai i lea tupulaga ma lea tupulaga.
2A o lei fanaua mai mauga, e lei faia foi e oe le lalolagi ma le atu laulau, o le Atua oe mai le vavau e oo i le faavavau.
3Ua e liua tagata ia momomo; ma e fetalai mai, Outou na le fanau a tagata ia liu outou;
4auā e tusa i ou luma le afe o tausaga ma le aso ananafi ina o mavae atu, ma se leoleoga i le po.
5Ua e faatafea i latou i le lolo; ua se moe i latou; e pei o le mutia i latou ona olaola i le taeao.
6O le taeao e fuga mai ai, ma olaola mai ai; a oo i le afiafi, ona seleeseina ai lea, ua magumagu ai.
7Auā ua faaumatia i matou i lou toasa, o lou toatamai foi ua atuatuvale ai i matou.
8Ua e tuuina a matou amio leaga i ou luma, ua tuuina foi a matou agasala lilo i le malamalama o ou fofoga.
9Auā ua mavae atu o matou aso uma a o e toasa mai; ua uma atu o matou tausaga e pei o se manatu.
10O tausaga o matou olaga e fitugafulu ia tausaga; a e afai e valugafulu tausaga ona o le malosi, a o lo latou malosi o i ai le tiga ma le puapuaga; auā e vave ona mavae atu ia, ma matou lele ese.
11O ai se na te iloa le malosi o lou toasa? Auā e pei ona matautia oe e faapea lou toatamai.
12Ia faapea ona e a‘oa‘o mai ia i matou e faitauina o matou aso, ina ia maua ai le poto i o matou loto.
13Ieova e, ia e toe liliu mai, seia afea? Ia e salamo ona o au auauna.
14Ia e faamalilie mai ia te i matou i le taeao i lou alofa; ina ia matou alalaga fiafia, ma ia olioli i o matou aso uma.
15Ia e faafiafia mai ia i matou ia tusa ma ona po na e faatigaina ai i matou, o tausaga na matou iloa ai le leaga.
16Ia faaalia mai au galuega i au auauna, ia faaalia foi lou matagofie i a latou fanau.
17Ia oo mai foi ia te i matou le matagofie mai ia Ieova lo matou Atua; ia e faatumauina ia te i matou le galuega a o matou lima; o le galuega lava a o matou lima ia e faatumauina.
Who We AreWhat We EelieveWhat We Do
2025 by iamachristian.org,Inc All rights reserved.
