1Ua faapea mai foi Ieova ia te au, Afai ana tutū mai o Mose ma Samuelu i o‘u luma, ou te le loto lava i lenei nuu; ina tutuli ia ia te i latou i o‘u luma, ia latou o ese.
2Afai latou te fai mai ia te oe, Matou te o ea ifea? Ona e fai atu ai lea ia te i latou, Ua faapea ona fetalai mai o Ieova, O e ua tuu mo le oti tuu ia i le oti; o e ua tuu mo le pelu tuu ia i le pelu; o e ua tuu mo le oge tuu ia i le oge; ma e ua tuu mo le tafeaga tuu ia i le tafeaga.
3Ou te tofia mea eseese e fa e oo ia te i latou, o loo fetalai mai ai Ieova; o le pelu e fasi a‘i, ma ulī e fesaei a‘i, ma manu felelei, ma manu e tataa e aai ai ma faaumatia ai i latou.
4Ou te tuuina atu i latou ia faaatuatuvaleina i malo uma o le lalolagi, ona o Manase le atalii o Esekia le tupu o Iuta, auā o mea na ia faia i Ierusalema.
5Auā Ierusalema e, po o ai ea se alofa atu ia te oe? po o ai foi se faanoanoa ona o oe? po o ai foi se afe ane e ofo alofa ia te oe?
6Ua e lafoaiina a‘u, o loo fetalai mai ai Ieova, ua e tuumuli i tua; o lea ou te faaloaloa ai lo‘u lima i luga ia te oe, ma ou faaumatia ai oe; ua ou lailoa i salamo.
7Ou te faasaviligia i latou i le mea e faasavili a‘i saito i faitotoa o le nuu; e aufanaua i latou ia te au, ou te faaumatia lo‘u nuu, ina ua latou le toe foi mai i o latou ala.
8E toatele i o‘u luma o latou fafine ua oti a latou tane, e sili i le oneone o le sami; ou te aumaia ia te i latou e tau ma le tinā, le taulealea na te faatafunaina i le tutonu o le la; e faafuasei ona a‘u faaosoina atu ia te i latou o le mata‘u ma le atuatuvale.
9Ua vaivai o ia le na fanau mai ai le toafitu; ua to lana mānava; ua goto lona la a o ao lava; ua mā, ma masiasi o ia; o e o totoe ia te i latou ou te tuuina atu i latou i le pelu i luma o e ita mai ia te i latou, o loo fetalai mai ai Ieova.
10Oi talofa ia te au, lo‘u tinā e, ina ua e fanaua mai a‘u o le tagata finau ma le tagata e tupu ai misa i le nuu uma. Ua le talia e a‘u le totogi faasili, ua ou le avatu foi le totogi faasili ia te i latou; a ua faafano mai i latou uma ia te au.
11Ua faapea mai Ieova, E moni, ou te laveaiina oe ia e manuia ai; e moni, o a‘u lava e ala ai ona faatoga mai ia te oe o lē ita mai, i ona po o le leaga ma ona po o le puapuaga.
12E mafai ea ona gauia o le uamea, o le uamea mai le itu i matu, ma le ‘apa memea?
13O au mea e tamaoaiga ai ma au oloa ou te tuuina atu ai e fai ma vete, e le o le taui, a e peitai ona o au agasala uma i lou nuu uma.
14Ou te ta‘ita‘iina e ua ita ia te oe i le nuu ua e le iloa; auā ua tugia le afi i lo‘u ita, e mu ai i luga ia te outou.
15Ieova e, ua e silafia e oe; ia e manatua mai a‘u, ma asiasi mai ia te au, ia e taui atu ona o a‘u i e ua faasaua mai ia te au; o lou faatoatoa ia te i latou aua le aveeseina ai a‘u; ia e silafia ua ou onosai i le faalumaina ona o oe.
16Na maua au afioga, ona ou ‘ai ai lea; sa ia te au lau afioga e fai ma mea e olioli ai ma fiafia ai lo‘u loto; auā ua ta‘ua a‘u i lou suafa, Ieova e, le Atua o ‘au.
17Ou te lei nofo i le faapotopotoga o e tauemu, ma ou le fiafia i ai; ua ou nofo toatasi ona o lou aao; auā ua e faatumuina a‘u i le ita.
18Se a le mea e tumau ai pea lo‘u tiga, ma lo‘u manua ua leaga lava, e le mafai ona faamamafuina? Ua avea lava oe ia te au e peiseai ua pepelo, o le vai ua pē.
19O le mea lea ua faapea ona fetalai mai ai o Ieova, Afai e te toe foi mai, ona ou toe faafoisia mai lea o oe, e te tu i o‘u luma; afai foi e te faateaeseina le lelei i le leaga, e avea oe e pei o lo‘u gutu; e toe foi mai i latou ia te oe, a o oe e te le toe foi atu ia te i latou.
20Ou te fai foi oe ma pa ‘apa memea malosi i lenei nuu; latou te sii mai le taua ia te oe, a e latou te le manumalo ia te oe; auā o a‘u nei, ou te ia te oe e faaola ia te oe, ma laveai ia te oe, o loo fetalai mai ai Ieova.
21Ou te laveai ia te oe ai lima o e amio leaga ma ou faaolaina oe ai lima o e saua.
Who We AreWhat We EelieveWhat We Do
2025 by iamachristian.org,Inc All rights reserved.
