1Sa nofo Iakopo i le nuu na āumau ai lona tamā, o le nuu lea o Kanana.
2O tala nei i gafa o Iakopo. E sefulu ma le fitu tausaga o Iosefa, sa i ai o ia i ona uso ua leoleo i le lafu, o ia foi o le tama, sa i ai i tama a Pila ma tama a Selepa, o avā ia a lona tamā; na tala mai e Iosefa le tala i a latou amio leaga i lo latou tamā.
3Sa sili le alofa o Isaraelu ia Iosefa i ona atalii uma, auā na fanau o ia ina o toeaina ia; ua ia fai se ofu talaloa mona.
4Ua iloa e ona uso ua sili le alofa o lo latou tamā ia te ia a e itiiti i ona uso uma, ona latou ‘ino‘ino ai lea ia te ia, ma ua le mafai ona tautala filemu ia te ia.
5Na fai le miti a Iosefa, ua faaali i ona uso, ua atili ai ona latou ‘ino‘ino ia te ia.
6Ua ia fai atu ia te i latou, Faalogologo mai ia i la‘u nei miti.
7Faauta, sa tatou fusifusia fusi saito i le fanua; faauta foi, na tulai la‘u fusi saito, ua tu lava ia i luga; faauta foi, na siosio i ai a outou fusi saito, ma latou ifo i la‘u fusi saito.
8Ua fai mai ona uso ia te ia, E te fai ma tupu ea ia te i matou? E te pule foi ea ia te i matou? Ua atili ai ona latou ‘ino‘ino ia te ia ona o ana miti ma ana upu.
9Ua toe fai le tasi ana miti, ua ta‘uina atu ai i ona uso, ua fai atu, Faauta, ua toe fai la‘u miti; faauta foi i le la, ma le masina, ma fetu e sefulu ma le tasi ua latou ifo mai ia te au.
10Ua ia ta‘u atu ai i lona tamā ma ona uso; ona aoai ai lea o lona tamā ia te ia, ua faapea mai ia te ia, O le a ea lau miti na fai? Matou te o mai ea, o a‘u, ma lou tinā, ma ou uso, matou te ifo toele ia te oe?
11Ua matataua ona uso ia te ia, a o lona tamā ua ia taofi i le upu.
12Na o atu ona uso e leoleo i mamoe a lo latou tamā i Sekema.
13Ua fai atu Isaraelu ia Iosefa, E le o leoleo mamoe ea ou uso i Sekema? Sau ia, ou te auina atu oe ia te i latou. Ua fai mai o ia ia te ia. O a‘u lava lenei.
14Ua fai atu ia ia te ia, Alu ia, ina asiasi po ua saogalemu ou uso, ma saogalemu o mamoe, ona e foi mai ai lea ma se tala. Ua ia auina o ia ai le vanu o Heperona, ua oo ia i Sekema.
15Ua iloa o ia e le tasi tagata, faauta, ua feseai o ia i le vao. Ua fesili le tagata ia te ia ua faapea mai, Se a ea e te saili na?
16Ua fai atu o ia, Ou te sailia o‘u uso; se‘i e ta‘ua mai po o fea o latou leoleo ai mamoe?
17Ua fai mai le tagata, Ua o ese i latou i le mea nei, auā na ou faalogo o loo faapea ane i latou, Tatou o ia i Totana. Ona alu lea o Iosefa ua mulimuli atu i ona uso, ua maua i latou i Totana.
18Ua latou iloa mamao ia te ia, a o lei latalata o ia ia te i latou, ua latou taupulepule e fasioti ia te ia.
19Ua fetautalatalai i latou, Faauta, o loo sau lena alii fai miti;
20o lenei, o mai ia, ina tatou fasioti ia te ia, ma lafo i se tasi lua, ma tatou faapea ane, Ua ‘aina o ia e se manu feai; ona tatou iloa lea pe iu i ni a ana miti.
21Ua faalogo ai Reupena, ma na laveai ia te ia ai o latou lima, ua fai atu foi, aua le fasioti ia te ia.
22Ua fai atu foi Reupena ia i latou, Aua le faamaligia le toto; tuu ia ia te ia i lenei lua o loo i le vao, a e aua le oo se lima ia te ia. Sa faapea ia, ina ia na laveai ia te ia ai o latou lima, ma faafoi atu ia te ia i lona tamā.
23Ua oo atu Iosefa i ona uso, ona latou tatala lea o lona ofu ia Iosefa, o lona ofu talaloa lea.
24Ua latou ave ia te ia, ma tuu ai i le lua, sa le sua le lua, e le i ai se vai.
25Ona nonofo lea o i latou ma fai le ‘ava; ua tetepa ae, ua vaai, faauta, o le malaga a sa Isamaelī ua o mai mai Kiliata ma o latou kamela, o loo ave pulu seturo, ma pulu pasama, ma pulu latano, o le a o i latou e ave ifo ai i Aikupito.
26Ua fai ane Iuta i ona uso, Se a le aoga pe a tatou fasioti lo tatou uso, ma ufiufi lona toto?
27O mai ia, ina tatou faatauina ia i sa Isamaelī, a e aua le oo o tatou lima ia te ia, auā o lo tatou uso ma lo tatou lava tino ia; ua faalogo ai ona uso ia te ia.
28Ona o ane lea o tagata Mitiana, o e faatauoa, ona latou sisi lea ma avae ia Iosefa ai le lua, ma latou faatau ia Iosefa i sa Isamaelī i tupe e luafulu; ona latou avatua lea o Iosefa i Aikupito.
29Ua foi mai Reupena i le lua; faauta, ua le i ai Iosefa i le lua; ona saei lea e ia ona ofu.
30Ona foi atu lea o ia i ona uso, ua fai atu ai, E leai se tama! A o a‘u, ou te alu nei ifea?
31Ua latou ave le ofu o Iosefa, ua fasi se ‘oti, ma fufui ai le ofu i le toto.
32Ua latou ave le ofu talaloa, ma avatu i lo latou tamā, ua faapea ane, Ua matou maua le mea nei, se‘i e iloiloina, po o le ofu lenei o lou atalii pe leai?
33Ua ia iloiloina, ua fai ane, O le ofu o lo‘u atalii lava, ua ‘aina ia e se manu feai, ua saeia lava Iosefa.
34Ona saei lea e Iakopo ona ofu, ua ia lavalava i le ie talatala, ma ua faanoanoa pea ia i aso e tele ona o lona atalii.
35Ua tutū i luga ona atalii uma ma ona afafine uma e faamafanafana ia te ia; a e le mafai ona faamafanafanaina o ia, ua fai ane, Auā ou te alu ifo ma le faanoanoa i le tuugamau i lo‘u atalii; ona tagi lea o lona tamā ia te ia.
36Ua faatau sa Mitianā ia te ia i Aikupito ia Potifara o le auauna sili a Farao, o le pule i le ‘au e faafeao.
Who We AreWhat We EelieveWhat We Do
2025 by iamachristian.org,Inc All rights reserved.
