1Ua fai ane Tavita ia Ieova i upu o lenei pese i le aso na laveaiina ai o ia e Ieova ai lima o e na ita ia te ia uma lava, atoa ma le lima o Saulo.
2Ua ia faapea ane, O Ieova, o lo‘u papa lea, ma lo‘u ‘olo, ma lo‘u faaola.
3O le Atua o lo‘u papa, ou te faatuatua lava ia te ia; o lo‘u talita o ia, ma le nifo o lo‘u olataga, o lo‘u ‘ola maualuga, ma lo‘u malu, o lo‘u faaola, e te faaola ia te au ai le sauaga.
4Ou te valaau ia Ieova, e tusa ona viia o ia; o lea a faaolaina ai a‘u ai e ita mai ia te au;
5auā na siosiomia a‘u i galu e oti ai; o tafega a e ulavavale na faamatautia ai a‘u.
6Na siomia a‘u i mailei a seoli, na ou lumanai o matāsele a le oti;
7ona ou valaau atu ai lea ia Ieova i lo‘u puapuaga; na ou valaau lava i lo‘u Atua; na faafofoga mai foi o ia i lo‘u leo ai lona malumalu, o la‘u alaga na oo i ona fofoga.
8Ona luluina ai lea mea mafuie le lalolagi; o faavae o le lagi na gatete ia, na luluina ia, auā na toasa lava o ia.
9Na alu ae le asu i ona pogaiisu; o le afi mai lona fofoga ua maamaai lea, ua mu ai malala ola.
10Na ia faaifo foi le lagi ma afio ifo; sa i lalo o ona aao le pogisa.
11Sa tietie o ia i le kerupi ma lele; na iloa o ia i apaau o le matagi.
12Na faia e ia o le pouliuli ma fale apitaga e siosio ai ia te ia; o le faapotopotoga o vai ma ao uliuli.
13O le pupula nai ona luma na mu ai malala ola o le afi.
14Na faititili e Ioeva mai le lagi; na tŭlei ifo e le Silisili ese o lona siufofoga.
15Na fana atu e ia o u fanafana, ma faataapeape ia te i latou; na ia faaemo mai le uila, ma tuli ese ai ia te i latou.
16Ona iloa ai lea o le iliti vai; ua aliali mai faavae o le lalolagi i le aoaiga a Ieova, i le mapugatama‘i ai ona fofoga.
17Ua ia aapa mai lona aao mai luga, ua ia tago mai ia te au; na ia faaea ia te au ai vai e tele.
18Ua ia laveai mai ia te au ai le na ita mai, o lē sa malosi; o e na ‘ino‘ino mai ia te au, auā na sili lo latou malosi i lo‘u.
19Na latou lumanai a‘u i le aso o lo‘u malaia; a o Ieova o ia na ou faalagolago i ai.
20Ua ia aumaia a‘u i le mea lautele; ua ia laveai ia te au, auā ua finagalo alofa mai o ia ia te au.
21Ua tauia mai a‘u e Ieova e tusa ma la‘u amiotonu; ua taui mai e ia ia te au e tusa ma o‘u lima mamā.
22Auā ua ou tausia ala o Ieova; ma ou le lafoai faalemata‘u i lo‘u Atua.
23Aua na ou lumanai pea ana faamasinoga uma; na ou le tuueseina foi ana tulafono ia te au.
24Na ou amiotonu i ona luma, na ou taofia a‘u i la‘u agasala.
25O lenei, ua tauia mai a‘u e Ieova e tusa ma la‘u amiotonu; e tusa foi ma o‘u lima mamā i ona lava luma.
26E te amio alofa oe i le ua alofa; e te amiotonu oe i le ua amiotonu.
27E amio mamā oe i le ua amio mamā; e te faapiopio foi oe i le ua faapiopio.
28E te faaolaina le nuu ua tigaina; a o loo e silasila ifo i e faamaualuga, ina ia e faamaulaloina i latou.
29Auā o oe lava Ieova e, o lo‘u lamepa; e faamalamalamaina foi e Ieova lo‘u pouliuli.
30Auā o oe na ou sofai ai le ‘au; o lo‘u Atua na ou osopuna ai i le pa.
31O le Atua e sao lava lona ala; ua se ario ua te‘a ma le otaota afioga a Ieova, o le talita o ia i e faatuatua uma lava ia te ia.
32Auā o ai ea le Atua, ua na o Ieova lava? O ai ea le papa, ua na o lo tatou Atua?
33O le Atua o lo‘u ‘olo malosi ia; na ia faasa‘oina foi lo‘u ala.
34Ua na faia o‘u vae e pei o vae o aila; ua ia faatuina lava a‘u i a‘u mea maualuga.
35Ua ia a‘oa‘o i o‘u lima e tau ai le taua; ma ua lolou ai e o‘u lima le aufana ‘apa memea.
36Ua e foaiina mai foi ia te au le talita o le olataga mai ia te oe, o lou agamalu ua faasilisiliina ai a‘u.
37Ua faalauteleina e oe le mea ou te savali ai, ne‘i mapeva o‘u vae.
38Na ou tuliloa i e na fai a‘u mo latou fili, ma ou fasiotia i latou; na ou faaumatia i latou ona ou faatoa foi mai lea.
39Ua ou tineia i latou, ma ou fasia i latou; ua latou le mafaia ona tutū i luga; na pauu i latou i lalo o o‘u vae.
40Ua e fusia a‘u i le malosi mo le taua; ua e faatoilalo i e na laga mai ia te au.
41O oe ua liutuaina mai ai ia te au o e ua fai a‘u mo latou fili; o e na ‘ino‘ino ia te au, ua fano lava i latou ia te au.
42Na vaavaai i latou, a ua leai se faaola; ua latou vaavaai ia Ieova, a ua na le tali atu ia te i latou.
43Ona ou nutininii lea ia te i latou, e pei o le efuefu o le eleele; na ou tu‘ipala ia te i latou, e pei o le palapala o le ala, na ou solia i latou.
44Na e laveai ia te au ai fefinauaiga ma lo‘u nuu; ua e tausi ia te au e fai ma pule i nuu ese; e auauna mai ia te au le nuu na ou le iloa.
45E faatagā vivii mai ia te au tagata ese; a o latou lagona, ona latou faalogo ai lea ia te au.
46E mavae atu tagata ese; e fusia i latou i mea ua puipuia mo i latou.
47O loo soifua Ieova, ia faafetaia foi lo‘u papa; ia viia le Atua, o le papa o lo‘u faaolataga.
48O le Atua o ia lē taui ma sui ona o a‘u; o ia foi lē faatoilaloina le nuu ia te au;
49o lē laveai mai foi ia te au i e ua ita mai ia te au; ma ē faasilisiliina a‘u i e na laga mai ia te au; ua e laveaiina a‘u nai le tagata faasaua.
50O le mea lava lea, Ieova e, ou te vivii atu ai ia te oe i luma o nuu ese; ou te pese atu foi i lou suafa.
51O le ‘olo o le olataga o ia i lana tupu; e agalelei o ia i le na ia faauuina, o Tavita lava, atoa ma ana fanau e oo i le faavavau.
Who We AreWhat We EelieveWhat We Do
2025 by iamachristian.org,Inc All rights reserved.
