1Ua alu le feau a Esekia ia Isaraelu uma atoa ma Iuta, ma ua tusi atu tusi ia Efaraima ma Manase, ia o mai i latou i le fale o Ieova i Ierusalema, e fai le paseka ia Ieova le Atua o Isaraelu.
2Auā na filifili e le tupu, ma alii sa ia te ia, ma le fapotopotoga uma i Ierusalema, e fai ai le paseka i le lua o masina.
3Auā ua le mafai ona fai ai i ia ona po, auā o le au faitaulaga e lei uma ona faapaiaina i latou e i latou; o le nuu foi e lei faapotopotoina i latou i Ierusalema.
4Ua tonu lenei mea i le manatu o le tupu atoa ma le manatu o le faapotopotoga uma.
5Ua latou faamauina le filifiliga e tala‘i atu ia Isaraelu uma e gata mai i Peresepa e gata mai i Tanu, ia o mai i latou e fai le paseka ia Ieova le Atua o Isaraelu i Ierusalema; auā ua latou le faia tele pei ona tusia.
6Ua o atu ma tusi a le tupu ma alii sa ia te ia o e avea feau ia Isaraelu uma atoa ma Iuta, e tusa foi ma le poloaiga a le tupu, ua faapea atu, Le fanauga a Isaraelu e, ia outou toe foi mai ia Ieova le Atua o Aperaamo, ma Isaako, ma Isaraelu, ona toe foi mai lea o ia ia te outou o totoe, ua sao i lima o tupu o Asuria.
7Aua ne‘i faapei o outou tamā outou, ma faapei o outou uso, na agasala atu ia Ieova le Atua o latou tamā, ona tuuina atu ai lea o i latou e ia ia faatafunaina, e pei ona outou iloa atu.
8O lenei, aua le faamaaa o outou ua, e pei o outou tamā; ia outou tuuina atu outou ia Ieova, ma o mai i lona malumalu ua faapaiaina e ia e faavavau; ma ia auauna ia Ieova lo outou Atua, ina ia liliu ese ai ia te outou lona toasa tele.
9Afai tou te toe foi mai ia Ieova e alofaina ai o outou uso, ma a outou fanau i luma o e ua faatagataotauaina i latou, ma latou toe foi mai i lenei lava nuu; auā o Ieova o lo outou Atua e alofa fua ma alofa mutimuti vale, e le ‘alo foi ona fofoga ia te outou, pe afai tou te toe foi mai ia te ia.
10Ona ui atu ai lea o e avea feau i lea aai ma lea aai i le nuu o Efaraima ma Manase, e oo atu lava i Sepulona; a ua latou tapisa ia te i latou, ma faatauemu ia te i latou.
11A e peitai o isi tagata o Asera, ma Manase, ma Sepulona, ua latou faamaulalo, ma ua o mai ai i Ierusalema.
12Sa i ai foi ia Iuta le aao o le Atua e foai mai ia te i latou le loto gatasi ina ia faia le poloaiga a le tupu ma alii, e tusa ma le afioga a Ieova.
13Ona faapotopoto lea o tagata e toatele i Ierusalema e fai ai le tausamiga o areto e le faafefeteina i le lua o masina, o le faapotopotoga e matuā tele lava.
14Ona tutū ai lea o i latou i luga, ma latou aveeseina fata faitaulaga sa i Ierusalema, ma fata uma e faamu ai mea manogi ua latou aveeseina, ma latou lafo atu ai i le alia o Ketarono.
15Ua latou fasia foi le paseka i le sefulu ma le fa o aso o le lua o masina; sa masiasi foi le au faitaulaga ma sa Levī, ona latou faapaiaina lea o i latou, ma au mai ai o taulaga mu i le fale o Ieova.
16Ua tutū i latou i le mea e tutū ai i latou e pei o a latou masani, e tusa ma le tulafono a Mose le tagata o le Atua; ua sausau foi le toto e le au faitaulaga, na latou talia mai lima o sa Levī.
17Auā ua toatele i le faapotopotoga e lei faapaiaina; ua fasia foi e sa Levī o paseka mo i latou uma ua le mamā, ina ia faapaiaina i latou ia Ieova.
18Auā e toatele o le nuu, e toatele mai Efaraima, ma Manase, ma Isakara, ma Sepulona, ua latou le faamamā ia te i latou, a ua latou aai le paseka e le tusa ma le mea ua tusia. A ua tatalo Esekia mo i latou, ua faapea atu,
19Ia faamagalo mai e Ieova lē agalelei ia i latou uma lava o e saunia o latou loto e sailiili i le Atua, o Ieova le Atua o latou tamā, e ui lava ina ua le faamamaina e tusa ma le faamamaina o le malumalu.
20Ua faafofogaina Esekia e Ieova, ma ua faamaloloina e ia le nuu.
21O le fanauga a Isaraelu na i ai i Ierusalema na faia e i latou le tausamiga o areto e lei faafefeteina ma le fiafia tele lava i aso e fitu; na vivii atu foi sa Levī ma le au faitaulaga ia Ieova i lea aso ma lea aso i laaupese e vivii atu a‘i ia Ieova.
22Ua faamafanafana atu Esekia i sa Levī uma o e na a‘oa‘o ia mafaufau lelei ia Ieova; ua latou aai foi i le tausamiga i aso e fitu, o fai taulaga faafetai, ma latou faafetai atu ia Ieova le Atua o latou tamā.
23Ona filifili lea e le faapotopotoga uma e fai le tausamiga i nisi aso e fitu; ona latou faia lea i nisi aso e fitu ma le fiafia.
24Auā na avatua e Esekia le tupu o Iuta i le faapotopotoga o povi poa e tasi le afe, ma mamoe e fitu afe; na avatua foi e alii i le faapotopotoga o povi poa e tasi le afe, ma mamoe e sefulu afe; e toatele foi o le au faitaulaga na faapaiaina i latou e i latou.
25Ua fiafia le faapotopotoga uma o Iuta, atoa ma le au faitaulaga ma sa Levī, ma le faapotopotoga uma na o mai nai Isaraelu, ma tagata ese na o mai nai le nuu o Isaraelu, ma e sa nonofo i Iuta.
26Sa i ai foi le fiafia tele i Ierusalema; auā e lei i ai se mea faapea i Ierusalema talu ona po o Solomona le atalii o Tavita le tupu o Isaraelu.
27Ona tutū ai lea o le au faitaulaga, o sa Levī, ma latou faamanuia atu i le nuu; sa faafofogaina foi e Ieova o latou leo, ma ua oo atu a latou tatalo i lona afioaga paia, o le lagi lava.
Who We AreWhat We EelieveWhat We Do
2025 by iamachristian.org,Inc All rights reserved.
