KENESE, 26 - Samoan Old Version Bible

O LE MATAUPU XXVI.Ua alu ifo Isaako i Kira. Ua toe foi mai i Peresepa.

1Na i ai foi le oge i le nuu, a e ese le uluai oge sa i ona po o Aperaamo. Ona alu ai lea o Isaako i Kira ia Apimeleko le tupu o tagata o Filisitia.

2Ua faaali mai Ieova ia te ia, ua faapea mai, Aua e te alu ifo i Aikupito, a ia e nofo i le nuu ou te fai atu ai ia te oe,

3ia e nofo faaāumau i lenei nuu, ou te i ai foi ia te oe, ma ou faamanuia ia te oe, auā ou te foai atu ia te oe ma au fanau ia nuu uma lava; ou te faataunuuina foi le tautoga na a‘u tauto ai ia Aperaamo lou tamā;

4ou te faatoateleina foi au fanau pei o fetu o le lagi, ma ou faoiina atu i au fanau ia nuu uma, o lau fanau foi e manuia ai nuu uma o le lalolagi;

5auā na faalogo Aperaamo i a‘u upu, ma na tausi i a‘u sauniga, ma a‘u poloaiga, ma a‘u faatonuga, ma a‘u tulafono.

6Ona nofo ai lea o Isaako i Kira;

7ona fesili mai ai lea o tagata o le nuu i lana avā, ona fai atu ai lea o ia, O lo‘u tuafafine ia; auā na fefe ia e fai atu, O la‘u ava ia, sa faapea o ia, Ne‘i fasia a‘u e tagata o le nuu ona o Repeka; auā o ia ua lalelei.

8Ua loa ona nofo ai o ia, ona vaai atu ai lea o Apimeleko le tupu o Filisitia i le faamalama, faauta foi, ua iloa, ua taaalo Isaako ma Repeka lana avā.

9Ona valaau atu ai lea e Apimeleko ia Isaako, ua faapea atu. Faauta ea, o lau avā lava ia, pe se a foi le mea na e fai mai ai, O lo‘u tuafafine ia? Ona fai mai ai lea o Isaako ia te ia, Auā na a‘u faapea, Ne‘i ou oti ona o ia.

10Ona faapea atu ai lea o Apimeleko, Se a lenei mea ua e faia ia te i matou? A na mao atu se tasi o le nuu i lau avā, po ua oo mai ia te i matou le agasala ona o oe.

11Ona fetalai atu ai lea o Apimeleko i le nuu uma, ua faapea atu, O se papai atu i lenei tagata po o lana avā e matuā oti lava ia.

12Ona luluina lea e Isaako o saito i lea nuu, na maua ai foi le taiselau i fua i lea tausaga; na faamanuia foi e Ieova ia te ia.

13Ua tagata ola lenei tagata, ua tupu pea lava, ua atili ai ua oo ina matuā tagata ola lava ia;

14auā sa ia te ia lafu mamoe, ma lafu povi, ma auauna e toatele; na mataua foi Filisitia ia te ia.

15O vaieli uma foi na eli e auauna a lona tamā i ona po o Aperaamo lona tamā, na tatanu e Filisitia, ma faatutumu i eleele.

16Ua fai atu foi Apimeleko ia Isaako, Ia e alu ese ia te i matou; auā ua sili lava oe ia te i matou.

17Ona alu ese ai lea o Isaako, ua to lona fale ie i le vanu o Kira, ua nofo ai.

18Ua toe eli foi e Isaako o vaieli na latou eli i ona po o Aperaamo lona tamā, auā na tatanu e Filisitia ina ua oti o Aperaamo; ua ia faaigoaina i igoa na faaigoa a‘i e lona tamā.

19Ua eli auauna a Isaako i le vanu, ona maua ai lea o le vaipuna.

20Ona fefinauai ai lea o le leoleo manu a Kira ma leoleo manu a Isaako, ua faapea ane, O lo matou vai lea; ua ia faaigoa le vaieli, o Eseki, auā na latou fefinauai ma ia.

21Ua latou toe eli le tasi vai, ona latou toe fefinauai ai lea; ua ia faaigoa ai o Setani.

22Ua tuua e ia lea mea, ua eli le tasi vai; ua latou le fefinauai ai, ona ia faaigoa ai lea o Reopo, ua faapea ana, Auā ua faalauteleina nei e Ieova se mea e nonofo ai, tatou te uluola ai i le nuu.

23Ona ia alu ae ai lea ai lea mea i Peresepa.

24Ona faaali mai ai lea o Ieova ia te ia i lea lava po, ua faapea mai, O a‘u o le Atua o Aperaamo lou tama; aua e te fefe, auā ou te ia te oe, ou te faamanuia foi ia te oe, ma faatoateleina lau fanau, ona o la‘u auauna o Aperaamo.

25Ua ia fai ai le fata faitaulaga, ma valaau i le suafa o Ieova; ua ia to ai foi lona fale ie, ua eli ai foi e auauna a Isaako le vaieli.

26Ona alu atu ai lea ia te ia o Apimeleko mai Kira, o i latou ma Aasata o le tasi o ana uo, atoa ma Fikolu le alii e pule i ana ‘au.

27Ona fai ane ai lea o Isaako ia te i latou, Se a le mea ua outou o mai ai ia te au, auā ua outou ‘ino‘ino ia te au, ua outou tulia foi a‘u?

28Ona latou fai atu ai lea, Ua matou matuā iloa ua ia te oe Ieova, ona matou faapea ai lea, ia tatou faia nei le tautoga o i matou lava ma oe, ia tatou faia foi la tatou mavaega ma oe;

29e te le agaleaga mai lava ia te i matou, pai ona matou le tagofia oe, pei ona matou faia foi ia te oe na o le lelei, ma matou tuu atu ia te oe e alu ma le filemu; ua faamanuia nei oe e Ieova.

30Ua ia sauni se taumafataga mo i latou, ua latou aai ma inu.

31Ua latou tulai i le taeao, ua tauto Ie tasi i le tasi, ona tuuina atu lea o i latou e Isaako, ona latou o ese ai lea ia te ia ma le filemu.

32O lea lava aso ua o mai ai auauna a Isaako, ua ta‘u mai ai ia te ia i le vaieli na latou elia, ua faapea mai ia te ia, Ua matou maua le vai.

33Ua ia faaigoa ai o Sepa, o le mea lea ua igoa ai le aai o Peresepa, ua oo i lenei aso.

34Ua oo Esau i ona tausaga e fagafulu, ona fai avā ai lea ia Iutiti le afafine o Peeri, o le sa Hetī, ma Pasemeta le afafine o Aluna, o le sa Hetī.

35Ua fai i laua ma faatiga loto ia Isaako ma Repeka.