1A ua agasala le fanauga a Isaraelu i le mea na faatoina; auā o Akana, le atalii o Karame, le atalii lea o Sapata, le atalii lea o Sera, o le itu aiga o Iuta, na ave e ia ni mea ai mea na faatoina; ona tupu ai lea o le toasa o Ieova i le fanauga a Isaraelu.
2Ua aauina atu e Iosua ni tagata ai Ieriko e ō i Ai, e lata ane i Petavene, o i le itu i sasae o Peteli; ua ia fai atu foi ia te i latou, ua faapea atu, Ia outou o ae e asiasi i le nuu. Ona o ae ai lea o ia tagata, ma asiasi i Ai.
3Ua latou foi mai ia Iosua, ona latou faapea mai lea ia te ia, Aua le o ae le nuu uma; a ia o ae ni tagata pe lua afe, pe tolu afe e fasia Ai; aua ne‘i lailoa le nuu uma e o atu ai i lea mea; auā e toaitiiti i latou.
4Ona o ae ai lea i lea mea o tagata pe tolu afe; a ua latou sosola i luma o tagata o Ai.
5O i latou na fasia e tagata o Ai, pe toatolugafulu ma le toaono; auā ua latou tuliloa ia te i latou, e afua i le faitotoa o le aai, e oo i Separema, ma fasi ia te i latou i le ifo a‘i; ona liu suāvai lea o loto o le nuu, e pei o le suāvai lava.
6Ona saei lea e Iosua ona ofu, ma faapaūfao i le eleele i luma o le atolaau a Ieova, ua oo i le afiafi, o ia, ma toeaina o Isaraelu; ua latou asu ae le efuefu i o latou ulu.
7Ua fai ane foi Iosua, Aue! le Alii e, Ieova, se a ea le mea ua e faaoo mai ai lenei nuu i lenei itu o Ioritana e tuuina atu i matou i le lima o sa Amorī, ia faaumatia ai i matou? E, ana matou fia nonofo i le la itu o Ioritana!
8Le Alii e, se a ea la‘u e fai atu ai pe a liutuaina Isaraelu i luma o e ita mai?
9Auā a faalogo i ai sa Kananā, atoa ma i latou uma ua nonofo i le nuu, ona latou siosio mai lea ia te i matou, ma latou faaumatia o matou igoa ai le lalolagi; pe faapefea foi lou suafa mamalu?
10Ona fetalai mai ai lea o Ieova ia Iosua, Ina tulai ia oe; se a ea le mea ua e faō ai faapea?
11Ua agasala Isaraelu, ua tuumavaega foi i latou i la‘u feagaiga na ou fai atu ai ia te i latou, auā ua ave e i latou ni mea ai mea ua faatoina, ua latou gaoi, ma faa‘ole‘ole foi, ma tuu ai lava i a latou mea.
12Ua le mafai foi ona tutū o le fanauga a Isaraelu i luma o e ita ia i latou, ua liutuaina i latou i luma o e ita ia i latou, auā ua faatoina i latou; ou te le toe i ai ia te outou, pe afai tou te le matuā faaumatia le ua faatoina nai ia te outou.
13Ina tulai ia, ma faapaiaina le nuu, ma e faapea atu, Ia faapaiaina outou e outou a taeao; auā o loo faapea ona fetalai mai o Ieova le Atua o Isaraelu, Isaraelu e, ua ia te oe le mea ua faatoina; e te le mafaia ona tu i luma o e ita ia te oe seia outou aveesea ia te outou le mea ua faatoina.
14E faalatalataina mai foi outou a itu aiga a taeao; o le itu aiga e maua e Ieova, ia sau a aiga; o le aiga foi e maua e Ieova, ia faalatalata mai a puiaiga; o le puiaiga e maua e Ieova ia faalatalataina mai ai ona tagata taitasi.
15E susunuina i le afi o le e maua ua i ai le mea ua faatoina, o ia lava, atoa ma ana mea uma; auā ua solia e ia le feagaiga a Ieova, auā foi ua faia e ia le mea leaga i Isaraelu.
16Ona tulai lea o Iosua i le taeao lava, ma na faalatalataina mai o Isaraelu a itu aiga, ua maua le itu aiga o Iuta.
17Ua faalatalataina mai foi e ia o aiga o Iuta, ua maua e ia le aiga o sa Serā; ua faalatalataina mai e ia o le aiga o sa Serā ona tagata taitasi; ua maua Sapata.
18Ona faalatalataina mai lea e ia i puiaiga ona tagata taitasi; ua maua Akana, o le atalii o Karame, o le atalii lea o Sapata, o le atalii lea o Sera, o le itu aiga o Iuta.
19Ona fai atu ai lea o Iosua ia Akana, Lo‘u atalii e, se‘i e avatu le viiga ia Ieova, le Atua o Isaraelu, ma faaali atu ia te ia; se‘i e ta‘u mai ia te au le mea ua e faia; aua le natia ia te au.
20Ona tali mai ai lea o Akana ia Iosua, ua faapea mai, E moni ua ou agasala lava ia Ieova le Atua o Isaraelu, ua faapea ma faapea ona ou faia;
21na ou iloa i le vete o le tasi ofu Senara e lelei, ma sekeli ario e lua selau, ma le potopotoga auro e lima sefulu o sekeli o lona mamafa lea, na ou manao i ai, ona ou ave ai lea; faauta foi ua tanumia i le eleele i totonu o lo‘u fale ie, o le ario foi ua laulalo ai.
22Ona aauina atu lea e Iosua ni auauna, ua latou taufetuli foi i le fale ie; faauta, ua tanumia ia mea i lona fale ie, o le ario foi ua laulalo ai.
23Ona latou ave lea o ia mea ai totonu o le fale ie, ma au mai ia Iosua, atoa ma le fanauga uma a Isaraelu, ma latou sasaaina atu ai i luma o Ieova.
24O Iosua, ma Isaraelu uma na o faatasi ma ia e ave ia Akana le atalii o Sera, ma le ario, ma le ofu, ma le potopotoga auro, ma ona atalii, ma ona afafine, ma ana povi, ma ana asini, ma ana mamoe, ma lona fale ie, ma mea uma na ia te ia, ma latou o ae ma i latou i le vanu o Akori.
25Ona fai atu ai lea o Iosua, Se a ea le mea ua e faatigaina ai i matou? E faatigaina oe e Ieova i le aso nei. Ona fetogi ai lea o Isaraelu uma ia te ia i maa; ua latou susunu foi ia te i latou i le afi, ina ua uma ona fetogi ia te i latou i maa.
26Ona faaputuina lea e i latou i ona luga le faupuegāmaa tele, ua oo mai i le aso nei. Ona liliu ese ai lea o Ieova i lona toasa tele; o le mea lea ua faaigoaina ai le igoa o lea mea, O le vanu o Akori, ua oo i le aso nei.
Who We AreWhat We EelieveWhat We Do
2025 by iamachristian.org,Inc All rights reserved.
