1O le aso lea na latou faitau ai i le tusi a Mose o faalogo mai le nuu; ona iloa ai lea ua tusia ai, aua ne‘i alu ane lo sa Amonī po o lo sa Moapī i le faapotopotoga a le Atua e faavavau;
2auā na latou le faafetaiai i tagata o Isaraelu ma mea e ‘ai ma vai, a ua latou faaoloa ia Palaamo na te faafano ia te i latou; a ua faaliliuina e lo tatou Atua le faafano e fai ma faamanuia.
3Ua faalogo i latou i le tulafono, ona latou vavaeeseina lea o tagata ese ia Isaraelu.
4A o lei oo i ia ona po, sa faauo ma Tovia o Eliasipa le faitaulaga, sa tofia e pule i le potu o le fale o lo tatou Atua;
5na ia saunia foi mo ia o le potu tele, na latou tuu ai anamua o taulaga i mea e ‘ai, o le pulu lipano, ma ipu, ma mea e sefulu a‘i le saito, o uaina, ma le suāuu, na poloaiina e avatu i sa Levī, ma e pepese, ma le au leoleo faitotoa, ma taulaga i faitaulaga.
6A o ia ona po uma na ou le i ai i Ierusalema; auā o le tausaga e tolugafulu ma le lua o Aretaseta le tupu o Papelonia na ou alu atu ai i le tupu; ua mavae foi aso ona ou faanoi atu ai lea i le tupu;
7na ou sau foi i Ierusalema, ona ou iloa lea o le leaga na faia e Eliasipa ona o Tovia, ina ua saunia mo ia se potu i lotoā o le fale o le Atua.
8Ona ou matuā tiga lea, ma ou lafo i fafo i le potu mea a fale uma a Tovia.
9Na ou fai atu foi, ona latou faamamāina lea o potu; ona ou toe au mai ai lea o ipu o le fale o le Atua, ma le taulaga i mea e ‘ai ma le pulu lipano.
10Na ou iloa foi e lei aumaia tufaaga a sa Levī; auā o sa Levī ma e pepese na faia le galuega, ua latou sosola taitoatasi i lona fanua.
11Ona ou finau atu lea i le au faipule, ma fai atu, Se a ea le mea ua tuulafoaiina ai le fale o le Atua? Na ou faapotopoto foi ia te i latou, ma tofia i latou i lo latou tofiga.
12Ona au mai lea e Iuta uma o mea e sefulu a‘i le saito ma le uaina ma le suāuu i fale e teu ai mea.
13Na ou tofia foi nisi e tausi ai mea ua faaputu, o Selemia le faitaulaga, ma Satoka le tusiupu, ma Petaia o lo sa Levī; e aupito ane foi ia te i latou o Hanana le atalii o Sakuro, o le atalii ia o Matania; auā na ta‘ua i latou ua faamaoni; sa ia te i latou foi ona tufatufa o mea i o latou uso.
14Lo‘u Atua e, ia e manatu mai ia te au ona o lenei mea, aua foi ne‘i sōloiesea lo‘u alofa na faia e a‘u mo le fale o lo‘u Atua, ma ana sauniga.
15O ona po ia na ou iloa ai i Iuta nisi ua soli i soligāvine i le sapati, ma au mai fusi saito, ma faaee avega i asini; atoa ma uaina, ma vine, ma mati, ma avega eseese na latou au mai ai i Ierusalema i le aso sapati; ona ou aoai atu lea ia te i latou i le aso na latou faatau ai mea e ‘ai.
16Sa nonofo ai foi tagata o Turo, o e na aumaia i‘a, ma mea faatau uma, ma faatau atu ai i le sapati i le fanauga a Iuta i Ierusalema.
17Ona ou finau atu lea i alii o Iuta, ma ou fai atu ia te i latou, Se a lenei mea leaga ua outou faia, ma soli ai le Aso Sapati?
18E lei faapea ea ona faia e o outou tamā, ma ua faaoo mai ai e lo tatou Atua lenei leaga uma ia te i tatou ma lenei aai? a ua outou faateleina le toasa ia Isaraelu i lo outou solia o le sapati.
19Ua oo ina mamalu le po i faitotoa o Ierusalema, o lumanai le sapati, ona ou fai atu lea ia puipuia o faitotoa, na ou fai atu foi, aua ne‘i tatalaina seia mavae le sapati; na ou tofia foi nisi o a‘u auauna i faitotoa, ina ne‘i au mai se avega i le aso sapati.
20Sa momoe foi i tua pa o Ierusalema faatasi pe faalua o tagata faatau ma e faatau oloa eseese.
21Ona ou aoai atu lea ia te i latou, ma ou fai atu ia te i latou, Se a ea le mea tou te momoe ai e latalata ane i le pa? A toe faapea ona faia e outou, ou te pupue ia te outou. Talu lea aso ua latou le omai i le Sapati.
22Na ou fai atu foi i sa Levī ia latou faamamā ia te i latou, ma ia latou o mai e leoleo i faitotoa, ia faapaiaina le aso sapati. Lo‘u Atua e, ia e manatu mai ia te au ona o lenei mea foi, ma ē faasao ia te au e tusa ma le tele o lou alofa.
23O na ona po foi na ou iloa ai nisi o sa Iutā o e na fai avā i fafine o Asetota, ma sa Amonī, ma sa Moapī;
24ua tautala faaleogalua foi a latou fanau i le gagana a Asetota, a ua latou le mafaia ona tautala i le gagana a Iuta, a e tusa ma le tautala a lea nuu ma lea nuu.
25Na ou finau foi ma i latou, ma ou fetuu ia te i latou, ma ou fasi nisi o i latou, ma ou futi o latou lauulu, ma ou fai atu ia tauto i latou i le Atua, ua faapea atu, Tou te le avatu o outou afafine i o latou atalii, e le fai avā foi o outou atalii, po o outou lava i o latou afafine.
26Na le agasala ea Solomona le tupu o Isaraelu i na mea? Ua leai foi se tupu i nuu e tele e pei o ia, o le sa alofaina e lona Atua, sa tofia foi o ia e le Atua e fai ma tupu ia Isaraelu uma; a ua faatupu ia te ia lava le agasala e fafine ese.
27O lenei, pe matou te faalogo ea ia te outou e faia lenei mea leaga tele uma, e agasala i lo tatou Atua i le fai avā i fafine ese?
28O le tasi atalii o Ioata, le atalii o Eliasipa le faitaulaga sili, sa fai avā ia i le afafine o Sanepalata le Horono; na ou tulieseina o ia ia te au.
29Lo‘u Atua e, ia e manatua i latou, auā ua faaleagaina e i latou le faiva o faitaulaga, ma le feagaiga o le faiva o faitaulaga ma sa Levī.
30Ua ou faamamā ia te i latou ia te‘a ma tagata ese uma, ma ou tofia vasega o faitaulaga ma sa Levī, taitasi ma lana galuega;
31mo le taulaga foi i fafie i ona po ua tofia, ma mea faapolopoloina. Lo‘u Atua e, ia e manatu mai ia te au, ia ou manuia ai.
Who We AreWhat We EelieveWhat We Do
2025 by iamachristian.org,Inc All rights reserved.
