1Mulimuli ane i le o atu ai Mose ma Arona, ua la fai atu ia Farao, O loo faapea ona fetalai mai o Ieova le Atua o Isaraelu, Ia e tuuina mai lo‘u nuu ia latou fai se tausamiga ia te au i le vao.
2Ua tali mai Farao, O ai ea Ieova ou te faalogo ai i lana upu, ma ou tuuina atu ai o Isaraelu e o? Ou te lei iloa Ieova, ou te le tuuina atu foi Isaraelu e o.
3Ona la fai atu lea, Na fetaiai ma i maua le Atua o sa Eperū; se‘i e tuu mai, matou te o malaga i ni aso e tolu i le vao, matou te fai ai taulaga ia Ieova lo matou Atua, ne‘i taia mai i matou e ia i le faamai po o le pelu.
4Ua fai mai le tupu o Aikupito ia te i laua, Ouluā na, o Mose ma Arona, se a ea lea mea lua te faamānava ai le nuu i a latou galuega? Ina o ia i a outou avega.
5Ua fai mai foi Farao, Faauta, o lenei, e toatele lava le nuu; a ua oulua faamānava ia te i latou i a latou avega.
6Ua fai atu foi Farao i lea lava aso i e na pule i galuega a le nuu ma o latou matai, ua ia faapea atu,
7Aua ne‘i outou toe avatu ‘au o saito i le nuu e fai a‘i maaomea faapei o anamua; a ia latou o ma faaputu ‘au o saito mo i latou;
8a o le atoa o maaomea na latou faia anamua, ia totogi atu pea ia te i latou, aua lava le faaitiitia; auā ua paie i latou, o le mea lea o tagi mai ai i latou, ua faapea mai, Se‘i matou o, matou te fai taulaga i lo matou Atua;
9ia mamafa le galuega i tagata na, ma ia latou faia lava; aua foi ne‘i latou faalogo i upu pepelo.
10Ona o ane lea o e na pule i galuega a le nuu, ma o latou matai, ua latou fai atu i le nuu, ua faapea, O loo faapea ona fetalai mai o Farao, Ou te le avatu ia te outou ni ‘au o saito.
11Ina o ia outou, ina saili ‘au o saito i se mea tou te maua mai ai, auā e le faaitiitia lava la outou galuega.
12Ona taapeape lea o le nuu i le laueleele uma o Aikupito e faaputu ai tagutugutu o saito e fai ma ‘au o saito.
13Ua nanati atu foi e na pule i le galuega, ua faapea atu, Ina faaatoa ia a outou galuega, o le aso ma lana galuega, faapei ona outou faia a o i ai ‘au o saito.
14Ona sasaina lea o matai o le fanauga a Isaraelu, sa tofia e pule ia i latou e i latou e na pule mai ia Farao, o loo faapea ane, Se a ea le mea na outou le faaatoa ai i le asō ma anauafi le galuega i maaomea na tofia ia te outou, pei o aso anamua?
15Ona o atu lea o matai o le fanauga a Isaraelu, ua tagi atu ia Farao, o loo faapea, Se a le mea e te faapea ai ona fai i au auauna?
16E lei au mai ni ‘au o saito i au auauna, a e fai mai i latou ia te i matou, Ina faia o maaomea; faauta foi, ua sasaina au auauna, a o i lou lava nuu le sese.
17A ua fai mai o ia, Ua paie, ua paie lava outou, o le mea lea tou te fai mai ai, Se‘i matou o, matou te fai taulaga ia Ieova.
18O lenei, o ia outou, ina galulue, e le avatu ni ‘au o saito ia te outou, a e tou te au mai pea le atoa o maaomea.
19Ona iloa lea e matai o le fanauga a Isaraelu ua pagatia i latou, ina ua fai mai, Aua tou te faaitiitia lava maaomea i lea aso ma lea aso.
20Ua latou fetaiai ma Mose ma Arona, o tutū mai i laua i le ala, ina ua latou o i fafo na ia Farao.
21Ona latou fai atu ea lia te i laua, Ia sisila mai Ieova ia te oulua, ma faamasino mai, auā o oulua ua inosia ai i matou i luma o Farao ma ana auauna, e tuu ai le pelu i o latou lima e fafasi a‘i matou.
22Ona foi atu lea o Mose ia Ieova, ma fai atu, Le Alii e, se a le mea ua e agaleaga ai i lenei nuu? Se a foi le mea na e auina atu ai a‘u?
23Auā talu ina ou alu atu ia Farao e tautala atu ai i lou saufa, ua agaleaga mai lava o ia i lenei nuu; e te lei laveai lava i lou nuu.
Who We AreWhat We EelieveWhat We Do
2025 by iamachristian.org,Inc All rights reserved.
