1Ua taoto Avia faatasi ma ona tamā, ua latou tanu foi ia te ia i le aai a Tavita. Ona soloai ane ai lea o lona atalii o Asa e fai ma tupu. O lana nofoaiga sa filemu ai le nuu i tausaga e sefulu.
2Ua amio lelei ma amiotonu Asa i luma o Ieova lona Atua.
3Ua aveeseina e ia o fata faitaulaga i atua ese, ma mea maualuluga, ua ia nutininiia foi tupua, ma ua vavae i lalo o tupua o Asaira.
4Ua ia fai atu ia Iuta ia saili ia Ieova le Atua o latou tamā, ma usiusitai i le tulafono ma le poloaiga.
5Ua ia aveesea foi o mea maualuluga ma tupua o le la, i aai uma o Iuta. Sa filemu le nuu i lana nofoaiga.
6Ua faia e ia o aai nofo ‘olo i Iuta; auā ua filemu le nuu, ua leai foi se taua ia te ia i ia tausaga; auā ua foaiina mai e Ieova le filemu ia te ia.
7Ua faapea atu foi o ia ia Iuta, Ina tatou fai ia o ia aai, ma siosio ai i pa, ma ‘olo, ma puipui, ma faamaufaalava, manū o i o tatou luma le laueleele; auā na tatou saili ia Ieova lo tatou Atua, ua tatou sailiili ia te ia, ua foaiina mai ai e ia le filemu ia te i tatou i itu uma. Ona latou faia lea, ma ua manuia.
8O ‘au a Asa, mai ia Iuta e tolu selau o afe o e ave tali pupuni ma tao; mai ia Peniamina foi e lua selau o afe ma le valu sefulu o afe o e ave talita ma fanafana i aufana. O toa malolosi i latou uma.
9Ona o mai lea o Sera le Aitiope ma ‘au e afe o afe, ma kariota e tolu selau e tau ma i latou; na o mai foi i Maresa.
10Ona alu atu lea o Asa e tau ma ia, ma ua latou tofia le taua i le vanu o Sefata i Maresa.
11Ona valaau atu lea o Asa ia Ieova lona Atua, ua faapea atu, Ieova e, e le se mea faigata ia te oe ona fesoasoani i e toatele, po o i latou ua leai se malosi. Ieova e, lo matou Atua, ia e fesoasoani mai ia te i matou; auā matou te faalagolago ia te oe, ua matou o atu i lou suafa lava e tau ma lena toatele. Ieova e, o oe lava lo matou Atua; aua ne‘i manumalo mai tagata ia te oe.
12Ona fasia lea e Ieova o Aitiope i luma o Asa ma luma o Iuta; ona sosola ai lea o Aitiope.
13Ua tulimuli‘au ia te i latou e Asa ma le nuu sa ia te ia ua oo i Kira; ua fasia Aitiope, ua leai so latou olataga; auā sa faaumatia i latou i luma o Ieova, ma luma foi o lana itu taua; ua latou ave foi vete e matuā tele.
14Ua fāsia foi e i latou o aai uma na vagavagai i Kira; auā ua oo ia te i latou le mata‘u ia Ieova; ua vetea e i latou o aai uma; auā ua matuā tele le vete sa i ai.
15Ua lepetia foi e i latou fale o manu, ma ua aumaia mamoe ma kamela e matuā tele, ma latou toe foi mai i Ierusalema.
Who We AreWhat We EelieveWhat We Do
2025 by iamachristian.org,Inc All rights reserved.
