1Afai foi e te matuā faalogo i le siufofoga o Ieova lou Atua, e anaana e fai ana poloaiga uma lava ou te fai atu ai ia te oe i le aso nei, ona faasilisiliina lea o oe e Ieova lou Atua, i nuu uma lava o le lalolagi;
2e maua foi e oe o nei mea uma e manuia ai; e oo lava ia ia te oe, pe afai e te faalogo i le siufofoga o Ieova lou Atua.
3E manuia oe i le aai, e manuia oe i le fanua.
4E manuia oe i lau fanau, ma le fua o lou laueleele, ma fanau a au manu vaefa, o tama a au povi, ma ou lafu mamoe.
5E manuia lau ato, atoa ma lau mea e palu ai falaoa.
6E manuia oe pe a e sau, e manuia foi oe pe a e alu atu.
7E tuuina mai e Ieova o e ita ia te oe o e laga mai ia te oe ia fasia i ou luma; o le ala e tasi e o mai ai i latou ia te oe, a o ala e fitu e sosola atu ai i latou i ou luma.
8E pule Ieova ia manuia oe i ou fale saito, ma mea uma lava e tago i ai ou lima; na te faamanuia foi ia te oe i le nuu ua foaiina mai e Ieova lou Atua ia te oe.
9E fai foi oe e Ieova ma nuu paia mo ia, e pei ona tauto mai o ia ia te oe, pe afai e te tausiusi i poloaiga a Ieova lou Atua, ma e savali i ona ala.
10Ona iloa ai lea e nuu uma o le lalolagi ua faaigoaina oe i le suafa o Ieova; ona matatau ai lea o i latou ia te oe.
11E faateleina e Ieova o mea lelei ia te oe, o lau fanau, ma fanau a au manu vaefa, ma le fua o lou laueleele, i le laueleele na tauto ai Ieova i ou tamā na te foaiina mai ia te oe.
12E tatala mai e Ieova lana tuugāoloa lelei mā oe, o le lagi lea, e foaiina mai ai o le ua i lou nuu i ona po e tatau ai, a faamanuia ai foi mea uma e te faia i ou lima; e te avatu mea i nuu e tele, a ē te le nonō atu.
13E fai foi oe e Ieova ma ulu, a e le fai ma iu; e te aupitoaluga lava, a e te le laulalo; pe afai e te faalogo i poloaiga a Ieova lou Atua, ou te fai atu ai ia te oe i le aso nei, e tausi i ai, ma e faia;
14aua foi e te alu ese i upu uma ou te fai atu ai ia te outou i le aso nei, i le itu taumatau, po o le itu taugavale, e mulimuli atu ai i atua ese, ma auauna i ai.
15A e afai e te le faalogo i le siufofoga o Ieova lou Atua, e anaana e foi ana poloaiga uma ma ana tulafono ou te fai atu ai ia te oe i le aso nei; ona maua mai ai lea o oe i nei malaia uma, e oo lava ia ia te oe.
16E malaia oe i le aai, e malaia foi oe i le fanua.
17E malaia lau ato, atoa ma lau mea e palu ai falaoa.
18E malaia lau fanau, ma le fua o lou laueleele, o tama a au povi ma ou lafu mamoe.
19E malaia oe pe a e sau, e malaia foi oe pe a e alu atu.
20E faaoo e Ieova ia te oe le malaia, ma le atuatuvale, ma le aoaiga, i mea uma lava e tago i ai ou lima e faia, seia faaumatia oe, ma e vave fano lava; ona o le leaga o lau amio, na e lafoai mai ai ia te au.
21E faapipii atu e Ieova le faama‘i ia te oe, seia faaumatia oe e ia ai le laueleele e te alu i ai e fai mou.
22E taia oe e Ieova i le ma‘i faaiiva, ma le ma‘i vevela, ma le ma‘i fulafula, ma le vevela tele lava; ma le naumati, ma le mamae, ma le polopologa; e tuliloa ia mea ia te oe seia faaumatia ai oe.
23E avea foi lou lagi o i ou luga ma ‘apa memea, ma le lalologi o i ou lalo e fai lea ma uamea.
24E faia e Ieova le ua i lou nuu ma efuefu ninii ma efuefu; e totō ifo ia mai le lagi i ou luga, seia faaumatia ai oe.
