1Ona o atu lea o le fanauga uma a Isaraelu, ma ua faapotopotoina le faapotopotoga ia Ieova, i Mesepa, e pei se tagata e toatasi, e pau mai i Tanu, e pau mai i Peresepa, atoa ma le nuu o Kiliata.
2Ua tutū ai alii o le nuu uma, o itu aiga uma o Isaraelu i le faapotopotoga o le nuu o le Atua, e fa selau o afe o tagata, o ‘au e savavali e ua fai pelu.
3(Ua faalogo le fanauga a Peniamina, ua o ae le fanauga a Isaraelu, i Mesepa.) Ona fai atu lea o le fanauga a Isaraelu, Fai mai ia, pe na faapefea ona faia o lenei mea leaga?
4Ua tali mai le tagata sa Levī, le tane a le fafine na fasia, ua faapea mai, Na alu atu i maua ma la‘u palake i Kipea o Peniamina e moe ai;
5ona tulai mai lea ia te au o tagata o Kipea, ma latou siosio mai ia te au i le fale i le po; na latou manatu e fasioti ia te au, a o la‘u palake ua latou faaleaga ia te ia, ua oti ai.
6Ona ou tago atu lea i la‘u palake, ma ou pena ia te ia, ma avatu i nuu uma o le tofi o Isaraelu; auā ua latou faia le mea leaga ma faivale i Isaraelu.
7Faauta, o outou uma o le fanauga a Isaraelu, ina filifili ia outou iinei so outou manatu.
8Ona tulai lea o le nuu uma pei se tagata e toatasi, o loo faapea, E le alu so tatou i lona fale ie, e le foi atu so tatou i lona fale;
9a o lenei, tatou te faia le mea nei i Kipea; tatou te fai le vili i nisi e o ae ai;
10tatou te fa‘ifa‘i tagata e toasefulu ai le toaselau i itu aiga uma o Isaraelu, ma le toaselau i le afe, ma le afe ai le sefulu o afe, e fai mea e ‘ai mā le nuu; ina ia faia pe a oo i latou i Kipea o Peniamina e tusa ma le faivale uma ua latou faia i Isaraelu.
11Sa faapotopoto tagata uma o Isaraelu e tau ma le aai; o loo loto gatasi i latou pei se tagata e toatasi.
12Ona aauina atu lea e itu aiga o Isaraelu nisi tagata i aiga uma o Peniamina, o loo faapea, O le a lenei mea leaga ua faia e outou?
13O lenei, ina tuu mai ia o na tagata, o tagata ulavavale o loo i Kipea, ina ia matou fasioti ia i latou, ma tuu ese ai le leaga ia Isaraelu. A e le mafafai le fanauga a Peniamina ona faalogo i le upu a o latou uso le fanauga a Isaraelu;
14a ua faapotopoto le fanauga a Peniamina i Kipea mai o latou aai, ina ia latou o atu e tau ma le fanauga a Isaraelu.
15Ona faitauina lea o le fanauga a Peniamina i lea aso ai o latou aai, o afe e luafulu ma le ono gaafe o tagata ua fai pelu, atoa ma tagata o Kipea e toafitu selau o tagata sili.
16Sa i ai i nei tagata uma o tagata tauagavale ua sili, e toafitu selau; o i latou uma nei e sasau le maa i le maatā i le lauulu, a e le sese.
17Ua latou faitauina foi tagata o Isaraelu, e aunoa ma Peniamina, e fa selau afe o tagata e ua fai pelu; o i latou uma nei o le ‘au tau.
18Ona latou tulai lea, ma o ae i Peteli e fesili atu i le Atua; ua fai atu ai le fanauga a Isaraelu, O ai ea e muamua ona alu ae mo i matou e tau ma le fanauga a Peniamina? Ona fetalai mai lea o Ieova, E muamua atu Iuta.
19Ona tulai atu lea o le fanauga a Isaraelu i le taeao, ua to lauapi e feagai ma Kipea.
20Ona o atu lea o tagata o Isaraelu e tau ma Peniamina; ona pae tau atu ai lea e tagata o Isaraelu e tau ma Kipea.
21Ona o atu ai lea o le fanauga a Peniamina mai Kipea; ua latou fasiotia Isaraelu i lea aso, o tagata e luafulu o afe ma afe e lua.
22Ua faamalosi le nuu, o tagata o Isaraelu, ua latou toe pae tau le taua i le mea na latou pae tau ai i le luai aso.
23Ona o ae lea o le fanauga a Isaraelu, ma latou fetagisi i luma o Ieova, ua oo i le afiafi, ma latou fesili ia Ieova, o loo faapea, Ou te toe faalatalata ea e tau ma le fanauga a Peniamina lo‘u uso? Ua fatalai mai Ieova, Tou te o ae ia te ia.
24Ona faalatalata lea o le fanauga a Isaraelu i le fanauga a Peniamina i le aso e lua.
25Ona alu atu lea o Peniamina mai Kipea e faafetaiai ia te i latou i le aso lua; ona toe fasiotia lea o le fanauga a Isaraelu, e sefulu afe ma afe e valu; o i latou uma nei na fai pelu.
