1Ua fai atu foi Mose i alii sili o itu aiga o le fanauga a Isaraelu, ua faapea atu, O le mea lenei ua poloai mai ai Ieova,
2Afai e tauto se tane i se tautoga ia Ieova, pe tuu augani e faamauina a‘i o ia; aua ne‘i tuumavaega o ia i lana upu, a e faia lava e ia e tusa ma mea uma ua mavae atu i lona gutu.
3Afai foi e tauto se fafine i se tautoga ia Ieova, e faamauina a‘i foi o ia, a o teine muli ia i le aiga o lona tamā;
4afai foi e faalogo lona tamā i lana tautoga, ma le mea na ia faamauina ai o ia, a e faalologo lona tamā ia te ia, ona tumau ai lea o mea uma ua ia tauto ai; e tumau foi o mea uma na ia faamauina ai o ia.
5A e afai e vavao lona tamā ia te ia i le aso na ia lagona ai, ona le tumau ai lea o se mea e tasi na ia tauto ai, po o se mea na ia faamauina ai o ia; e faamagaloina foi o ia e Ieova, auā ua vaoia o ia e lona tamā.
6Afai ua nofo tane o ia ina o tauto o ia, pe tautala faalemafaufau i se mea na ia faamauina ai o ia;
7ua faalogo foi lana tane, a e faalologo o ia ia te ia i le aso na ia lagona ai; ona tumau ai lea o mea ua ia tauto ai, ma mea foi na ia faamauina ai o ia.
8A e afai e vavao lana tane ia te ia i le aso na ia lagona ai, ona tatalaina lea e ia o le mea na ia tauto ai, ma le mea na ia tautala faalemafaufau ai na ia faamauina ai o ia; e faamagaloina foi o ia e Ieova.
9A o le tautoga a le fafine ua oti lana tane po o le fafine ua aleia e lana tane, o mea uma na ia faamauina ai o ia e tutumau ia te ia.
10Afai foi e tauto o ia a o i le fale o lana tane, pe faamauina o ia e ia i se augani;
11ua faalogo ai foi lana tane, a e faalologo o ia ia te ia, ua le vavao ia te ia, ona tutumau lea o mea uma na ia tauto ai, e tutumau foi o mea uma na ia faamauina ai o ia.
12A e afai ua matuā tatalaina ia mea e lana tane i le aso na ia lagona ai, e le tumau se mea e tasi na mavae atu i lona gutu i mea na ia tauto ai, po o le mea na ia faamauina ai o ia, ua tatalaina ia mea e lana tane; e faamagaloina foi o ia e Ieova.
13O tautoga uma, atoa ma augani uma e faamau a‘i e faatiga ai o ia e ia, e mafai i lana tane ona faatumauina, e mafai foi i lana tane ona tatalaina.
14A e afai e matuā faalologo lana tane ia te ia i lea aso ma lea aso, ona faatumauina lea e ia o mea uma na ia tauto ai, ma mea uma na faamauina ai o ia; ua ia faamauina ia mea ina ua faalologo o ia ia te ia i le aso na ia lagona ai.
15A e afai ua uma ona ia lagona ia mea, a e mulimuli ane ona matuā tatalaina lea e ia, ona nofo sala ai lea o ia i le sala a le fafine.
16O tulafono ia na fetalai mai ai Ieova ia Mose i le tane ma lana avā; o le tamā foi ma lona afafine, a o teine muli o la i le aiga o lona tamā.
Who We AreWhat We EelieveWhat We Do
2025 by iamachristian.org,Inc All rights reserved.