25E tuuina atu oe e Ieova ia fasia i luma o e ita ia te oe; e te alu atu ia te i latou i le ala e tasi, a e te sola i ala e fitu i o latou luma; e tuuina atu foi oe ia faasaunoa i ai malo uma o le lalolagi.
26E fai foi lou tino oti ma mea e ‘ai mā manu felelei uma, ma manu vaefa e tataa, a leai se na te tulia.
27E taia oe e Ieova i le ma‘i fulafula o Aikupito, ma le silailalo, ma le ma‘i pa‘upa‘ua, ma le ma‘i mageso, e le mafai ona faamaloloina ai oe.
28E taia oe e Ieova i le faavalemalosi, ma le tauaso, ma le loto atuatuvale;
29e te tautago i le tutonu o le la, e pei ona tautago o le tauaso i le pouliuli; e te le manuia foi i ou ala, na ona faasauaina oe, ma faoa au mea i aso uma lava, a e leai se laveai ia te oe.
30Lua te fai le feagaiga ma le fafine e fai mau avā, a e toso o ia e le tasi tane; e te faia se fale, a e te le mau ai; e te faia se tovine, a e te le faatatagaina.
31E fasia lau povi i ou luma, a e te le ‘ai ai; e faoa lau asini i ou luma, a e le toe foi mai ia te oe; e avatu au mamoe i e ita mai ia te oe, a e le ia te oe se na te laveaiina.
32E foaiina atu ou atalii ma ou afafine i le nuu ese, e vaavaai foi ou mata, ma fole ai, ona o i latou i le aso atoa; e leai foi se malosi ia te oe e laveai.
33E ‘aina le fua o lou laueleele, ma au galuega uma lava, e le nuu e te le iloa; na ona faasauaina lava oe, ma faataugaina i aso uma lava;
34e te faavalemalosi foi ona o mea e vaai i ai ou mata.
35E taia oe e Ieova i le papala leaga, i ou tulivae ma ou vae, e le mafai ona faamamafuina; e fua mai i ou alofivae e oo lava i lou tumuai.
36E ta‘ita‘iina e Ieova o oe, ma lou tupu ua e tofia mo oe, i le nuu ua le iloa e oe po o ou tamā; e te auauna foi i lea mea i atua ese, o laau ma maa.
37E avea foi oe ma mea e ofo ai, ma upu faatusa, ma tauemuga, i nuu uma lava e ta‘ita‘iina i ai oe e Ieova.
38E te ave ni fua e tele e totō i le fanua, a e itiiti ni mea e te faapotopoto mai ai; auā e ‘aina e le sē akerise.
39E te faia ni tovine, ma e galue i ai, a e te le inu i le uaina, pe tau mai ni fua; auā e ‘aina e anufe.
40E ia te oe olive i ou fanua uma, a e le uu oe i le uu; auā e malili fua o lou olive.
41E fanau ia te oe atalii ma afafine, a e le fai i latou mau; auā e avea i latou faatagataotaua.
42O au laau uma ma fua o lou laueleele e faaumatia ia e le sē selasala.
43O le tagata ese e ia te oe e matuā faasilisili lava o ia ia te oe; a o oe, e te matuā maulalo lava ia te ia.
44E te no mea ia te ia, a e le no mea o ia ia te oe; e avea o ia ma ulu, a e avea oe ma i‘u.
45E maua mai oe i nei malaia uma, e tuliloa ia ia te oe, ma oo lava ia te oe, seia faaumatia oe; auā ua e le faalogo i le siufofoga o Ieova lou Atua, e tausi i ana poloaiga ma ana tulafono na ia poloai mai ai ia te oe;
46E ia te oe ma au fanau ia mea, e fai ma faailoga ma vavega e faavavau.
47Auā ua e le auauna ia Ieova lou Atua ma le olioli, ma le fiafia o le loto, ona o le tele o mea uma;
48o le mea lea e te auauna ai ma le fia ai, ma le fia inu, ma le le lavalavā, ma le mativa i mea uma lava, i e ita ia te oe e aauina mai e Ieova ia te oe; na te faaee foi le amo uamea i lou ua, seia faaumatia oe e ia.
49E auina mai e Ieova ia te oe le nuu mai le mea mamao, mai le tuluiga o le lalolagi, e pei ona lele mai o le aeto; o le nuu e te le lagona la latou gagana;
50o le nuu mata sauā, e le faailogaina e i latou o toeaina, e le alofa foi i tama;
51e ‘aina foi e i latou o fanau a au manu vaefa, ma fua o lou laueleele, seia faaumatia oe; latou te le faatoeina ma oe ni saito, po o uaina, po o suāuu, o se tama a au povi, po o ou lafu mamoe, seia faaumatia oe e ia.
