1Mulimuli ane, ua mavae tausaga e sefulu ma le fa, ona ma toe o ae lea i Ierusalema, o i maua ma Panapa, ua matou o foi ma Tito.
2Na ou alu ae e tusa ma le faaliga, ma a‘u faailoa atu ia te i latou le tala lelei ou te tala‘iina atu i nuu ese, a ua fai lemu atu i e ua ta‘ua, ina ne‘i le aoga la‘u momo‘e nei, po o le momo‘e ua mavae.
3A e peitai o Tito na ma faatasi ma a‘u, o le Eleni foi o ia, e lei tauanauina o ia ia peritomeina.
4Sa faapea foi ona o uso pepelo e na faaofia faaleiloga, o tagata ia na o ane faaleiloga e tilotilo i lo tatou sa‘olotoga ua ia te i tatou ia Keriso Iesu, ina ia latou faapologaina i tatou.
5A e matou te lei gauai ma ua le usiusitai ia te i latou i sina itu aso, ina ia tumau ia te outou le tonu o le tala lelei.
6O i latou foi o e ua ta‘ua, (pe na faapefea i latou anamua, e le sa‘u mea lea, e le faailogaina foi se tagata e le Atua;) e leai lava se mea na faaopoopo mai ia te au e i latou ua ta‘ua;
7a e le na o lea, a ua latou iloa ua tuuina mai ia te au le tala lelei mo ē le peritomeina, pei ona tuuina ia Peteru mo ē peritomeina,
8(auā o lē na galue i totonu ia Peteru i le faiva o le aposetolo mo ē peritomeina, o ia lava na galue i totonu ia te au i le faiva o le aposetolo mo nuu ese,)
9na latou iloa foi le alofa tunoa ua foaiina mai ia te au, ona latou fetagofi lea i lima taumatau o le faatasiga ia te i maua ma Panapa e Iakopo, ma Kefa, atoa ma Ioane, o e na ta‘upoutuina, ina ia ma o i nuu ese, a o i latou ia o i e ua peritomeina;
10tau lava ina ia ma manatua o e matitiva, o le mea foi lea na ou naunau i ai e fai.
11A ua alu atu Peteru i Anetioka, ona ou matuā finau atu lea ia te ia i ona lava luma, auā ua tatau ona aoaiina o ia.
12Auā a o lei o mai nisi mai Iakopo, ua aai faatasi o ia ma tagata ese; a ua latou oo mai, ona alo lea o ia, ma vavae ese o ia, ina ua fefe i ē ua peritomeina,
13ona pepelo lea faatasi ma ia o isi Iutaia uma, ua oo ina tosina o Panapa lava i lo latou pepelo.
14A ua ou iloa latou te lei savavali tonu e tusa ma le upu moni a le tala lelei, ona ou fai atu lea ia Peteru i luma o i latou uma, O oe le Iutaia, afai e te amio faanuuese, a e le faa-Iutaia, se a le mea ua e tauanau atu ai i nuu ese ia latou faa-Iutaia?
15O i tatou o Iutaia moni, a e le ni tagata agasala mai nuu ese,
16ua tatou iloa e le ta‘uamiotonuina se tagata i galuega o le tulafono, a o le faatuatua ia Iesu Keriso; o i tatou foi ua tatou faatuatua ia Keriso Iesu, ina ia ta‘uamiotonuina i tatou i le faatuatua ia Keriso, a e le o galuega o le tulafono; auā e le ta‘uamiotonuina se tagata e tasi i galuega o le tulafono.
17A e afai o i tatou o mananao i le fia ta‘uamiotonuina ia Keriso, ua iloa o tagata agasala i tatou lava, po ua fai ai ea Keriso ma auauna a le agasala? Aua ne‘i faapea.
18Auā pe afai ou te toe ati ae i mea na ou lepetia, ou te faaalitinoina a‘u e a‘u o lē solitulafono a‘u.
19Auā o a‘u, na ou oti i la le tulafono ona o le tulafono, ina ia ou ola i la le Atua.
20Ua faasatauroina faatasi i maua ma Keriso; a e ou te le toe ola a‘u, a o Keriso o loo ola i totonu ia te au; o le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia e fai mo‘u sui.
21Ou te le faaleaogaina le alofa tunoa o le Atua; auā ana oo mai le amiotonu i le tulafono, po ua maliu fua Keriso.
Who We AreWhat We EelieveWhat We Do
2025 by iamachristian.org,Inc All rights reserved.
