II. NOFOAIGA A TUPU, 11 - Samoan Old Version Bible

O LE MATAUPU XI.O le vaoia o Reopoamo e le Atua, aua le sii atu le taua ia Isaraelu.

1Ua oo Reopoamo i Ierusalema, ona faapotopoto ai lea e ia o le aiga o Iuta ma Peniamina e selau afe ma afe e valu sefulu, o e ua filifilia, o e ua taulia taua, e tau ma Isaraelu, ia toe maua mai le malo ia Reopoamo.

2A ua tŭlei mai le afioga a Ieova ia Semaia le tagata o le Atua, ua faapea mai,

3Ina fai atu ia ia Reopoamo le atalii o Solomona le tupu o Iuta, i le ma Isaraelu uma o i Iuta ma Peniamina, ia faapea atu,

4O loo faapea ona fetalai mai o Ieova, Aua ne‘i o ae, aua ne‘i tou sii atu le taua i o outou uso; ia taitasi outou ma foi atu i lona aiga; auā e mai ia te au lenei mea. Ona latou faalogo lea i le afioga a Ieova, ua liliu ua le o atu e tau ma Ierepoamo.

5Ua nofo Reopoamo i Ierusalema, ma ua faia e ia o aai e fai ma ‘olo i Iuta.

6Ua faia e ia o Peteleema, ma Etama, ma Tikoa,

7ma Petesura, ma Suka, ma Atulama,

8ma Kata, ma Maresa, ma Sifi,

9ma Aturaima, ma Lakisa, ma Aseka,

10ma Soraa, ma Ailona, ma Heperona, o i Iuta ma Peniamina ia, o aai nofo ‘olo.

11Na faamalosia e ia o ‘olo, ma ua tuu i ai o alii, ma le faupue o mea e ‘ai, ma suauu, ma uaina.

12Na tuu foi e ia o talipupuni ma tao i lea aai ma lea aai, ma ua faia ia matuā malosi; o Iuta ma Peniamina ua ‘au faatasi ma ia.

13Ua o mai foi ia te ia le au fai taulaga ma sa Levī sa i Isaraelu uma mai o latou nuu uma.

14Auā na tuua e sa Levī o latou tuāfanua ma o latou tofi, ma ua o mai i Iuta ma Ierusalema; auā ua faateaeseina i latou e Ierepoamo ma ona atalii i le faiva o faitaulaga ia Ieova.

15A ua ia tofia mo ia o faitaulaga o mea maualuluga, ma aitu, ma tamai povi na ia faia.

16Mulimuli ia te i latou ona o mai o i latou mai itu aiga uma o Isaraelu o e ua tuu i o latou loto e saili ia Ieova le Atua o Isaraelu na o mai i latou i Ierusalema e faitaulaga ia Ieova le Atua o latou tamā.

17Ua latou faatumauina le malo o Iuta, ma latou faamalosia Reopoamo le atalii o Solomona i tausaga e tolu; auā ua latou savavali i le ala o Tavita ma Solomona i tausaga e tolu.

18Ona fai avā lea o Reopoamo ia Maalata le afafine o Ieremota o le atalii o Tavita, ma Aviaila le afafine o Eliapo le atalii ia o Iese

19Na fanau ai ia te ia o atalii; o Iuso, ma Semaria, ma Saama.

20E mulimuli ane ia te ia, na ia fai avā ia Maaka le afafine o Apisaloma; ma fanau ai ia te ia o Avia, ma Atai, ma Sesa, ma Salome.

21Ua sili le loto o Reopoamo ia Maaka le afafine o Apisaloma i ana avā uma ma ana palake; (auā e toasefulu ma le toavalu ana avā, ma palake e toaono sefulu, ma ua fanaua e ia o atalii e toalua sefulu ma le toavalu, ma afafine e toaono sefulu).

22Ua tofia e Reopoamo o Avia o le tama a Maaka e fai ma alii sili e pule i ona uso; auā o lona manatu e fai o ia ma tupu.

23Na ia fai faautauta, ma faanonofosoloina ona atalii uma i nuu uma o Iuta ma Peniamina, i aai nofo ‘olo uma; ua foai e ia ia te i latou o mea e ‘ai e tele. Ua saili foi e ia o avā e toatele.