52Latou te siosio ia te oe i le taua i au aai uma, seia soloia ou pa maualuluga ma le faigata, sa e faatuatua i ai, i lou nuu uma; latou te siosio ia te oe i au aai uma i lou nuu uma ua foaiina mai e Ieova lou Atua ia te oe.
53E ‘aina foi e oe au fanau ua foaiina mai e Ieova lou Atua ia te oe, o tino o ou atalii ma ou afafine, ina ua siosioina oe, ma tigaina, e faatigateleina ai oe e i latou ua ita ia te oe.
54O le tagata o ia te oe e tino văivai, ma ua matuā faapelepeleina, e le alofa o ia i lona uso, ma lana avā pele, ma ana fanau ua totoe e ua faatotoeina;
55e le avatua lava e ia i so latou sina fāsi tino o ona atalii na te ‘aina; auā ua leai lava sina mea ua toe ia te ia ina ua siosioina, ma tigaina, e faatigateleina ai oe e i latou ua ita ia te oe i au aai uma.
56O le fafine tino văivai o ia te oe, ma le ua faapelepeleina, na te le faata‘ita‘i ona tuu ifo o lona alofivae e tu i le laueleele ona o lona faapelepeleina ma lona tino văivai, e le alofa o ia i lana tane pele, ma lana tama tane, ma lana tama teine,
57ma lona fanua e paū i ona vae, ma ana fanau e fanau mai ai e ia; auā e ‘aina e ia faalilolilo ona o le oge o mea uma lava ina ua siosioina, ma tigaina, e faatigaina ai oe e i latou o e ita ia te oe i au aai.
58Pe afai e te le anaana e fai i upu uma lava o lenei tulafono ua tusia i lenei tusi, ina ia e mata‘u i lenei suafa mamalu ma le matautia, O Ieova Lou Atua;
59ona faaoo lea e Ieova o mala ia te oe, ma mala i au fanau, e ofo ai, o mala tetele lava, ma le tumau, ma ma‘i leaga, ma le tumau.
60Na te faaoo foi ia te oe o ma‘i uma o Aikupito, sa e fefe ai; e pipii lava ia ia te oe.
61O ma‘i foi uma lava, ma mala uma lava, e lei tusia i le lautusi o lenei tulafono, e faaoo ia e Ieova ia te oe, seia faaumatia oe.
62E toaitiiti foi ni o outou e totoe, o outou sa toatele e pei o fetu o le lagi; auā ua e le faalogo i le siufofoga o Ieova lou Atua.
63E pei ona fiafia foi Ieova ia te outou e agalelei ia te outou, ma faatoatele ia te outou; e faapea foi ona fiafia ai o Ieova ia fanoia outou ia te ia, ma ia faaumatia outou; e tafia foi outou ai le laueleele e te alu i ai e fai mou.
64E faataapeape foi Ieova ia te oe i nuu uma, e afua mai i le tasi tuluiga o le lalolagi e oo atu i le tasi tuluiga o le lalolagi; e te auauna foi i ai i atua ese, o laau ma maa, ua le iloa e oe po o ou tamā.
65O le a e le iloa sina mapu i ia nuu, e leai foi se mea e tumau ai ou alofivae; e faaoo foi e Ieova ia te oe i ia nuu o le loto gatete, ma mata ua fole, ma le loto vaivai;
66e faaletonu foi lou ola; e te fefe foi i le po atoa ma le ao, e te le sanoola i lou ola.
67E te faapea ane i le taeao, E, fia oo i le afiafi! E te faapea ane foi i le afiafi, E, fia oo i le taeao! auā o le fefe o lou loto e te fefe ai, auā foi o mea e vaai i ai ou mata.
68E faafoi atu foi Ieova ia te outou i Aikupito i vaa, (o le ala na ou fai atu ai ia te oe, E te le toe vaai lava i ai,) e faatauina atu ai foi outou i e ua ita ia te outou e fai ma auauna tane ma auauna fafine, seia leai se na te faatauina outou.
Who We AreWhat We EelieveWhat We Do
2025 by iamachristian.org,Inc All rights reserved.