26Ona o ae lea o le fanauga uma a Isaraelu ma le nuu uma, ua latou oo atu i Peteli, ma latou fetagisi, ma nonofo ai i luma o Ieova, ma latou anapopogi i lea aso e oo i le afiafi; ua latou faia foi o taulaga mu atoa ma taulaga faafetai i luma o Ieova.
27Ona fesili lea o le fanauga a Isaraelu ia Ieova; (auā sa i ai le atolaau o le feagaiga a le Atua i ia ona aso;
28o Fineaso le atalii o Eleasaro, le atalii ia o Arona, o ia na tu i ona luma i ia ona aso;) o loo faapea i latou. Ou te toe alu atu ea e tau ma le fanauga a Peniamina lo‘u uso, pe soia? Ua fetalai mai Ieova, O ae ia outou, auā a taeao ou te tuuina atu ai i latou i lou lima.
29Ona tanu lea o ‘au a Isaraelu e siosio ai i Kipea.
30Ona o ae lea o le fanauga a Isaraelu i le fanauga a Peniamina i le aso tolu, ua pae tau atu le taua ia Kipea, e pei ona uluai faia.
31Ona o atu lea o le fanauga a Peniamina e faafetaiai i le nuu, na tosina i latou nai le aai; ua amata ona latou taia le nuu, ua manunua e pei o isi aso, pe atoa le toatolugafulu o tagata o Isaraelu i ala tele, (e alu ae ai le tasi i Peteli, a o le tasi e alu atu ai i Kipea i le vao.)
32Ona fai ane lea o le fanauga a Peniamina, Ua fasia i latou i o tatou luma e pei o le amataga; a ua fai ane le fanauga a Isaraelu, Tatou sosola ia, ia tosina ai i latou nai le aai i ala tele.
33Ona tulai lea o tagata uma o Isaraelu ai le mea sa i ai, ua latou pae tau le taua i Paalatamara, ma ‘au a Isaraelu sa tanu ua feosofi mai i latou ai le mea sa i ai i le fanua o Kipea.
34Ona o ane lea e tau ma Kipea o tagata sili mai Isaraelu uma e sefulu afe, ua tele lava le taua; a ua latou le iloa ua oo mai le malaia ia te i latou.
35Ua fasia Peniamina e Ieova i luma o Isaraelu; ua faaumatia Peniamina e le fanauga a Isaraelu i lea aso, o tagata e luafulu o afe ma afe e lima ma le toaselau; o i latou uma ia na fai pelu.
36Ona iloa lea e le fanauga a Peniamina ua fasia i latou; a ua tuumuli tagata o Isaraelu ia Peniamina, auā sa latou faalagolago i ‘au na tanu i tala ane o Kipea.
37Ona faataalise lea o ‘au na tanu, ua feosofi atu i Kipea; ua faasalalau ‘au na tanu, ma latou fasia le aai uma i le pelu.
38Sa fai le faailoga i tagata o Isaraelu ma e na tanu ‘au; latou te faamu ae le mu tele ma le asu nai le aai.
39Ua liu tua mai tagata o Isaraelu i le taua; ona amata mai lea o Peniamina ona fafasi; ua manunua tagata o Isaraelu, pe atoa le toatolugafulu o tagata; auā na faapea ane i latou, E moni lava ua matuā fasia i latou i o tatou luma, e pei o le luai taua.
40A ua amata ona alu ae le mumū o le afi nai le aai, o le asu faaniutu, ona fāliu atu lea i tua o Peniamina, faauta, ua alu ae i le lagi le mu o le aai uma.
41Ua toe liliu mai tagata o Isaraelu, ona faaatuatuvaleina lea o tagata o Peniamina; auā ua latou iloa, ua oo ia i latou le malaia.
42Ona liliu lea o i latou i luma o tagata o Isaraelu i le ala i le vao; a ua pipii atu le tuli ia te i latou; o e sa i aai ua latou fafasi ia te i latou i o latou va.
43Ua siomia Peniamina, ma latou tulituliloa ia te i latou, ma soli ia i latou ma le faigofie, e oo lava i Kipea i le itu e alu ae ai le la.
44Ua fasia Peniamina e sefulu afe o tagata ma afe e valu; o i latou nei o tagata totoa uma.
45Ona liliu lea ma sosola i latou i le vao i le papa o Rimoni; ua aoao i latou i ala tele e lima gaafe o tagata; ua tulituliloa ia i latou i Kitoma, ma fafasi ai tagata e lua afe.
46O i latou uma o Peniamina na fasia i lea lava aso, e luafulu o afe ma afe e lima, o tagata na fai pelu; o i latou nei o tagata totoa uma.
47A o tagata e toaono galau na liliu i latou, ma sosola i le vao i le papa o Rimoni; ua latou nonofo i le papa o Rimoni i masina e fa.
48Ua toe foi atu tagata o Isaraelu i le fanauga a Peniamina, ma latou fasia i le pelu o tagata i aai, atoa ma manu, ma mea uma na latou maua; o aai uma foi ua latou oo i ai, ua latou faamuina i le afi.
Who We AreWhat We EelieveWhat We Do
2025 by iamachristian.org,Inc All rights reserved.
