1 O a‘u o Paulo, o le aposetolo a Iesu Keriso i le finagalo o le Atua, ma lo tatou uso o Timoteo; o la ma tusi lenei i le ekalesia a le Atua o i Korinito, atoa ma le au paia uma o i Akaia uma lava.
2Ia ia te outou le alofa tunoa ma le manuia mai le Atua lo tatou Tamā, atoa ma le Alii o Iesu Keriso.
3Ia faamanuina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foi e ana le faamafanafanaga uma;
4o le na te faamafanafanaina mai ia te i matou i lo matou puapuaga uma lava, ina ia matou mafaia ona faamafanafana atu ia te i latou ua maua i se tasi lava puapuaga, i le faamafanafanaga ua faamafanafanaina ai i matou e le Atua.
5Auā pei ona tele ia i matou o tiga ona o Keriso, ua faapea foi ona tele o le faamafanafanaina o i matou e Keriso.
6Pe afai ua puapuagatia i matou, ua faapeaina ona o le faamafanafanaina ma faaolaina o outou, o loo matuā galue ma le onosai i ia lava tiga ua matou tiga ai; pe afai foi ua faamafanafanaina i matou, ua faapeaina ona o le faamafanafanaina ma faaolaina o outou.
7Ua tumau foi lo matou faatuatua ia te outou; o loo matou iloa, faapei ona faatasia outou i tiga, e faapea foi i le faamafanafanaina.
8Auā, le au uso e, matou te loto ina ia outou iloa lo matou puapuaga na oo mai ia te i matou i Asia, sa silisili ona mafatia tele ai o i matou, e lei au i ai lo matou malosi, na oo lava ina matou masalo ai a matou oti.
9A o i matou, sa i o matou loto le manatu o le a oti, ina ne‘i matou faatuatua ia te i matou, a ia faatuatua i le Atua na te toe faatuina e ua oti;
10o le na laveai mai ia i matou ai le oti e matuā leaga, o loo laveai mai nei foi, ua matou faamoemoe foi ia te ia, na te laveai mai pea ia te i matou.
11O outou foi o loo fesoasoani mai i le tatalo mo i matou, ina ia faafetai atu le toatele ona o i matou i le alofa na oo mai ia te i matou ona o le toatele.
12Auā o lenei le mea matou te mitamita ai, o le mau a lo matou loto fuatia ifo, o le faamaoi ma le loto lelei e tatau i le Atua, e le o le poto faaletino, a o le alofa tunoa o le Atua ua fai ai la matou amio i le lalolagi, a e sili lava ia te outou.
13Auā matou te le tusi atu ni mea ia te outou e ese i ia mea ua outou faitau ai, ma outou talia; ou te faamoemoe foi tou te talia ai seia oo i le gataaga;
14pei ona outou talia mai o i matou a e le atoa i ai, o i matou tou te mitamita ai, pei o outou foi matou te mitamita ai i le aso o le Alii o Iesu.
15O le faatuatua foi lenei sa ou manatu ai ou te muai alu atu ia te outou, ina a outou maua faalua se alofa;
16ou te ui atu ai ia te outou i Maketonia, i le toe sau mai Maketonia ia te outou, ona molia ai lea o a‘u e outou i Iutaia.
17O lenei, pe ai ea sa‘u manatu faaletonu ina ua faapea ona ou filifili? pe ou te filifili ea i la le tino i mea ou te filifili ai, ina ia ia te au le ioe, ioe, ma le leai, leai?
18A e faamaoi le Atua, sa le ioe ma leai la matou upu ia te outou.
19Auā o le Alo o le Atua, o Iesu Keriso, o le na tala‘iina atu ia te outou e i matou, o a‘u, ma Siluano, ma Timoteo, sa le ioe ma leai ia, a ua ioe ia te ia.
20Auā o mea uma ua folafolaina e le Atua, ua ioe ia ia te ia, ua amene foi ia te ia, e iu atu i le viiga i le Atua ona o i matou.
21O lē faatumauina foi i matou faatasi ma outou ia Keriso, ma na faauuina i tatou, o le Atua lea;
22o le ua faamaufaailogaina mai i tatou, ma ua foaiina mai le faamaoni o le Agaga i o tatou loto.
23Ou te augani foi, ia sisila mai le Atua i lo‘u nei agaga, o lo‘u faapelepele ia te outou, na le oo ai la‘u malaga i Korinito.
24E leai foi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.
Who We AreWhat We EelieveWhat We Do
2025 by iamachristian.org,Inc All rights reserved.
