1O lona sefulu ma le tasi o tausaga, o le aso muamua o le masina, na oo mai ai le afioga a Ieova ia te au, ua faapea mai,
2Le atalii e o le tagata, ua fai mai Turo ia Ierusalema, Ue! ua lepetia o ia na fai ma faitotoa o nuu, ua liliu mai o ia ia te au, e faatamaoaigaina ai a‘u; ua faatafunaina ia.
3O le mea lea na faapea ona fetalai mai ai o le Alii o Ieova, Turo e, faauta, ou te fai oe mo‘u fili, ou te aveina ae nuu e tele, latou te tau ma oe, e pei ona fafati mai o galu o le sami.
4Latou te sŏloia pa o Turo, ma lepetia ona ‘olo, ou te tafiesea lona laueleele, ou te faia foi o ia ma papa iila.
5E avea ia ma mea e fofola ai upega i totonu o le sami; auā o a‘u ua ou fai atu, o loo fetalai mai ai le Alii o Ieova; e avea foi o ia ma vete mo nuu ese.
6O ana tama teine foi o e o i uta e fasiotia i latou i le pelu; ona latou iloa ai lea o a‘u lava o Ieova.
7Auā ua faapea ona fetalai mai o le Alii o Ieova, Faauta, ou te ta‘ita‘iina mai i Turo o Nepukanesa le tupu o Papelonia, o le tupu o tupu, mai le itu i matu, ma solofanua, ma kariota, ma e tietie i solofanua, ma ‘au, ma tagata e toatele.
8Na te fasiotia au tama teine o i uta; na te faia se ‘olo ia te oe, ma tanu se mea mautietie ia te oe, ma faatuina se talipupuni ia te oe.
9Na te faatuina atu foi i au pa o mea e lepeti a‘i, na te lepetia foi ou ‘olo i ana mea maamaai.
10O ana solofanua ina tele e ufitia ai oe i le efuefu; o le taalili o e tietie i solofanua, ma mea taavavale, ma kariota e luluina ai au pa i lona ulu atu i ou faitotoa, e pei ona ulu atu o tagata i le aai ua lepetia.
11E solia ou ala uma i atigivae o ana solofanua; na te fasiotia ou tagata i le pelu, e lafoina i lalo i le eleele tupua e i ai lou malosi.
12Latou te faoa lou oa, ma fai ma vete au mea e faatau; latou te lepetia au pa, ma sofaia ou fale lalelei; o ou maa foi, ma ou laau, ma lou eleele latou te lafo i totonu o le sami.
13Ou te faaiuina le taalili o au pese; o le leo foi o ou kitara e le toe lagona lava.
14Ou te faia oe ma papa iila; e avea oe ma mea e folasia ai upega; e le toe faia lava oe; auā o a‘u o Ieova ua ou fai atu ai, o loo fetalai mai ai le Alii o Ieova.
15Ua faapea ona fetalai mai o le Alii o Ieova ia Turo, E le luluina ea nuu tu matafaga i le taalili o lou paū, pe a uio ē manunua, pe a to fasi i totonu ia te oe?
16Ona o ifo ai lea o alii sili uma o nuu tu matafaga ai o latou nofoālii, ma latou tuueseina o latou ofu talaloa, ma toeseina o latou ofu lanu eseese; latou te oofu i le gatete, latou te nonofo i le eleele, ma saga gatete pea, ma fememeai ona o oe.
17Latou te sauni foi se pese e aualofa a‘i ia te oe, ma latou fai ane ia te oe, E! ua faaumatia oe, sa mau ai tautai, o le aai ta‘ua, o le na malosi i le sami, o ia ma e na nonofo ai, o e na faaoo lo latou matautia ia te i latou uma o e na nonofo ai.
18Ona gatete ai lea o nuu tu loto i le aso e paū ai oe; o nuu tu loto o i le sami, latou te atuatuvale ina ua e mavae atu.
19Auā ua faapea ona fetalai mai o le Alii o Ieova, A oo ina ou fai oe ma aai faatafunaina e pei o aai ua le āina; a oo ina ou faaaluina ae le moana i luga ia te oe, ma ufiufitia ai oe i le sami tele;
20ma ou ave ifo ia te oe i lalo, e faatasi ma e ō ifo i le lua, o nuu o le vavau ia, ma tuuina oe i mea aupitoalalo o le eleele, o mea ua gaogao talu anamua, e faatasi ma e ō ifo i le lua, ina ia le āina oe; ou te tuuina foi le mamalu i le nuu o tagata ola.
21Ona ou faia lea o oe ma mea e ala ai le mata‘u, e le toe ai lava oe; e sailia oe a e le toe maua lava e faavavau, ua fetalai mai ai le Alii o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
